قال ايه مسيحي!!!
*** ( قال ايه مسيحي!!!)***
الأسم : فلان
ممكن يكون روماني_ مايكل_ ايمان او اي اسم كان
وظيفتي : في الحياه مجرد انسان
وديانتي : انا بعبد رب الاكوان
اللي علشاني اتصلب واتهان
يعني مسيحي ؟؟؟؟
ايوة مسيحي
بس السؤال اللي بيخطر علي الاذهان
** هل فعلا مسيحي بجد ؟؟؟؟
** ولا زيك زي اي حد ؟؟؟
… يعني ايه ؟؟
.. يعني ياسيدي هل:
يوم أجازتك حضرت القداس وصليت؟؟
ولا كسلت وقعدت اليوم ده في البيت!!
طب لو رحت هل كان فعلا للقداس؟؟
ولا علشان يشفوك الناس !!
ويقولوا عليك مسيحي بجد… وأنت في المسيحية
مالكش أساس!
… طيب…
هل بتجاهد في الصلوات؟؟
هل بتصلي من الاجبية سبع مرات؟؟
.. ولا سيادتك مشغول دايما بمسلسلات أو ماتشات
…. طيب….
هل بتعترف؟؟ هل فكرت في مرة تتوب؟؟
ولا لسه مقضيها ذنوب!!!
… طيب…
هل بتقرأ في الانجيل؟؟ هل بتصوم؟؟
هل بتعطف علي محتاج؟؟أو حتي بتنصف مظلوم؟؟
هل جربت تزور مسجون؟؟ هل جربت تدي عشور؟
واسئلة كتير… وانت فين من كل ده!!
طب اذا ماكنتش بتعمل كل ده… تبقي مسيحي علي اي اساس !!!
ده انت عامل زي شجرة تين خضرة من برة وجواها تراب ينداس
…. ياريت ….
.. ياريت تفكر… حاول ترجع
.. ياريت لكلام انجيلك تسمع
.. مش الشطارة أننا نقول احنا مسحيين
.. واحنا من جوانا ناس تانيين
..فياريتنا نصلي ياريتنا نصوم
.. وماندورش علي مجد باطل ما بيدوم
.. ياريت نحاول طول عمرنا
..نفكر بس في اننا نرضي ربنا
..ولو عملت كده انت وانتي وانا
..هانكون وصلنا لمبتغانا وحلمنا.
