اصعب حاجه فى الدنيا
سالتنى بنتى بعد وفاه امها
ايه هو الموت وليه الناس بتموت
وبيروحوا فين بعد الموت
وليه ساعات الصغير بيموت قبل الكبير
قولتلها الموت ده انتقال
من ارض الشر لسماء الابرار
واللى يموت بيرتاح مش بيفضل تعبان
قالتلى امال بنزعل عليهم ليه ؟؟
وليه بنلبس اسود ونعيط ليه ؟؟
قولتلها اصلهم هيوحشونا
لحد مانروحلهم ونشوفهم ويشوفونا
قالتلى طيب يا بابا هنروحلهم امته ؟؟
قولتلها محدش يعرف
ربنا بس هو اللى يعرف
هو يحدد ويرتب
واحنا بس نسمع ونطيع ونعمل
قالتلى طيب يا بابا لما تيجى ماشى قولى قبلها
عشان عايزه ابعت حاجه لماما فى وقتها
اقولها وحشنى قلبك ووحشنى برضه حضنها
وانى بعتك ليها عشان متبقاش لوحدها
وانت تبقى تسليها فى اكلها وشربها
سكت واستغربت من كلامها
وتهتهت فى ردى ليها
بس ملقيتش غير كلمه حاضر ترضيها
راحت قالتلى اما انا مش هموت دلوقنتى
لسه اكبر شويه عشان اخلص دراستى
واول ما اخلصها هجيلكوا على طول
عشان نحتفل سوا بلمتنا من تانى
ونلعب ونرقص ونسمع اغانى
نزلت من عيونى دموع وبصتلها
وقولتلها ماشى يا قلبى هروحلها
وهنستنى مجيك لينا بعدها
وهنلعب وننبسط وقتها
قالتلى طيب يا بابا بسرعه متاخرش عليها
لحسن تزهق من القاعده وتدمع عنيها
وانا هروح ازاكر واخلص بسرعه
عشان اجى ازوركوا كل يوم جمعه
