القسم الادبي
لسه بنحلم
حلمنا ببيت صغير يضمنا
بحياة هادية بقلب يجمعنا
حلمنا بالغربة اللى هاتحقق كل احلامنا
واتفقنا
اتفقنا نتغرب
نبعد
بس قلوبنا واحدة
روحنا واحدة
اتفقنا نتغرب اه
لكن مايفرقنا الا الموت
حلمنا وحلمنا
وصحينا على ابشع واقع
اصل اللى يتغرب يفضل طول عمره متغرب
بعيد عن قلبه
بعيد عن روحه
بعيد عن عمره
ولما جينا نفتكر الحلم
قال ده حلم
اصل العين بصيرة والايد قصيرة
كان حلم اكبر مننا
مش كل اللى نحلمه نحققه
وبعدنا
وعلى اد ماكنا بنتمنى الغربة
على اد ماكرهناها
وعرفنا واتعلمنا
اتعلمنا ان الاحلام مجرد احلام
وياريتنا حرمنا
لسه برده بنحلم
وهانفضل نحلم
