دبابة وكلمة .. !

دبابة وكلمة .. !
ــــــــــــــــــــــ
دبابة تدهس ورصاص مغروس
ضربوا الكلمة بقناصة ومدرعة ..
والمجرم حر والضحية محبوس !!
بالذمة يا خلق مش مهزلة ..

دم برئ وإرهاب منجوس
بطلب حقي بقى دي مشكلة !!
غيبوبة فكر وتعصب مهووس
ماسبيرو مذبحة حلقة في سلسلة !!

مدبوحة يا بلدي وسماكي كابوس
النار فيكي قايدة مولعة !
واديكي اتحرق و كان محروس
ومين له فى الخراب دا مصلحة ؟!

داسوا الإنسان كأنه جاموس
مذيعة وإعلام عايزينها مجزرة
أنا قبطي مش خاين وجاسوس
يا نيل بقيت مالح والمية مررة !!

إصحي يا ثورة دقي ناقوس
قبل ما نصحى على قنبلة
غربان الفتنة قابضينها فلوس
ياشعب فوق وجاوب على الأسئلة .. !

شيرين شوقي
27/10/2011