[Dr.PeRO]

+ ربما أشهر حاجة بتميز اهل الشرق هو تمسكهم بعاداتهم وتقاليدهم الشرقية المورثة جيل بعد جيل .. لكن المشكلة الكبيرة اننا احيانا بنعملها واحنا مش عارفين احنا بنعمل كده ليه، والمشكلة الاكبر اننا مش عارفين ايه منها يليق وايه لا يليق .. دعونا نتكلم بصراحة تامة ونتناقش فى امثلة عديدة من التقاليد ديه اللى تخص مراحل الزواج والارتباط المقدس:

• إختيار العروسة:

+ يحب الولد يجرب 1000 مرة قبل ما يختار مين هتبقى شريكة حياته، وبالنسبة للشباب اللى حمارهم بيغلب .. دايماً هتلاقيهم بيترددوا على اجتماعات شباب او خريجين او أسر الكليه عشان يدوروا .. وطبعاً ده من حقهم .. بس الغريب هو معاير الاختيار .. تلاقيه يقولك انا شروطى كالآتى: جميلة - محترمة - بنت ناس - شهادة عاليه (دكتور او مهندسة) - مثقفة - جسمها لا ماليان ولا رفيع ... وقبل كل ده تكون معاها فلوس عشان مايدبسش هو فى كل حاجة ... وبعد كده تلاقيه فجأة اختار واحدة مافيهاش ولا حتى نص الشروط بتاعته!!! ويقول بحبها .. وأهله يتفرسوا ويقولوله يابنى ديه كذا وكذا وفيها كذا وكذا وأهلها كذا وهما كلهم ناس تييييييييييييت... وتلاقي الواد يقولك لا بس بتحبنى وانا بحبها ..

+ وتيجي تفنط صفاتها: تلاقيها واخدة شهاديه عاديه (يعنى مش طلبه) - ومش جميلة ولا حاجة بس عرفت توقعه عشان بينتله انها مهتمية بيه على شوية نظرات على مكياج على كوافير .. والمثل بيقولك لبس البوصة تبقى شاكيرا .. وتلاقيها مش بنت ناس ولا حاجة: بس هى بتخدعه بلبس غالى وعالموضه ومحزق وقصير عشان يقول ان ديه من عيله هاى وناس محترمين (معلش اصل كلمة محترمين اتغير معناها دلوقتى) .. وتلاقيها ولا مثقفة ولا حاجة عشان هما اصلا مش بيتكلموا فى حاجة غير الحب ولو غيروا الموضوع هى بتسكت عشان ماتتفضحش وتعمل نفسها بتحب تسمعه ومنبهرة بيه!!!
وطبعاً اكيد ديه لا محترمة ولا حتى بتحبه، هى فقط عاوزة تتجوز عشان مايفوتهاش القطر ..
+ طبعاً ده مثال لحالة بتكرر كتير لكن مش هى ديه كل حاجة.
+ الخطأ هنا هو ان العقل اتلغى واتشل بسبب الحب، طالما مش ديه الصفات اللى كنت طالبها، ليه موافق عليها؟! وبعدين ازاى تغير مبدأك اصلاً ؟؟ مانت كده ماتبقاش راجل فى نظر نفسك ونظر اهلك! ثم انت اخترت كل الصفات ونسيت اهم صفة وهى انها تكون بتخاف ربنا وليه عشرة حية معاه عشان ماتكونوش عيله فقيرة روحيا وتزيد الطينة بله!! وعشان برضه تضمن انها صادقة وفعلاً ينفع تصونك وتحافظ عالبيت وتربي اولادكم تربية مسيحية .. مع العلم ان دلوقتى بقى صعب تحديد الصفة ديه لأن اصلاً الشاب بيبقى مايعرفش ربنا عشان يختار واحدة بجد بنت ربنا.
الحل المنطقى: قبل ما تختار شريكة حياتك، اختار الاول النصيب الصالح، اختار ربنا فى الاول واسعى انك تختبر العشرة الحقيقية معاه، عشان لما تكون فى ايد مش ممكن تقع الا لو انت عاوز تسيبها!! الله ساعتها هيرشدك واكيد هيبعتلك بنت تكون هى مختبره وعارفه الله، وبكده هتضمن ان باقى الصفات مش هتكون سيئة .. وربنا برضه هيسعدك ويبعتلك اللى تتلائم مش شخصيتك واحلامك.

• الـــشـــــبكــــة:

+ كل شاب ناوى يتجوز لازم يعمل حسابه على شبكة لن تقل عن 10 آلاف جنيه ... ده اذا كنت من الطبقة المتوسطة فى المجتمع، وتختلف الاسعار باختلاف الطبقات الاجتماعية.
+ والشبكة ديه بتبقى فى مرحلة الخطوبة .. يعنى وارد جداا ان الجوازة ماتتمش ويخسر الشاب شبكته اللى اكيد جابها بعد عناء او حتى من ميراث او فلوس ليه فى البنك .. يا اما فى ظروف خاصة بيبقى فيه صراع على الشبكة لأن العرف او التقاليد بتقول ان الشبكة عالشاب لكن اللى عاوز من الطرفين يفك الخطوبة، هو اللى هيتنازل للطرف التانى عن الشبكة
مواويل وصراعات بسبب مرض متوغل عند المصريين اسمه Mental retardation أى التخلف العقلى .. مع ان الشبكة ديه الحل المنطقى: ممكن يتفقوا انها تكون رخيصة اوى ويوعدها انه يبقى يجيبلها حاجة دهب بسيطة كل عيد ميلادها او عيد جوازهم او اى عيد ... لكن للاسف دايما أهل العروسة يحبوا يتفشخروا بشبكة بنتهم وكأن الشبكة ديه وسام الجمهورية من الطبقة الاولى!!!

• ليلة الحـــــنـــة:

+ صباح الفرفشة ,,,
برغم ان مفيش بيت مسيحي يخلو من العديد من الصور والتماثيل المسيحية والصلبان فى كل غرفة وركن .. بجانب ان بيوت كتير اوى اتصلى فيها قناديل بجانب الصلوات اليومية لأهل البيت نفسهم ... الا ان فى ليلة الحنة ديه بالتحديد، بيتم تحويل البيت الى كباريه مؤقت ... وبيبقى اهل العروسين واصحابهم وجيرانهم موجودين .. وبيبقى الليلة ديه مضمونها يتلخص فى 3 حاجات: رسم الوشم او التاتوه للعروسة - الاكل والشرب (وغالباً بتبقى جاتوه وحاجة ساقعة للمعازيم، وببيرة مشبرة للرجالة فى صندوف على جنب) - واهم حاجة هى وصلات الرقص المفتوحة .. وديه بتبقى كتسخين وتدريب للبنات للرقص فى الفرح نفسه، أسوأ ما فى الليلة ديه هى انه بعد كام اغنية الكل بيشيط وبتبقى حاجة مسخرة، كله نازل رقص كأنهم لابسهم شيطان .. والاسوأ هو حتمية تواجد "كاميرا رئيسية" بتصور الاحداث المثيرة ديه، بجانب بعض كاميرات الموبايل اللى شغالة على المواهب فقط اللى بترقص!!!
ومفيش كام يوم وتلاقى كل اللى اتصور ده انتشر وبدل ماهى كانت حاجة عائلية بقت فضيحةعالمية، بسبب ان فيديو او اكتر وقع فى ايد حد انتهازى، حب ينشره عاليوتيوب او عالاكونت بتاعه فى الفيس بوك او حتى يفرجه لأصحابه وشلته اللى اكيد حد منهم هيفرجه لناس تانية وهكذا تستمر الحلقة دون ان تتوقف!!
هنكمل الحديث فى النقطة ديه فى فقرة الفرح.
+ الحل المنطقى: هنا مفيش حل .. الليلة الحمرا ديه لازم تتلغى .. والوقت ده العرسان يجهزوا فيه نفسهم ويرتبوا احتياجتهم، بلاش كلام فارغ

• الليلة الكبيرة: (أ) فى الكنيسة:

+ اساسى الكنيسة لازم تكون فخمة عشان تليق بالبيه والهانم، يعنى فى الاغلب بتبقى الملاك شيراتون، العدرا والقديس اثناسيوس .. كده يعنى حاجة غالية وفخمة حبتين وفمنطقة هاى فى القاهرة.
+ لازم فستان العروسة يكون مكشوف من فوق، وكل ما موضته بتكون أجدد، كل ما بيكون مكشوف ومفتوح اكتر .. وقال الهانم عاوزة تلبسه وتقف بيه قصاد الهيكل وابونا يباركهم .. !!! ورغم انه ممكن بتأجر لأنه هو بيتلبس لبسه واحده، لكن العروسة بتصمم تشتريه، واهى مصاريف زيادة عالفاضى.
+ اول لما الاكليل بيبدأ، ابونا بيلبس العروسة صدرة عشان الفستان الواو اللى هى لابسها، وده ميصحش وهى قصاد الهيكل، وعشان الحكاية ماتتفئس، بيلبس العريس برضه حاجة زيه كده، قال يعنى ده من طقس الاكليل وهو ولا طقس ولا حاجة!
+ ولأننا شعب مجامل .. هتلاقى الكنيسة اغلبها مليان معازيم، بس الغريب ان لازم كله يكون على اجمل ما يكون، مع ان اللى هتتجوز هى العروسة ويكفى للنساء المعازيم القليل من التزين او كوافير وخلاص .. لكن اللى بيحصل ان لازم يلبسوا فساتين سهرة او ملابس مثيرة .. وتفضل يا تكون مفتوحة من فوق يا قصيرة من تحت عشان تبان انها اجمل من بالكنيسة، وعشان برضه تشوفلها عريس او تتعرف على حد .. وهنا طبعاً محدش ابداً بيلبس غطاء الرأس رغم ان الاكليل ده صلاة وداخل الكنيسة لكن اليوم ده اجازة من الوصية.
عدم الاحترام لقدسية المكان وحلول الروح القدس فيه بل وتعميم الخطأ وكأنه شئ طبيعى .. وعدم تدخل الآباء الكهنة او الاساقفة لعلاج الامر بصورة سليمة هيؤدى الى المزيد من التفشي والمزيد من الخطايا والعثرة لكثير من الشباب والشابات بجانب خطية تجاهل الآية القائلة: بيبتك يارب تليق القداسة .. وآية بولس الرسول ايضاً فى ( 1 تي 2: 9).
+ الحل المنطقى: يجب ان يتم على مرحلتين:
الاولى: هى كشف حقيقة الامر فى الاجتماعات العامة والشهيرة بحيث نتأكد ان كل قد سمع .. وهنا الكشف ده عبارة عن عظة مفصلة عن حواء وكيف تسلك فى المظهر والجوهر، وكيف تحترم هيكلها الذي هو هيكل الله ومسكن الروح القدس! كيف تحترم مسيحيتها الذي اخذتها بسفك الدم على الصليب! وكيف تحترم انوثتها التى هى مدخل للامومة وليس الاغراء.
والعظة ديه يجب ان لا تحتوى على انتهار او اعادة كلام مكرر ومعروف، بل تحتوى على شواهد كتابية وقصص حقيقية ورمزية للتبسيط واقوال آبائية بحيث ان يتم لم الموضوع وكشفه بكامل حقيقته من المنظور المسيحي، وبحيث ان الكل يعرف رأي الكنيسة بوضوح تام وبكامل التفاصيل فى هذا الامر.
وتنتهى العظة بارشادات لكيفية اقامة عشرة وعلاقة مع الله .. أى "الاختبار"
الثانية: هى تعميم وتطبيق منع الدخول للكنيسة بأى مظهر غير لائق .. ويحق للكاهن الحرمان من التناول لمن يخالف اذا لم يرضخ او اذا عاند .. بس التطبيق يبقى فى كل مكان وفى آن واحد بحيث ان مايبقاش فيه تفرقة.
وبكده يبقى عرفنا الناس ايه الصح وايه الغلط مسيحياً وبطريقة شامله .. ووجهناهم لبداية الطريق السليم واختبار الله .. ومنعنا اى انتهاك لقدسية المكان وحتى العثرة داخلة، وذلك لكى نتحاشى غضب الله ولكن لا نستهين بطول آناته.

• فى الكباريه، قصدى فى قاعة الافراح:

+ وان كنت قد وصفت ليلة الحنة بكباريه مصغر .. فالكباريه الحقيقي هو اللى هيبقى فى قاعة الفرح .. بيقى الفرح عبارة عن اغانى ورقص وممكن جاتو وسبورت كولا للمعازيم، اهو اى حاجة تديهم طاقة عشان يعرفوا يكملوا رقص
+ وحالات برضه منتشرة بيبقى فيها رقاصة، واللى بيخلى فكرتها مش منتشرة اوى عشان بس هى غالية .. معرفش الساع بتقف بكام آلف .. حسب مؤهل الرقاصة بقى
+ وطبعاً بيرة او اى مشروبات كحولية .. وكل اللى كانت مغطيه نفسها بشال خفيف ولا حاجة، بتقلعه بقى عشان ترقص براحتها .. وبيبقى المكان عبارة عن حالة من المجون
+ وطبعاً كله بيتصور وبيتنشر عالنت وحتى لو مش فيديو بيبقى صور واللى مش هتلاقيه عاليوتيوب، هتلاقيه عالفيس بوك .. اصل ده فرح ولازم الكل يفرح
+ خلصت الليلة كل بيروح وبيبدا شهر العسل، اللى هو بيبقى اسبوع .. بس انا مش عارف ليه سموه شهر، وصدقونى احياناً مش بيكل 5 ايام!!!
+ الحل المنطقى: أكيد مش اللى يفرحك انك تقعد ترقص زى الزمبلك ومنظرك يبقى مضحك وفيه اهانة لرجولتك، ولا ان عروستك او اختك او حتى امك ترقص قصادك وقصاد الخلق كلها وتتصور كمان والناس قاعدة بتضحك وتصقف!!! بالذات بقى لما يبقى تأجير القاعة والدي جى والرقاصة والاكل و الليلة واقفة بآلاف مؤلفة من 50 الف وانت طالع!!!
+ ده اسمه تبذير مال انك تصرف فى 5 ساعات اكتر من 50 ألف، مهما كان مستواك المالى والاجتماعى!!
+ بجانب المسخرة وقلة القيمة اللى هتفضحك بعد كده وهتخلى وشك يحمر كل ما تشوفها فى الفيديو، لأنك ساعتها اكيد هتكون مهيبر ومش شايف انت بتعمل ايه كويس.
+ ثم ان ازاى تبقى لسه فى الكنيسة وواخد الروح القدس وبعديها تروح ترقص انت وعروستك او انت والرقاصة!
+ والالعن ان اهلك واهلها موافقين وعاوزين كده .. ويقولك ده العرف والتقاليد
+ الحل ان الفرح يبقى قاعة بسيطة يتكلم فيها العروسين كل واحد عن ازاى اتقابلوا وحبوا بعض مثلاً ويشكروا المعازيم على حضورهم ويبقى فيه موسيقى بسيطة شغالة .. والعروسين يلفوا على كل ترابيزه يتكلموا حبة مع الناس .. وممكن فى الاخر يبقى فيه غدا انت ومستواك بقى. وبكده تبقى وفرت فلوس وفضايح وعملت فرح ناس هاى كمان .. حاجة elite يعنى.
+ وممكن لو سيادتك انسان روحانى شوية، والمدام موافقة، تعملوا كورال بسيط يرنم ترانيم مناسبة وفرايحي كفقرة جديدة فى الفرح وخلاص، وانا شفتها كتير بس عند البروتستانت اكتر .. بس للاسف كنت بشوف انهم بيعملوا كده فى الكنيسة ، وبعديها يهيصوا براحتهم فى القاعة !!! حاجة عجب!! وده طبعاً من منطلق الاية اللى بتقول: قاعة لقلبك وقاعة لربك
+ كل لما توفر فى الحنة والفرح .. كل ما هتتبسط اكتر .. لأنك ممكن تكتفى بفرح الكنيسة وبالفلوس اللى كنت هتعمل بيها القاعة، تمد اسبوع العسل لشهر او اقل اذا كان ده ينفع فى شغلك .. وتتفسح فيه انت وعروستك فى شرم والغردقة وكمان فى تركيا أو قبرص أو تايلاند لأن الدول ديه رخيصة الحجز فيها اوى، وتبقى انت الكسبان احسن ما ترقص 4 ساعات وتهين شنبك.

• ما بعد الزواج:

+ كل الازواج بيقعدوا يعايبوا على اهاليهم ويقولوا ازاى يعملوا كده، وبعد الزواج، تلاقيهم هما بيكرروا نفس الكلام او يعملوا ألعن منه مع الوقت .. فالو سمحت ابنى بيتك عالصخر واتحد بربنا وكون معاه علاقة وطيده عشان انت دخلت على مرحلة جديدة وحروب جديدة من ابليس انت لسه ماتعرفش عنها حاجة ولا قدها.
+ أعرف ان انت وزوجتك مابقتوش 2 .. بل واحد .. وواحد فى المسيح متحدين بيه .. اما الحب اللى حبيته ليها قبل الزواج، انساه وحبها كأنك بتحب نفسك بالظبط .. يعنى حبوا بعض مش عشان الوسامة او الشكل او الجمال او اى شئ وانما عشان انتوا بقيتوا واحد، وواحد فى المسيح كمان.
+ وكل ما كان الاختيار من البداية غلط وكان فيه تبذير فلوس او كان فيه خلافات من الاول على فلوس وتجهيزات .. كل ما كان زواجك تعيس وغير موفق ...
اختار رقم واحد الاول صح (وهو ربنا) عشان تعرف تختار 2 و3 4 صح .. لكن لما تكون البداية غلط .. يبقى كل اللى هتبنيه غلط فى غلط.

المصدر: †† ارثوذكس †† - من قسم: كلام فى الممنوع

[رفقة شحات]

بجد موضوع مفيييييييد جدا جدا بس يارب الناس تعمل بيه لان كتير مننا بيحب يمشى ورا المظاهر حتى لو عارف الكلام دا
بجد الموضوع رائع يا دكتور بيتر ودى مش اول مرة دا زى العاده طبعا
ربنامعااااااااااااااااااا اااك

[elshbah]

هههههههههههههههه موضوع جميل جدا د.بيرو ومفيد مع الرغم ان طريقتك فى الكلام مضحكة جداا بس تعيش ايديك يا باشا

[emmmy]

ههههههههههههههههههههه
هههههههههههههه
انت قعقدت كااام يوم نايم وانت بتحلم الاحلام دى يا بيتر؟
كل دة حلم يا بيتر يا نهارك ابيض بس بجد موضوع رائع
واحسن حاجة قلتها وانا دايما اقولها ان الشباب لما بيلغوا عقلهم بيضيعوا كل حاجة تحت سيطرة عواطفهم للاسف ودى مشكلتنا كشعب مصرى اننا عاطفييين زيادة عن الازم والعاطفة بتأخد حقها اوى معانا لدرجة انها بتلغى العقل وتعمية عن دورة فى كل حاجة ويقولولك بحبها يا بابا ومش هتجوز غيرها هههههههة وتبدأ بقى سلسلة مشاكل ملهاش اخر اخر مدى الحياة لانة فعلا بنى من الاول غلط

شكرا يا بيتر على مجهودك الجميل دة وياريت نسمع - من لة اذان للسمع فليسمع

[اشرف وليم]

شكرا لتعب محبتك
الرب يبارك حياتك
موضوع اكثر من رائع

[Dr.PeRO]

المشاركة الأصلية كتبت بواسطة رفقة شحات بجد موضوع مفيييييييد جدا جدا بس يارب الناس تعمل بيه لان كتير مننا بيحب يمشى ورا المظاهر حتى لو عارف الكلام دا بجد الموضوع رائع يا دكتور بيتر ودى مش اول مرة دا زى العاده طبعا ربنامعااااااااااااااااااا اااك

مرسي ليكي خالص يا رفقة، وصدقينى اغلب الناس عارفة الكلام ده بس مش بتفكر ومش بتدقق والاهم عندها تعمل اللى بتحكم بيه العادات والتقاليد
ربنا يباركك

[Dr.PeRO]

المشاركة الأصلية كتبت بواسطة elshbah هههههههههههههههه موضوع جميل جدا د.بيرو ومفيد مع الرغم ان طريقتك فى الكلام مضحكة جداا بس تعيش ايديك يا باشا

يا نادر باشا انا مبسوط ان الموضوع عجبك وطريقة كتابتته عجبتك وشكراا ليك على ردك الجميل
ربنا معاك

[Dr.PeRO]

المشاركة الأصلية كتبت بواسطة emmmy ههههههههههههههههههههه هههههههههههههه انت قعقدت كااام يوم نايم وانت بتحلم الاحلام دى يا بيتر؟ كل دة حلم يا بيتر يا نهارك ابيض بس بجد موضوع رائع واحسن حاجة قلتها وانا دايما اقولها ان الشباب لما بيلغوا عقلهم بيضيعوا كل حاجة تحت سيطرة عواطفهم للاسف ودى مشكلتنا كشعب مصرى اننا عاطفييين زيادة عن الازم والعاطفة بتأخد حقها اوى معانا لدرجة انها بتلغى العقل وتعمية عن دورة فى كل حاجة ويقولولك بحبها يا بابا ومش هتجوز غيرها هههههههة وتبدأ بقى سلسلة مشاكل ملهاش اخر اخر مدى الحياة لانة فعلا بنى من الاول غلط شكرا يا بيتر على مجهودك الجميل دة وياريت نسمع - من لة اذان للسمع فليسمع

ههههههه، لا يا ايمي دي للأسف مش احلام .. ده واقع شوفته وحللته وبقى واضح بالنسبالى اوى بالذات بعد ما ذوقت طعم "الاختبار".
واكيد زى ما بتقولى ان تحكيم العاطفة والغاء العقل يعتبر مصيبة وبداية لمشاكل عديدة .. ربنا يرحمنا من وهم الحب الاعمى ده وينور عقولنا كلنا بنور حكمته.
شكراا لردك الجميل يا ايمى، ربنا يباركك

شكرا لتعب محبتك الرب يبارك حياتك موضوع اكثر من رائع

شكراا لمرورك يا اشرف
ربنا يبارك حياتك

[kottah_sh]

موضوع جميل جداااااا وكامل متكامل
وفعلا كتير من الشباب بتختار بقلبها وتلغى عقلها
رغم ان اختيار الزواج والارتباط اهم حاجه فيه
هو العقل ثم القلب

ربنا معاك ويباركك
وميرسى كتير لموضوعك

[MOHTAHA]

كلامك سليم ومطروح باسلوب ظريف لكن تطبيقه محتاج وقت