انا مش قادر

ياما بنحاول نصلى ..
بس الشيطان بينجح وللأسف فى انه يقنعنا ..
قصدى يخجلنا ...
صحيح هو انا ايه عشان اكلمك يارب ..
سؤال صعب ..
سؤال اجابته على الصليب
انت ابنى ..
ايوه .. ومش بس ابنى
ده انت ابنى الحبيب
ربنا نفسه حتى يسمع صوتك
حتى لو كنت انت اللى جارحه
نفسه يسمع اسفك
حتى لو كنت صالبه
نفسه يشوف دموعك
حتى لو كنت .....
هو برضه هيفضل
نفسه ....

لما عينيك وقعت فى عنيا .. قدام صورتك فى القداس ..
قلبى داب من خجله فيا .. وطيت راسى مابين الناس
أصل انا عارف .. انك عارف قلبى وكاشف باستمرار ..
عمرى قصادك .. واللى قصادك عمر ماهيكون ليه اعذار

والقى فى عينك ليا عتاب .. تخجل من قدامه عيون
نظرة بتخلق فيا عذابى... وتأكدلى بأنى بخون
انا مش قــــادر .. أفضل قـــادر أجرح قلبك واجى عليه
عمرى بيجرى ... واللى بيجرى مش هتكفى دموعى عليه

ارفع راسى وابص لجرحك .. صوتك يألم فيا فى جوفى
ايوه بذنبى يارب جرحت .. قلت مشاكلى وقلت ظروفى ..
انا مش عارف .. اقولك عارف ذنبى ياربى حقيقى كبير
بافضل ساكت .. ايوه انا ساكت .. ساكت حتى عن التفكير

نفسى يارب فى مره اشوفك .. قلبى مايبقاش كده مكسوف
نفسى اقولك انى بحبك .. مش بس اتحجج بظروف ..
نفسى اتكلم .. صمتى بيألم .. بيخلينى كتير مدبوح
احكى ياربى .. قصة حبى .. خجلى مانعنى بأنى ابوح