تامُل فى دريم بارك
كان ياما كان انى رحت دريم بارك مع كتير من زمايلى واصحابى كنت فرحان جداً بالمكان ولكن …..
لقيت اللعب اللى هناك صعبة قوى وناس كتيير خافت تركب كتير من اللعب دى لكن يا ترى انا كان ايه راييى فى الموضوع ده ؟!!!…….
انا لقيت نفسى عندى استعداد انى العب اى لعبة هناك مهما كانت صعبة جداً او خطر …. طيب ليه يا ترى ؟!!
تعرفوا ليه ؟ …. مش شجاعة منى ولا حاجة زى ما انتوا فاكريين لكن انا قبل ما العب اى لعبة لاحظت ان كل لعبة فيها نظام امان جامد جداً….. يعنى فيه هناك لعبة اسمها الاعصار وهى عبارة عن كرسى بتقعد عليه وبعد كدة تطلع لفوق وتنزل لتحت وتتقلب راسك لتحت ورجليك اكيد فوق وتلف بيك ونظام صعب جداً .. ولكن لما ركبتها محستش فيها باى خوف لان حزام الامان فيها كان محكم وقوى جداً … بالظبط زى ايد ربنا لما بتكون حولينا فى وقت الخطر ومصاعب الحياة … اللى بتحول الصعوبة والمخاطرة الى منتهى الامان وعدم الخوف … ايد ربنا اللى بتحول نار الاتون الى ندى بارد …. ايد ربنا اللى بتسمح بمناغشة الحياة لينا لكنها بتدينا نظام امان مش made in taiwan ….
وكمان لعبت لعبة اسمها الغسالة اللى جنب الشلالات على طول واللعبة دى عبارة عن انك بتكون راسك تحت وراسك فوق وعلى ارتفاع كبير وبدون حزام امان ولكن …. فيه قوة طرد مركزى تخليك متبعدش عن الكرسى اللى انت قاعد عليه ولا ســــم يعنى نلاحظ ان فيه لعبة نظام امانها فى الحزام ولعية نظام امانها فى الطرد المركزى وده زى عناية ربنا تمام فى اى موقف خطر تلاقيها باشكال كتير ولكن النهاية السلام والامان ….
يعنى يارب انت عايز تقولنا ان مهما الحياة كانت صعبة والمشاكل حولينا منبصش ابداً على صعوبتها مهما كانت ولكن نبص على ايديك اللى حولينا ومعاها مش هيكون فيه خوف من الخطر… زى ما قال قداسة البابا شنودة ” احبك يارب يا قوتى “
آه آه آه يا خبر اخيراً دلوقتى وصلنا لاغلس مرحلة فى دريم ليه ؟!!
لأن فى الوقت ده العيب مش فى الخارج لان الخارج امان وزى الفل لكن العيب فى الداخل يعنى مش صايم وده يعلمنا انه لازم يكون فيه وقت فى حياتنا نصوم فيه علشان نشارك ربنا ويبقى فيه داخل يقوى الخارج معاه ….
يااااااااااااااه لسه فيه لعب كتييير ممكن الواحد يتكلم عنها لكن بصراحة الورقة قربت تخلص والحبر بيتكلف برضة علشان كدة كفايه عليكم لحد كدة صداع ولكن ….
المفروض اى رحلة تروح بعد كدة دريم بارك مش عاوزينهم يقولوا عليها رحلة لدريم عاوزينهم يقولوا رايحيين خلوة لدريم هههههههههههه ..
وما بالكم الكلام دة كله على دريم بارك امال لو خرجنا لماجيك ومدينة الانتاج الاعلامى دى هتبقى تحفة …..
