zaza : مساء الورد على احلى واجمل اعضاء فى منتدانا
مجدى ازيك عامل ايه
totit: مساء الفل يا نهى بخير نشكر ربنا مساء الياسمين على اعضائنا
منورين حلقة برنامجنا الوجه الاخر
zaza: العضوة اللى معانا النهاردة عضوة مسجلة من وقت قريب لكن دخلت قلوبنا كلنا هادية ونشيطة ومحبوبة وشاعرة جميلة
totit: عضوة حلقتنا النهاردة سجلت فالمنتدى يوم 25/7/2010
zaza: عضوة النهاردة عدد مواضيعها 41 موضوع عدد اصدقائها 38 اغلبية مواضيعها فى القسم الادبي والمنتدى العام
totit: مش هنطول عليكم هنسبكم مع عضوة حلقتنا النهاردة
zaza: حلقتنا شاملة كل حاجة عن العضوة حياتها الشخصية خدمتها هواياتها حياتها العاطفية مش هنطول على اعضائنا ونشوف لقاء حلقتنا التاسع عشر مع العضوة .........
عضوتناا النهارده
هي
اهلا وسهلا بيكي يا سندريلا نورتى برنامجنا
Zaza : فالبداية نحب نتعرف عليكي؟
اسمك؟
سنك؟
مؤهلك؟
عدد اخواتك؟
سندريلا: اسمي: خلينا سندريلا
سني: 20 سنة و11 شهر
المؤهل: بكالوريوس سياحة وفنادق
عدد اخواتى : 2
totit: سندريلا ايه هى هوايتك؟
سندريلا:بلعب تنس طاولة و كرة يد وكرة طايرة وكمان بلياردو
قراءة قصص الخيال والاكشن
بحب اكتب شوية تخاريف كدة على قدى
بجانب النت طبعا
Zaza : سندريلا هل انتى خادمة ؟
سندريلا: ايون نشكر ربنا
totit: ياترى ايه هدفك من الخدمة؟
سندريلا: طبعا الهدف الاول هو الوصول بيهم للسيد المسيح
بس اكتر حاجة بحس ان المخدومين محتاجينها انهم يشعروا بمدى جمال مسيحيتهم مش يكون كلام وخلاص
Zaza : سندريلا ايه هو طموحك فى الحياة ؟
سندريلا: نفسى كتير اسافر بره مصر
totit: ياترى ليه بتفكرى فالسفر خارج مصر؟
سندريلا: بفكر فيه لانه حلم نفسى احققه واطوله وكمان لانى حاسة انه الحاجة الوحيدة اللى هتغير حياتى للاحسن
Zaza : واكتر حلم مسيطر على حياتك الفترة دى ؟
سندريلا: حاليا السفر
totit: سندريلا هل كان فى حياتك حلم نفسك تحققيه بس فشلتى؟
سندريلا: ايون كان نفسى ادخل كلية ألسن وابقي مترجمة بس ربنا مش اراد ودخلت سياحة
Zaza : سندريلا اوصفلنا شخصيتك ؟
سندريلا: ليا شخصية ودماغ مختلفين جدا عن اى حد
حنينة وطيبة بزيادة قوى (و دة عيبى )
totit: ايه سر حزن سندريلا وده باين من توقيعك؟
سندريلا:اصل الدنيا مش بتسبنى فى حالى حتى ولو شوية صغنين خالص
بتحبنى بزيادة
Zaza : امتى سندريلا هتخرج من دايرة الحزن ؟
سندريلا: هو انا بحاول اخرجها ديما بس الجاذبية بينهم هى اللى فظيعة بصراحة بيجروا ورا بسرعة رهيبةبس اهو ادينا بنحاول مش هسيبها فيها كتير برضو
totit: ربنا يفرح قلبك ويبعد عنك اى حزن
راضية عن نفسك بنسبة كام؟
سندريلا: 30%
Zaza : سندريلا هل دموعك قريبة ؟
سندريلا: جداااااااااااااااا
totit: ايه اكتر حاجة ممكن تضعفي قدامها؟
سندريلا: الدموع
Zaza : سندريلا ايه هو مبدئك فى الحياة ؟
سندريلا: انى امشى على الصح واعمله مهما خسرت من حاجات تانية
totit: امتى ممكن تتخلى عن مبدئك؟
سندريلا: لا معتقدشى انى هيحصل
Zaza : مين اقرب شخص لقلب سندريلا؟
سندريلا: مامتى
totit: ياترى ايه هى صفات فتى احلامك؟
سندريلا: اخلاق
عارف ربنا كويس
حنين
يقدر يحتوينى ويفهم دماغى
Zaza : سندريلا الحب بيمثل ايه فى حياتك ؟
سندريلا: الحب عندى بيساوى حياة
لان لو مافيش حب مش هنعرف نعيش مع بعض
totit: مريتى بتجربة حب قبل كده؟
Zaza : وياترى اتعلمتى ايه من التجربة دى ؟
سندريلا: اتعملت ان الحب لازم يكون بالعقل بعدين بالقلب
totit: اتعرفتى على منتدى ارثوذكس ازاى؟
سندريلا: من الامير الحزين هو اللى عرفنى عليه
Zaza : سندريلا ايه اكتر حاجة شدتك للمنتدى؟
سندريلا:وضوح المعاملة بين الاعضاء ومحبتهم الجميلة لبعض
totit: ياترى ايه اكتر حاجة حاسة انها ناقصة فى المنتدى؟
سندريلا: النشاط والحماس
Zaza : سندريلا مين اقرب عضو وعضوة ليكى فى المنتدي؟
سندريلا: عضو هما اتنين KiroOoalex و TITO Best
عضوة MRAMER
totit: عارفين ان ليكى كتابات حلوة فى القسم الادبى
لو طلبنا منك تقوليلنا حاجة كتبتيها جديدة تقوليلنا ايه؟
سندريلا: ولا حلوة ولا حاجة دى عيونكم هى اللى حلوة بس
اتفضلوا دى كانت اخر حاجة كتبتها بس لسة مش نزلتها
مش هو دة اللى حبيته مش هو دة اللى بايدى دويته
مش هو حبيب الايام اللى كان ديما فى البال
مش هو اللى سكن القلب وعاش فيه بكل حب
مش حبيبى ولا هيفضل بعد اللى كان حبيبى
هيبقى ذكرى عذابى فى زمانى وسنينى
مش حبيبى اللى كانت ايديه فى ايديا
دة واحد تانى مبقاش يحس بيا
مش حبيب القلب اللى عشت العمر بحلم بيه
دة بقى انسان غريب عليا ومش حسة بحبى ليه
مش هو دة اللى عشانه حربت كتير
دة اول واحد فاتنى و قالى مالناش نصيب
مش هو دة حبيبى قصدى اللى كان حبيبى
يارب تعجبكم
Zaza : جميلة تسلم ايديكى وتعيشى وتكتبي
سندريلا امتى تقولى الكلمات دى ؟
تعبت منك يا دنيا؟
سندريلا: تعبت منك يا دنيا: قولتها ومازلت بقولها لان الحمل تقل والنفس مبقتشى مستحملة
يارب مليش غيرك: بقولهاله دلوقتى لان فعلا ماليش غيره
totit: ايه اكتر فترة فى حياتك نفسك ترجعيلها تانى؟
سندريلا: فترة الطفولة
Zaza : سندريلا تفتكرى موقف مضحك حصل معاكى فى حياتك ؟
سندريلا: دة انا حياتى حافلة بالمواقف المضحكة
ههههههههههههههه
كنت مرة بمثل فى مسرحية تبع كنيستنا وروحنا نعرض برا فى كنيسة فى شبرا مصر والمسرح كان مبنى باحاجات الفراشة دى وكان مش متقفل ولا من الجوانب و من الضهر
المهم خلصت دور وخرجت بقا وواقفة المفروض فى الكواليس برغم انها مكنتشى كواليس اصلا بعد ماخرجت بقا لاقيت ناس كتير خارجة ورايا وانا برجع بسلامة نية وكنت فاكرة انه متقفل من ورا وبرجع بقا بقلب جامد ورحت هوووووووب وقعت من على المسرح نزلت فى الارض هههههههههههههههههه بتاع الموسيقى اتلغبط وبتاع الاضاءة مش فاهم فى اية راح عملها كلها بلاك لان الوقعة كان صوتها عالى وجامدة لا واية وانا بقع مسكت فى بلوزة صاحبتى رحت قطعتهالها ههههههههههه وقعدوا اكتر من عشر دقايق محدش عارف يطلعنى الدنيا من ورا ضلمة والمسرح عالى والحمدلله قعدت بعدها فى البيت اسبوع مش قادرة اتحرك هههههههههه بس كان حتة موقف على قد مافطسنى من الضحك على ماخرجت منه كرهت التمثيل والمسرح
totit: هههههههههه يا عينى هههههههههه
طيب قوللنا بتحبى الكورة ؟
سندريلا: مش بحب اتفرج عليها لانى ماليش فيها بس بحب العبها
Zaza : سندريلا تقولى ايه لاعضاء منتدانا ؟
سندريلا: احب اقولهم انكم شخصيات حلوة بجد ومبسوطة كتير انى اتعرفت عليكم يارب نفضل اصحاب ديما
totit: تقولى ايه ل برنامجنا؟
سندريلا: بصراحة البرنامج عاجبنى جداا
فكرته جميلة وبتعرفنا على بعض اكتر و اكتر
وفى انتظار المزيد منكم
ربنا يعوض محبتكم انتو الاتنين يارب
Zaza : لو عندك رسالة حابه توجيها ل شخص معين هتكون ايه هى؟
سندريلا: احب اوجه رسالة لكل اصحابى اقولهم ربنا يخليكم ليا واستحملونى
كمان وكمان
سندريلا: هاتى الميك بقا اختم انا ههههههههه
فى نهاية حلقتنا احب اشكر مجدى ونهى على الاستضافة الحلوة دى
واقولهم كنت منورانا ويارب منورنا ديما كدة
و للاستفسار عن اى حاجة فى اى حاجة
اتصلو بينا على رقم برنامجنا 00000000 ويبقى احسن لو متصلتوش
كانت معكم سندريلا من امام شاشة جهازها
برناج الوجه الاخر
منتدى ارثوذوكس
تصفيق بقا
ههههههههههههههههههههههههه ههههههه
هههههههههههه نورتينا ياقمر
بجد حلقة خفيفة وجميلة
مبسوطين بوجودك معانا
ونتمنى لك حياة سعيدة
انتظرونا فى حلقة جديدة وعضو جديد هاا نعرف عنه كل حااجه عاايزين اسئلة كتير لاننا ببساطة فتحنا الباب ليكم ومش ينفع اننا نسال فى كل حااجه
انتظرونا الحلقة القادمة مع برنامج الوجه الاخر
اميل البرنامج
مع تحيات