[MICKEY]

بقلم : مايكل سامي

صحيت من النوم علي التليفون كان عمال يرن يرن

ده مش ميزد ولا حتي كول ده المنبه كان بيزن
-----

طفيته وجريت اغسل وشي ولقيت الميه مقطوعه

قولت افطر اعبال ماتيجي .. اتاري امي علي الطابونه ملطوعه
-----

قولت اتسلي واكوي لبسي لحد ماتيجي حاجه من الاتنين

حطيت الفيشة بتاعت الماكوه ، وقطعت الكهرباء بعد ثانيتين
-----

لبست ومشيت وبقول يلعن تيت تيت تيت تيت

لبسي مبهدل ، وشي معمص ، وشكلي زي العفاريت
-----

دخلت المكتب والكل باصصلي ، مانا شكلي زي الهاربنين

قميص مكسر وش مكشر شعري واقف زي المجانين
-----

قولت ياميكي متاخدش في بالك شوية والوضع يروق

سيبك منهم وشوف شغلك ، ناس تعبانه وعاوزة تفوق
-----

بشغل الكمبيوتر ملقتش الويندوز ، ودمي ولع زي الحريق

لقيت مديري بيقولي شاطر انت متحول للتحقيق
-----

لبسي مكسر ، وشي مكشر ، ناس بصالي ويندوز محروق

مديري بيزعق وعمال يهزق ويقولي دي شركة مبتقش سوق
-----

جالي مكالمة في نص اليوم من شركة محتاجه لغات

قولت الدنيا هتضحك تاني وياميكي انسي اللي فات
-----

زميلي بيقولي شكلك مبسوط متفرحني ياعم معاك

وايه يعني حرقت الويندوز سيبك منه ياعم فداك
-----

قولتله مهما عملت ياماجد انس انسي انا مش هقول

بطل خبث وحيلة ومكر ده انا واد صاحي مش واكل فول
-----

لو عاوزين يحققوا معايا انا مستعد اسيبلهم مكاني

ده انا الف شركة مقدم فيها وكل الشركات تتمناني
-----

عدت ساعه بعد المكالمة ، رحت لقيت مكالمة كمان

نفس الرقم نفس الراجل ، دي حاجه ولا في الاحلام
-----

لقيت بيقولي معلش يامايكل ده تشابه في الأسماء

مش انت اللي مطلوب ده واحد تاني بس سكرتيري جاله غباء
-----

لبسي مكسر وشي مكشر ناس بصالي بكل غباء

مدير بيزعق ماجد بينهق وتشابه كان في الاسماء
-----

خلص اليوم ، ركبت تاكسي ، وقولتله علي البيت علي طول

مديري رفدني ودموعي علي خدي وبنطلوني كان مبلول
-----

السواق كان ماشي بسرعه ، فرامله سابت مانا منحوس

موت خمسة بسبب السرعه ، وياعيني الوقتي محبوس
-----

انا اغمي عليا من اللي شفته ، ماهو يوم خلاني مدبوح

لقيت واحده بتقولي اصحي لحسن ميعاد شغلك هيروح
-----

اتارييني كنت نايم بحلم ، وصحيت منه اعصابي مفزوعه

خايق ادخل اغسل وشي الاقيها فعلا مقطوعه

المصدر: †† ارثوذكس †† - من قسم: القسم الادبي

[nermos1982]

هههههههههههه بامانة زى السكر يا ميكى.ايه يا واد الكلام الجميل ده؟ياخووووووووووووووووووو فى لايكون ده شكلك بجد فى الشغل هههههههههههههه
ربنا يفرح قلبك ياواد ويوفقك فى شغلك وحياتك

[MICKEY]

المشاركة الأصلية كتبت بواسطة nermos1982 هههههههههههه بامانة زى السكر يا ميكى.ايه يا واد الكلام الجميل ده؟ياخووووووووووووووووووو فى لايكون ده شكلك بجد فى الشغل هههههههههههههه ربنا يفرح قلبك ياواد ويوفقك فى شغلك وحياتك

ههههههههههههههه
فعلا شكلي
انتي عرفتي منين

اكيد ماجد قالك

نياهاهاهاهاها

ميرسي يابت يانرموووو

[شمعة]

ههههههههههههههههههههههه
حلو اوى يا ميكى وصحى النوم
الحمدللة انة حلم ومش حقيقة
ههههههههههههههه
ومنتظرين المزيد

[MICKEY]

المشاركة الأصلية كتبت بواسطة شمعة ههههههههههههههههههههههه حلو اوى يا ميكى وصحى النوم الحمدللة انة حلم ومش حقيقة ههههههههههههههه ومنتظرين المزيد

ههههههههههههههه
هو ساعات بيحصل معايا زيه حقيقة
بس ربك بيسترها
شكرا ياشمعه علي كلامك الجميل
اللي دايما فعلا شمعه لينا كلنا وبينور موضوعنا

[Malak sokar]

هههههههههههههههههه



وقعت قلبي بجد بامانة قلت حرام عفرتو كل ماتضحكلة تكشر تاني
ههههههههههه
الحمدللة انة طلع حلم
بس حلم يخوف بجد

ربنا يبعد عننا احلامك
ههههههههه

[MICKEY]

المشاركة الأصلية كتبت بواسطة ملاك سكر هههههههههههههههههه وقعت قلبي بجد بامانة قلت حرام عفرتو كل ماتضحكلة تكشر تاني ههههههههههه الحمدللة انة طلع حلم بس حلم يخوف بجد ربنا يبعد عننا احلامك ههههههههه

ههههههههههههههههه
ده كان مجرد حلم يابت ياصف صف
امال لو حكتلك كابوس بقي هتعملي ايه
نياهاهاهاهاهاهااهاه

شكرا ياعسل علي المشاركه

[جاسيكا]

هههههههههههههههههه
ربنا يسامحك
كل دا وانا اقول ياعينى لا مش معقول حرام
مش جديد عليك يا ميكى
بس حلوة هههههههههه

[MICKEY]

المشاركة الأصلية كتبت بواسطة جاسيكا هههههههههههههههههه ربنا يسامحك كل دا وانا اقول ياعينى لا مش معقول حرام مش جديد عليك يا ميكى بس حلوة هههههههههه

ههههههههه
بزمتك انتي قولتي ياعيني
ده انتي شكلك كنتي بتقولي احسن احسن احسن

اطلعي منهم ده انا حافظك
هههههههههههههه

[kottah_sh]

كلامك حلو ياميكى وموضوعك متناسق
ويارب يطلع حلم
ولو مش اتأكد من حاجه واحده
ان ربنا شايفلك الاحسن


من ترك كل شئ فى يد الله اعتاد ان يرى
يد الله فى كل شئ
تعمل تلمس تريح تنجى
الحبيب يحملك على ذراعيه





بس انت طلعت جامد ياواد ومحدش يعرف
ههههههههههههههههههههه