ازاى تفرح النهاردة

كل سنة وانتوا طيبيين ووانتوا فرحانيين

يا رب كل واحد يكون فرحان بالسنة اللى ربنا ادهالوا .. ونفتكر كام حاجة ربنا فرحنا بيها، وكام حاجة حتى ضايقتنا لكن ربنا وقف جنبنا وعرفنا نعديها ودلوقتى لما نفتكرها نستغرب ونقول انا مش عارف ازاى بعد ما كنت فاكر انى عمرى ما هعدى المشكلة دى ربنا عدها كدا ودلوقتى بقت مجرد ذكرى عابرة

وحتى للى بيمروا حالياً بمواقف صعبة، بقولهم افتكروا كل موقف ربنا عداه عليكوا على خير عشان ايمانكوا يبقى اقوى .. هى فعلا بتبقى ايام صعبة .. بس معلش كلوا بيعدى واللى عدى كل سنين عمرنا اللى فاتت قادر يعدى اى حاجة صعبة بنمر بيها

عايزا اقولكوا لو حد عايز يبقى فرحان اكتر النهارده .. ونفسه يسرق الفرحة كدا بالعافية .. عايزا اقترح عليك .. فكر فى اى حد انت بتحبه هاتلوا هدية صغيرة خالص خالص .. لو عندك اطفال فى العيلة هاتلهم اى حاجة صغيرة

او حتى كلم فى التليفون الناس اللى انت بتحبهم وقوللهم كل سنة وانتوا طيبيين .. ولو انت نزلت من البيت ومقولتش لبابا وماما واخواتك او مراتك او جوزك كل سنة وانت طيب .. كلمهم دلوقتى .. متستناش لما ترجع قوللهم كل سنة وانتوا طيبيين .. صدقنى هيبقى ليها طعم تانى

ويا ريت كمان تكلم حد انت عارف انه عنده مشكلة او حاسس بالوحدة.. او مش حاسس ان فى حد بيحبه .. او حتى حد انت زعلان منه او هو زعلان منك.. او أى حد انت عارف انه مجروح لأى سبب

صدقونى الحاجات دى بتبان اننا احنا اللى بنفرح الناس .. لكن الحقيقة بقى ان احنا اللى بنبقى فرحانيين .. وبنحس بجد بالعيد… جربوها بس

ولو حد عنده افكار تانية ممكن تفرحنا النهارده يا ريت يقولهالنا