إنهضي ياإسكندرية
اسكندرية
يابلد الصفا والهوا والرمل والبحر
بحرك بقي وبردك بقي جمر
وولادك تايهين مش لا قيين بر
مارمرقس روي ارضك بدمه زمان
ودلوقتي اترويتي بدم ضحايا الطغيان
ضحايا الجهل والظلمة ولابسو اقنعة الحنان
لحد امتي
لحد امتي ارضك هترضي يبقي ريها بالدم
لحد امتي شعبك هيفضل عايش ف غم
لحد امتي هنقول للعدو ياعم ويابن العم
انا عارف ان ارضك رافضة بس زينا مالهاش صوت
بس يمكن هي ليها عذرها لان مخارج الفاظها موت
لكن احنا كلامنا بقي اعتذارات وتشكرات وتعزيات وكانه سكوت
معرفش ليه بنشكر ولمين بنشكر ولامتي هنشكر
الامنا وجروحنا بقت مكشوفة ومحدش عارف يستر
ولادنا مرميين ف سجون ومستشفيات ومقابر وال جاي اكتر
مش عاوز اعمل ثورة لكن حابب يبقي في عدل
احنا مش ايد واحدة واحنا مش اخوة والتجمع خلاص اتشل
احنا مش كدة فعلا لكن نفسي نبقي كدة
بس من غير ضحية ولا فدا
بالمحبة والسلام والصدق والرضا
يااسكندرية اصرخي استخدمي موج بحرك وانهضي
وولادك في مصر كلها بيحبوكي وواثقين انك تقدري
اكيد الشمس هتوافق تشرق علي اعتابك
بس مش هتشرق في نفوس اعدائك
الا لو فتحوا هما شبابيك قلوبهم ع الاخر لولادك
في بداية السنة بقول الف مبروك
دخلتوا السما ومع ذلك قلبي وقلب احبابكم محروق
لان فراقكم وبعدكم بيزود جوانا الشوق
ياشهدا اسكندرية سلمولي علي ولاد نجع حمادي
نفسي تبقوا اخر شهدا السنة دي
لان الحمل بقي كتير ياالهي
اذكروني ف صلواتكم
ابنكم : ميلاد نبيل
