القسم الادبي
أنـــا إبــن ضــال
شَايِل هِمُومِى جْبَال وفَاح مِنِّى العَفَن .. إبنَك صَحِيح كَان ضَال و بِيهِدُّه الزَمَن
حَاجزَاه هِمُومُه وحَايشُه عَن حَضنَك مِحَن .. ومَشَاكلُه يَامَا وشَاغلُه بَس إزاى يعيش
تاه فى الصحارى ماشى يتبع نجم ليل .. خرج النهار والنجم فاته تايه ضليل
الشمس كانت ليه امل ونسى البديل … كانو يسألوه راح فين ضياك ويقول مفيش
………………………….
أنا ابن ضال
وتعبت من الموت واختفت كل الآمال
م الصعب جدا انى اضيع ومن المحال
انى ابتدى تانى مكان ما أنا ابتديت
انا ابن ضال
ماتمد ايدك إحيِى ميِّت م التابوت
كل اللى حواليا فاتونى فى وقت موت
وبجد انا بعد اما سبتك .. انتهيت
………………………….
شايل حمولى وجاى اسلمها فى ايديك ..ابنك تعب وعشان مابيهونشى عليك
جايلك وعارف ان لسه مكانه فيك .. وشايلله صورته هى هى بدون تراب
جيتلك تشيل كل التراب من أصل صورتى .. عارفك يارب ان انت عارف ايه حكايتى
نضفنى واغسل قلبى .. واوهبنى نقاوتى .. وحشنى توبى وطال قوى منى الغياب
