يوميات زوج مطحون

يا فتاح ياللى معاك لكل باب مفتاح
أهدينا للرزق من عندك ياعالم بالتعب والكفاح
أحنا قصدينك أنت يا كريم
تحمينا من شر كل مفترى وكداب ولئيم
انا مليش غيرك . عشمان فى كرمك وخيرك
انت اللى بتشيل الاحمال . وعارف كل يوم موال
أكرمنا بشغل من عندك . انشالله أشتغل شيال
بس أكفى العيال . والمصيبه أمهم وديون البقال
مانا قولت جواز . وأهرب من قسوة زمانى
أتارى بضهرى برجعله . وانا مش واخد بالى
أعمل ايه والنصيب دايماً قوى وغلاب
لو تقفيله كل البيبان . يجيلك من الحيط ولا الدولاب
كان مالى ما كنت متهنى . لا عيال ولا هم يعكنينى
كنت عايش مرتاح . من غير واحده عملالى انفتاح
محشى وكمان خضار . وواخده المصروف هزار
أقولها براحه ياحبيبتى شويه . تقولى أيه فتامين وتغذيه
ده غير كل يوم بلليل . عليها طلبات ماليها مثيل
مابتسكتش مجهزالى لسته بكل التفاصيل
حتى العناوين وتليفوناتهم . متقلش دليل
اعمل ايه مبقتش عارف . بقت معايا الشريك المخالف
اعمل ايه وعلاده الحال . اجيلها يمين تجيلى شمال
نسيتنى الحب وكل كلامه . دلوقتى فين يرحم ايامه
لو حد يقدر يحل القصه ديه . يلحقنى قوام انا عنوانى فى العباسيه
———————————————————-