[emmmy]

أنا جيبالكم فكرة حلوة يارب تعجبكم
--------------------------------------------------------
طبعآ اغلبيتنا وخصوصآ اطفالنا بيحبوا الأنشون جدآ سواء فى سندوشات المدرسة او العشاء
وعشان كدة انا جبتلكم طريقة عمل الانشون فى البيت طريقة مضمونة ونظيفة عشان اللى بيتباع برة كلة بلاوى وأمراض ولحوم مغشوشة .. أنا جربتها وطلعت حلوة
.
.
بصوا بقى هنجيب 5 بيضات وخمس حتت جبنة نيستون + خمس حبات حبهان نقشرة طبعآ ونأخد القلب ونطحنة + ملعقتين دقيق + مكعب ونص ماجى فراخ + نص ملعقة فلفل إسود + معلقتين زيت ذرة + نص معلقة دم غزال عشان اللون الأحمر + 3 فص ثوم + ربع كيلو لحمة مفروم وطبعآ مش شرط تكون لحمة بلدى

الطريقة :
هنأخد كل المقادير دى ونحطها فى الكابة او الخلاط لو هيستحمل وتكون اللحمة مفرومة ناعمة أوى ونضرب كل المقادير مع بعض لحد ما تديك الشكل المتماسك وتحس انها عجينة متماسكة
بعد كدة هنحط الخلطة بتاعتنا فى وعاء سلس او زجاج ضد النار بعد ما نخلطة بالزيت ضرورى عشان ميلزقش ويكون لية غطاء محكم ونحطة فى حلة غويصة فيها مية بتغلى ونغطى الحلة جواها الوعاء متغطى برضوا وتكون المية لحد تلت تربع الوعاء ونوطى النار جدآ ونسبها حوالى ساعة او ساعة ونص

كدة استوت اكيد هنطلعها ونقلبها وهى سخنة عشان متلزقش هتلاقيها قالب متماسك سبية يبرد وقطعية حلقات وحطية فى كيس بلاستك وحطية فى التلاجة .. وبالهناء والشفاء

المصدر: †† منتدى ارثوذكس †† - من قسم: طباخك الخاص

[elphilasouf]

اجربها علي ضمنتك ؟؟؟؟

[emmmy]

جربها يا جورج على ضمانتى

[aymonded]

ممكن تتعمل بنفس الطريقة بلحم الفراخ المخلي، بس من غير دم غزال .... هاتبقى حلوة برضو ويبقى لانشون فراخ....

[emmmy]

تمام يا استاذ ايمن . انا نسيت اقول الملحوظة دى أشكرك
هو انا حبيتها باللحمة اكثر من الفراخ بصراحة ويمكن عشان كدة نسيت ملحوظة الفراخ دى ..!!

تعرف ان انا اول ما شفت اسمك دخلت الموضوع قلت ربنا يستر قبل ما ادخل اشوف ردك
أصلى متعودة منك على افكار غريبة جدآ فى الأكل هههههههههههههه

[aymonded]

ههههههههههههههههههههههههه
لأ مش كنت هاقول حاجة غير كده
لأن طريقتك احسن طريقة وأفضلها

[elphilasouf]

و هو لمؤخذه يعني ايه دم الغزال ده كفل الشر

[emmmy]

دة مادة ناعمة لونها أحمر زى الشطة
بتحطها عشان تدى اللحم اللون الاحمر بتاع الانشون ..
هتلاقيها عند العطار معروفة مش غريبة . انت اصلآ مالك ومال المطبخ ؟

[felflaa]

فكره نجربها وتقلك على النتيجه تسلم ايدى يا ايمى

[+إيرينى+]

إنتوا جربتوا الطريقة ديه بنفسكم ؟؟

عشان أنا بأعمله بطريقة تانية