[Narmar]

† سلام رب المجد مع الكل †

فى موضوع كان عاملة الواد مانو عن كل واحد يعرف نفسة
وفى وسط الموضوع كان في بند هو ان كل واحد يقول هدفة فى الحياة

لكن الغريب كان فى الردود كانت عجيبة جدا جدا

اغلبها مفيش هدف واللى كاتب الى يعرف يقولى واللى كاتب حاجات غريبة
يعنى حوالى 80 % من الردود بصراحة سلبية جدا جدا جدا

طيب انا نفسي اعرف لية ؟؟؟
هو ربنا خالقك عشان تتولد وتكبر وتعيش وسط الناس وتاكل وتشرب وتنام وتقوم وتخرج وتكبر وكل الحاجات دى بس ما هو لو مفيش هدف فى حياتك يبقى انت عايش لية اساسا ؟؟
مش مشكلة الهدف أتحقق ولا لا
المشكلة ان مفيش هدف اصلا عند ناس كتير ودة فعلاااااا شئ محبط
وشئ بشع جدا جدا
الانسان اللى مش عندة هدف انسان مش لية شخصية انسان معدوم كل شئ
انا اسف على الكلام دة
بس فكر اعد مع نفسك
ازاى يكون ليك هدف فى الحياة
وعلى فكرة الهدف فى الحياة مش شئ واحد بس بمعنى

ان الاهداف متعددة ,,

اولا: فى أهداف روحية لازم تفكر كويس اوى فين اهدافك الروحية مثلا فى قراءة الكتاب المقدس حط هدف قدامك بقرايتة كله حاول
ولو مش حصل مش تيأس بجد
لو حققت الشهر دة 20 % من هدفك الشهر الجاى هيبقي 21 % الزيادة هتزيد يوم بعد يوم
وهدفك فى الصلاة وهدفك فى كل حاجة روحية مع ربنا تعد مع نفسك وتاخد قرار فيها .

ثانيا: أهداف أجتماعية طبعا احنا فى وسط مجتمع مش منعزلين عن العالم فلازم يبقى ليك خدمتك وليك محبتك مع الناس وليك أصدقائك الجمال وليك عيلتك مش تقطع علاقتك بالناس ابدا حاول يبقى هدفك انك تنمى العلاقة دى وتستغلها لتمجيد اسم المسيح .

ثالثا: اهداف لهواياتك كل واحد فينا اكيد 100000000 % جواة هوايات مش هواية واحدة مش شرط انك تكون عارفها او شايفها دور عليها لو مش لاقيها هتلاقى نفسسك ابرع انسان ينفذها حقق نفسك فيها ووحط هدفك فيها .

رابعا أهداف ثقافية : طبعا دة هدف انا بالنسبالى مهم جدا كالقراية والثقافة بالعالم عموما من كل النواحى الادب والتاريخ الكنسي والتاريخ البشري وعلم النفس و الطب وكل العلوم الاخري حط ليك هدف فيها انك تقرا وتعرف وتبقى عارف الدنيا فيها اية مش تبقي ابن ربنا ومش فاهم اى حاجة فى اى حاجة مش بقولك ابقى عالم ولا دكتور ولا اي حاجة لا بس خد نبذة صغيرة فى كل حاجة على الاقل يا جدع عشان محدش يعرف يضحك عليك .

طبعا فى اهداف تانية كتيرة جدا جدا جدا وانا رغاى لو قلت فيها مش هنخلص
عاوزكم تناقشونى واللى هيرد على الموضوع هيقول شكرا هدبحة على باب المنتدى
ربنا معاكم وتعيشوا فى نعمتة دايما لمجدة ولمجد اسمة القدوس
قولوا امين
امين
Narmar
ـــــــــــــــــــــــــ ـــــــــــــ

المصدر: †† ارثوذكس †† - من قسم: الموضوعات الشبابية