[mina3338]

كالعادة بذاكر وزهقت ، عالطول قمت ، وللبحر نزلت ، أصل أنا قلت يمكن لما أشوف ريح بيهب ، وموج بيدب فى صخر ، وليه بيشد عيون ناس كلها إحساس أنسى هموم الراس ، بس يا خساره .. لقيت ريح ساكت ، وموج تايه ، حتى الناس غير الناس ، قلت فى بالى حتى البحر زهقان !! فبصتله وقلتله :
- مالك؟ زعلان ليه ؟ قوم شوف موجك متلخبط من أيه؟
- ليه ؟ من أيه ؟ لسه فاكر تسأل ما خلااااص
- خلاص !!! ده أنت البحر الى كنت ...
- لا ... متكملش
- سيبنى اقولك
- ما أنت قلت : " كنت".. شوف أيه جارالى؟ عجبك دلوقتى حالى؟
- زهقت ؟
- قصدك من كترما بيرموا عليا تعبت
- أدها وأدووود
- لا ... دى بس وعود
- أنت اللي وعدت
- يمكن غلطت
- ده أنت اللي بيصب فيك نهور..عملتها دموع جمهور..
- وانا فين راح أصب دمعى ؟
- طب أقول أنا وأنت.. دا أنا جايلك من زهقى
- معلش من كثر همى نسيتك..... بس تصدق أنا حبيتك
- أنا حبيتك !!! مين قالى الكلمه دى ؟؟؟؟؟
- أنا عارفه بس مش دايما فاكره
- ده كان بيقول : " ...
- طب ما بسرعه يا لا نروحله و نسمع منه
- وموجك المتلخبط ؟
- معاه وبيه يتظبط
- أروح لو ممكن تمسك إيديا ؟
- بس كده من عينيا ..
>> المتكلم هو أنا والبحر برده أنا ، بس المشكله إن أنا وأنا مش دايما ماسكين إيد بعض فأنا يزهق وأنا التانى يحزن أصل أنا وأنا ميجمعهمش غير ربنا

Youna
15-5-2009

طبعا مش انا اللي كاتب الكلام ده
ده ابن خالتي يونان

وبصراحة عجبني جدا فقولت لازم اوريهولكم

المصدر: †† ارثوذكس †† - من قسم: القسم الادبي

[mrm29r]

جميييييييييييل بجد ميرسى ليك

يارب اجذبنا ليك مهما كان بعدنا طول

[ملكه الاحزان]

هو يونان بيكتب شعر؟
مكنتش اعرف
بس جميل خالص

[mina3338]

المشاركة الأصلية كتبت بواسطة mrm29r جميييييييييييل بجد ميرسى ليك يارب اجذبنا ليك مهما كان بعدنا طول

شكرا يا مرمر لردك
ويارب دايما نلجأ ليك وقت ضيقنا

المشاركة الأصلية كتبت بواسطة ملكه الاحزان هو يونان بيكتب شعر؟ مكنتش اعرف بس جميل خالص

الواد كان مخبي بس الشهر ده ابتدي يطلع اللي جواة
شكرا يا ملكه لردك

[عماد حسنى]

جميل جدا جدا وفكرته رائعه يا مينا
اشكرنا يونان وعايزين نشوف باقى كتاباته
ربنا معاك ومعاه ومع كل ولاده

[eng_fofa]

الواد يونا بيعرف يكتب حلو كده
هى العيله فيها مواهب وانا مش واخده بالى ولا ايه
بس بجد كلام تحفه
ابقى قوله يجى منك

[mina3338]

المشاركة الأصلية كتبت بواسطة eng_fofa الواد يونا بيعرف يكتب حلو كده هى العيله فيها مواهب وانا مش واخده بالى ولا ايه بس بجد كلام تحفه ابقى قوله يجى منك

طبعا يا بنتي احنا عيله كلها مواهب
واكيد الكلام تحفة والا مكنتش حطيته
بس ما تقوليله انتي ياختي ناقصه ايد او رجل مثلا
اما حاجه غريبه صحيح

[Malak sokar]

حلو وفكرة تجنن بجد
واسلوبة بسيط ميرسي يامانو

[mina3338]

المشاركة الأصلية كتبت بواسطة ملاك سكر حلو وفكرة تجنن بجد واسلوبة بسيط ميرسي يامانو

شكرا يا صافي لكلامك
وانا بجد الواد ده عجبني كلامة

[reegeorge]

بجد جميل قوى الكلام دا يا مينا ابقى خلى يونان يكتب اكتر ويحطلنا الكلام الجميل دا بجد تحفففففففففه