[samerco75]

يا جماعة انا صاحب شركة صغيرة
المجموعة الى شغالة معايا هاتجننى
مش قادر اتواصل معاهم
ومش بيسمعوا الكلام و العملا بيطفشوا
انا تعبت
اكلم حد على غلط معين يقول انت بتكرهنى وعايز تمشينى
كنت رقم واحد دلوقتى الاول من ورا
اعمل ايه حد يساعدنى

المصدر: †† ارثوذكس †† - من قسم: حوار من الاعماق

[aymonded]

صديقي الحلو سلام لنفسك
أولاً الشغل ليس فيه مجاملات ، لابد بل ومن الضرورة أن تجلس جلسة جادة جداً بكل حزم وثبات مع الللين والتفاهم مع المجموعة اللي بتشتغل معاك ، ولا تنظر لمشاكلهم النفسية لأنهم هايخسروك الشركة كلها ، وإن لم ينضبطوا في العمل أو ضبط الشغل أو التفاهم مع العملاء ، فالأفضل لك ولهم ، إن كنتم شركاء تفضوا الشركة ، أما إن كانوا يعملوا لديك الأفضل أن تستبدلهم بغيرهم ، واجعل الصداقة او القرابة خارج إطار العمل تماماً ...

أقبل مني كل حب وتقدير ؛ النعمة معك

[samerco75]

اشكرك كتير على اهتمامك بالرد على سؤالى
لكن امشى المجموعة وارجع ادور على حد يشتغل واعلمه من اول وجديد!
انا عارف انه الحل الاصح لكن مش عايز اخسر حد!

[aymonded]

سلام لنفسك يا محبوب الله
أولاً مين فينا يحب يخسر حد أو يحب أنه يمشي حد من عمله ، ولكن أن لم تأخذ خطوة جادة سيتمادون في هذا الأمر - عن خبرة - وانت في النهاية اللي خسران ، ولكن ممكن مبدئياً تمشي أكثر شخص عامل مشكلة ، وتأتي بغيره ، حتى يرى الكل أن هناك أمر جاد تتخذه فينتبهوا ويعلمون أنك جاد جداً والعمل مش فيه مجاملات ، ولكن طالما أنه ظاهر لهم أنك في حاجة إليهم ولا تقدر أن تمشي أحد فيهم سيتمادون ولن يصغوا إليك أبداً ولن تقدر أن تسيطر على الموقف يا صديقي الحلو ، فاتخذ خطوات إيجابية بأي شكل أو صورة واخبرهم ان من لا يرى شغله كما انت تريد يا اما هاتخصم منه بالفعل ، يا اما سيمشي وكن جاد ولا تهدد بمجرد كلام بلا فعل لئلا ياخدوا عليك والأمر ينتهي بعدم تصديقك ويتمادوا أكثر ويصيروا أكثر عناداً ، لأن الإدارة لابد أن يكون فيها شيء من الحزم مع اللين ولكن كلها تصب في مصلحة الشغل في النهاية ، والعمل شيء والصداقة شيء آخر تماماً ...

وانا عن نفسي شايف أنهم في حالة من الدلع وعدم الاهتمام بالعمل الجاد ولا يصغون إليك ، وهذا لا يُرض الله لأن الأمانة تستدعي العمل الجاد والخضوع لصاحب العمل ، أما ما يفعلونه لا يُرضي الله أبداً ولا يتفق مع الوصية ، ربنا يوفقك يا محبوب الله الحلو ، أقبل مني كل حب وتقدير لشخصك الغالي محبوب يسوع والقديسين ، النعمة معك

[أميرة عبده]

طيب هما زعلانين وبيقولولك انت عاوز تمشينا ومش زعلانين على الخسارة اللى انت وصلت لها ومدركين ان هما السبب فى اللى انت وصلت ليه بسببهم ولا لا وبعدين ازاى انت تسمح بكده من الاول على قد ما علاقتهم بيك وعلاقتك بيهم تكون كويسه كل ده جميل لكن ما يقصرش طبعا على الشغل بالعكس لازم يكون فى تقدم مش تاخير اعتقد ان حضرتك لازم تكون قائد حازم لكن مع الحزم فيه المحبه الشخصيه بعيده عن مجال الشغل وده طبعا بيكون باين من خلال التعامل
سورى على الاطاله

[lolaemo]

بصراحة انا مع اصتاذ ايمن فى كل اللى قالة الموظفين لو ماكنش رئيسهم حازم وقوى
هيستهونو بيه اللى يقولك انت بتتضطهدنى صدو بالكلام وسكتو وحرج عليهم محدش يقول الكلمة دى وقولهم اللى مش عاجبه يسيب الشغل وطبعا هما مش هيقدرو يسيبوه
ربنا يكون معاك ويديك القوة والصبر والنجاح

[تونى كويك]

صاحب العمل له مواصفات خاصة
يعنى مش اى حد ممكن فى يوم ليلة يبقى صاحب عمل
لابد من توافر بعض المميزات لدى صاحب العمل
منها الحكمة المهارة اللباقة قوة الشخصية ولماح
ان يكون بارع فى التعامل مع الموظفين و العمالة بوجه الخصوص
فمثلا يوجد عامل او موظف ان احسستة بانه مهم للغاية فورا يبداء التمرد
لانه احس ان من غيره الشغل مش هايمشى
وفى عمالة العكس وتحديد شخصيات العمالة
بترجع لمهارة صاحب العمل

[samerco75]

اشكركوا كتير جدا على اهتمامكوا بالموضوع
انتوا عارفين المشكلة اساسا ان لما واحدة تغلط واقول لها دة غلط المفروض يحصل بالشكل دة
تقوم تقولى انت بنتعاملنى كدة ليه؟
انت عايز تمشينى؟
بيشجعوا بعض على ان انا يهمنى الشغل اكتر منهم والحقيقة انا كتير بجاملهم واخاف على مشاعرهم!!!!!

[aymonded]

المشاركة الأصلية كتبت بواسطة samerco75 اشكركوا كتير جدا على اهتمامكوا بالموضوع انتوا عارفين المشكلة اساسا ان لما واحدة تغلط واقول لها دة غلط المفروض يحصل بالشكل دة تقوم تقولى انت بنتعاملنى كدة ليه؟ انت عايز تمشينى؟ (( دية حجة علشان تهرب من أخطاءها ولازم اللي يغلط يدفع ثمن خطأه يا أما بالخصم يا أما لو الخطأ كبير ومش عايز يبطل بالفصل (( علمهم شيء لحياتهم ، أنت كده بتضرهم وتضر نفسك )) ، الشغل لا يوجد فيه دلع وسامحني انت علمتهم التملص من أخطائهم ودلعتهم كتيييييييير وهذا من أكبر الأخطاء التي تؤدي لفشل الشغل وانهيار الشركة !!! )) بيشجعوا بعض على ان انا يهمنى الشغل اكتر منهم والحقيقة انا كتير بجاملهم واخاف على مشاعرهم!!!!! (( الكلام ده أنا مش مقتنع بيه يا جميل ، واللي أنت بتقوله دوة وبتصرفاتك هاتخسر شغلك كله وهاتضرهم جداً ))

سلام لنفسك يا محبوب الله الحلو
بصراحة انا مش معاك تماماً في كده خالص ، ده دلع ومش طريقة شغل على الإطلاق ، ومش في حاجة اسمها بخاف على مشاعرهم في شغل ، وانت في النهاية اللي خسران وكلهم هايتعاملوا معاك بنفس الطريقة دية ، وانا لم كنت مسئول عن ناس في شغل وعملوا نفس ذات الحركة لأني كنت برضو بخاف على مشاعر الناس تمادوا وبعضهم استعبط ( آسف على الكلمة ) ، ولما مشيت واحد بجد فعلاً وخصمت من مرتب واحد تاني الكل استقام وابتدأ يحترم شغله ومشي الشغل منضبط واصبح فيه التزام ، وحتى اللي تركوا العمل لأنهم وجدوا عمل أفضل اتصلوا بيا وشكروني على أني علمتهم الالتزام وعدم التهرب من المسئولية وقد التزموا في كل شيء حتى حياتهم الروحية ...

ولكن لو انت مشيت بنفس ذات الطريقة (( الخوف على مشاعرهم وعدم تعليمهم الجدية في العمل والاهتمام بعدم وجود الأخطاء )) هاتخسر شغلك وهم هايخسروا حياتهم ولن يستطيعوا ان يعملوا بجدية أو حتى لو ذهبوا لمكان آخر لن يستمروا فيه ولن يلتزموا بشيء على الإطلاق فيما بعد ، والنتيجة هينهار العمل كله لأن الإدارة في حالة ضعف ، والعواطف لا يوجد لها مكان في عمل وانا شايف ان ده عدم مسئولية من اللي بيعملوا لديك !!

رجاء باسم ربنا يسوع ، أضبط شغلك ولا تسير وراء العواطف يا أخي الحلو ، اخدم الكل بالمحبة ، وعلمهم الانضباط في العمل لتساعدهم على أن يجتازوا صعاب الحياة ويتعلموا شيء في حياتهم ، واجعل العواطف ليس لها مجال وهاعطيك مثال :
كان يوجد أم عطوفة محبة لأولادها جداً ، ابنها الصغير الذي تعطف عليه بشدة ، جُرح مرة جرح خطير ، فاسرعت تغسل جرحه بالماء ، وحينما أتت بالمطهر لتطهر الجرح صرخ ابنها وقال أنه مؤلم ، فلأنها تحبة بجنون وتعطف عليه ولا تريد أن يتألم فامتنعت خوفاً من أن يتألم ، وقالوا كل من حولها أن تأتي بالطبيب لكي يخيط الجرح لأنه خطير ، فرفضت خوفاً من آلام الابن المدلل عندها ، وأعطته مسكن لكي يرتاح من الآلام ، ولكن في النهاية الطفل مات لأن الجرح كان ملوث وينزف كثيراً لأنه يحتاج للتطهير والخياطة ، هذه هي حال العواطف التي لا تقيم وزناً صحيحاً للأمور ، وضررها أكبر كثير جداً من نفعها !!!

فاجعل العمل يسير بانضباط ، واعطي الأجر لمن يستحق لأن الله علمنا هذا !!! ولا تسير وراء العواطف لأن المحبة ليست عاطفية مجردة ، بل هي التزام وتقديم العون الحقيقي لكل إنسان بالتعليم !!!

كان هناك ذات مرة فيلسوف ويجلس معه تلميذا له على شاطئ البحر يصطاد سمك ، فأتى إليهم إنسان يستجدي ويريد سمكة ، فاعطاه تلميذه سمكة ، فنظر إليه الفيلسوف بملامة وقال له : لا تعطية سمكه بل علمه كيف يصطاد !!!

أقبل مني كل حب وتقدير لشخصك المحبوب جداً
النعمة معك

[goneer]

استاذ سمير / انا كبداية انا اتفق تماما مع استاذى القدير ايمن اذا كان كلامك صحيح 100% وانك فعلا بتعامل موظفينك بشكل متساهل وبتجامل منك لهم .
ولكن اختلف مع الاراء التى سبقتنى تماما فى حالة اذا كانت وجهة نظرى صح وهى من خلال قرأتى لأرائك فى حوار من الاعماق انك شخص ردودك تحمل اكتر من معنى تتفهم ع حسب الشخص ال قدامك بمعنى انك ممكن تقول جملة انت حاسس انك بتجاملها وفى نفس الوقت بتفهمها غلطها لكن الشخص ال قصادك يستقبلها بشكل كتير فى قسوة وتعسف وتهديد .
انا افضل انك تفكر جيدا فى طريقة اسلوبك فى التعامل مع الاخرين وتعرف انت بتستخدم اى اسلوب ، اصل بصراحة مش معقول مفيش حد نهائى من موظفينك بيراعى ربنا فى شغلة اكيد فى شئ غلط ومن التقدم الاول الى التأخر المفاجئ دة شئ مش طبيعى .
اتمنى كمان انك تكون صريح معانا اكتر من كدة علشان نقدر فعلا نساعدك ولكل مشكلة فى الكون لها حل مهما كانت صعبة اكيد فى مخرج بس لازم الصراحة التامة مع النفس ومواجهة نقاط الضعف.
يمكن يكون سنى صغير بالنسبة لك لكن خبرتى من شغلى ومن شغل عائلتى الحر اكبر بكتير من سنى علشان كدة انا بقولك رأى بوضوح وتذكر اخى انى فى البداية انا وضعت فرضين لمعرفتك لانى لست اعرفك انت تعرف نفسك اكتر.
اسفة لانى طولت عليك صلى لاجلى