لية يارب كدة لية كل دة

ليه يا كنيستى فى يوم العيد
ابنك يصبح جريح وشهيد
كان خارج منك وهو سعيد
فرحان بيرتل للطفل الوليد

سيبتيه يخرج وفين حمايتك
ندهت عليكى وما وجدتك
ليه يا أمى جمدتى قلبك
وسبتى اخويا وصاحبى وابنك

مش عارف اسكت واقول دى مشيئته
ولا ابكى واثور لأخويا وحقه
اصرخ فى الجانى واقول ليه قتلته
ولا اسكت ويكون ده دليل برائته

مش عارف افرح بعيد الميلاد
ولا ألبس معاكى يا أمى سواد
ارنم ولا ابكى لدم الولاد
اعيد ولا اعلن حالة الحداد

سامحينى يا امى قلبى حزين
ارسلتى ولادك للسمائيين
فطوباهم اللى فى السما فرحانين
عزائنا انهم مع المسيح و القديسين