يا ما نفسي شهر واحد بس مش عايزه يزيد يعملوني فيه عميد أو حتي نائب للعميد
كنت أعمل للسكاشن كلها ترتيب جديد
كنت أخلي الشخص يتخرج تقول زي الحديد
كنت أمشّي الشخص منكم ع العجين ما يلخبطوش
كنت ألغي قسم جغرافيا ومش ناقصين مضايقة
موتنا من كُتر المذاكرة ومش لاقيين ذاكراتنا فايقة
من غير الجغرافيا تبقي دراسة الكليه رايقة
مش ظريف الاقتراح ده يخليكم ما تسقطوش
بس أنا يا خسارة عايش وسط ناس ما يعبروش!
لو كانوا يعرفوا مقداري كانوا ما يسيبونيش
يعني لو ما كنتش اعرف المناخ ده استوائي أبقي جاهل؟!
يعني لو ما كنتش أعرف الجبل ده التوائي أبقي جاهل؟!
يعني لو ما كنتش أعرف بيليزوي وكيتيزوي وميليزوي أبقي جاهل؟!
ده كلام فارغ صحيح ده مقرر مش مريح
دي مضايقه دي سماجه! بس لما أبقي عميد
والأمل ده مش بعيد هاأبقي ألغي كل حاجه