[MICKEY]

بقلم : مايكل سامي

مش لاقي شغل ولافف مصر شارع شارع
ومؤهلاتي حلوة وتقديري بارع
صرخت من قلبي علي حظي ومحدش لصراخي سامع
وأخر مازهقت اتمنيت اقف مع جزار ابيع لحمة وكوارع

كل مافي الأمر بيعاملوني كأني مجهووول
لكن لو معايا وسطي كانوا عينوني علي طووول
ويرحموني من عزاب الفقر اللي مابيوكلنيش حتي الفوول

واحد مش بيعرف يكتب أسمه لكن ليه ضهر كبير
خدوه وعينوه علي طوول بدون أدني تفكير
وأترقي في خلال شهور وبقي هو المدير
ولابس بَدَل القماش ،، صوف وكتان وحرير

قالولي لما قدمت .. صحيح تقديرك أمتياز لكن وضعك خطير
ولو شغلناك مش محتاجين تفكيرك ، لكن محتاجين ضهرك الكبير
فأنت جايلنا من غير وسطي .. فياشاطر روح بيع عصير
ولو العصير محتاج وسطي .. فأسرح بجبنه وفطير
وأكيد لما أبوك يعرف من الفرحه هيطير

بقيت عامل زي الأبن الضال اللي أشتهي أكل الخنزير
مش لاقي حته أروحها ولا لاقي حتي سرير
أريح عليه جتتي من كتر المشاوير

أبويا لما شافني قالي طمني يابني عملت أيه
قولتله أسكت يابا ومتفكرنيش بده يوم وتبكيني عليه
راحت دمعتي نزلت فخدني بين زراعيه
فضلت أبكي أبكي ودمعي كان قاسي عليه
وحس انه عاجز ومش عارف يعملي ايه
غير انه يمسحلي دموع عنيا بأيديه

قالي سامحني يابني محلتيش غير ربك التجأ اليه
لا خالك مدير كبير ولا عمك مساعد وزير
أرمي همومك علي ربك وحده ليه التدبير
يرزق النملة في جحرها ويخلي الفقير أمير

المصدر: †† ارثوذكس †† - من قسم: orsozox page in facebook

[maro-mrmr]

كلام حلو اوى وخطير
لكن اطمن فى امل فى التغيير
بعد الثورة عندك امل كبير
ممكن تترقى من عاطل لغفير
لكن سلم امرك للقدير
ممكن سعتها تبقى وزير

[Coptic Adel]

قالي سامحني يابني محلتيش غير ربك التجأ اليه
لا خالك مدير كبير ولا عمك مساعد وزير
أرمي همومك علي ربك وحده ليه التدبير
يرزق النملة في جحرها ويخلي الفقير أمير

ربنا يدبر كل امورنا وعليه كل اتكالنا

بجد كلام جامد جداً يا مايكل وحسيت انه خارج من القلب

وبيعبر عن معاناة معظم الشباب اللي انا واحد منهم بالمناسبة ههههه

تسلم إيدك يا جميل .. واصل إبداعك