كلمة الســـــر !! (1)

بعد شوية حسيت إن مش هوه ده اللى أنا بادور عليه !..

إنتهت دراستى ..

وقلت لنفسى "يمكن أحلى يوم فى حياتى هايكون يوم ماأشتغل

وأكون شخص مستقل ولا حد يقوللى هاحرمك من المصروف

ولاحد يقوللى مافيش خروج بعد الساعة كذا" وفعلاً حصل واشتغلت ..

فى الشغل شفت العجب !!

ويابخت من كان المدير خاله ..

كله يقول

وشفت ناس معندهاش مانع عشان تطلع درجة تطلعها على جثة اللى حواليها ..

بعدها قلت لنفسى: "الحياة من غير الحب عاملة زى الصحرا ..

غالباً أحلى يوم فى حياتى هايكون يوم ماأحب وأتجوز الشخص اللى بحبه ..

أكيد وقتها هامسك نجوم السما بايديا"

.. وفعلاُ حصل حبيت واتجوزت ..

ياخسارة ياحب .. ماكنش العشم مالقيتش فيك اللى بادور عليه !

قلت لنفسى "العيال .. أكيد أحلى يوم فى حياتى هايكون يوم ما ربنا يرزقنى بطفل ..

أكيد هوه اللى هيعوضنى عن أى خسارة" .. وفعلاً حصل ورزقنى ربنا بولد يفرح ..

مفرحش إزاى ياخبر ده هوه الغالى اللى قلبى شافه قبل عينى !

تعبت وربيت وكبرت وفى الآخر معلش ياماما أصل ظروف الحياة شاغلانى ومبعدانى عنك !

قعدت مع نفسى ..

وإسترجعت كل الأحداث اللى مريت بيها فى حياتى وإستغربت جداً

لأن مافيهاش حاجة أنا إتمنيتها ماحصلتش عليها ..

ومع كده لا مال ولا جمال شبعنى .. ولا حسب ولا نسب روانى !!

فى قرارة نفسى شاعرة إنى حزينة ومش مرتاحة ..

شوية ظروف حلوة بترفعنى فوق فوق .. وشوية ظروف صعبة بتنزلنى تحت تحت ..

فـجــأة !! ..

؟
.

؟
.