[keroo82]

كبارية
اكيد موش هاتكلم عن فيلم موجود فى السينما دلوقتى
الحقيقة كتير كلمونا عن اداب الدخول الى الكنيسة فى محضر الرب
كتير من الاباء و الخدام نبهونا لشكلنا و مظهرنا اللى المفروض انة يكون صورة ومثلا للاب الذى هو فينا
بس للاسف شاهدت لك حفلة الساعة 6
موش فى السينما لكن فى الكنيسة

الناس بتقول عليه فرح

بس انا شفتة اى حاجة تانية غير انة يتعمل فى كنيسة
ملابس خليعة وانا بعيد الجملة خليعة وفى منتهى قلة الذوق
وضحات عالية ونظرات متبادلة و مناقشات جانية على فلانة
وبهدلة يابة ولا المولد
لا واللى يضحك بجد فى الموضوع ان الناس دية فكرة نفسها بتعمل طقس كنسى
وكل واحد فى وادى
ابونا والخورس فى وادى و كل من فى الكنيسة فى وادى والعريس و العروسة مركزين فى التصوير و المصور يقرب ويقولهم اضحكوا بقة شوية والشماس فى نفس الوقت بيقول قفوا بخوفا لسماع الانجيل المقدس
مسخرة يا راجل
والغريب اكتر ان البنات بقت تتفن ازاى تقصر من الفستان وفى نفس الوقت تطول الفتحة ؟؟
ودية واقفة قدام الهيكل و هى مستورة بالعافية بحتة قماش قد المايوة وعمال تنزل وتطلع وكانها فى استعراض على المسرح واسف موش هاقول على المذبح
اية يا جماعة دية ازى نكون مرايين كدة؟
ازاى الصبح نكون بنحضر القداس و صايمين ولابس كويس وبالليل فى نفس الكنيسة ونفس الحدث تقريبا انك بتحضرى سر مقدس ولابسة كدة
لا واسمع الحجة؟
اصل عندنا بعد الكنيسة قاعة يعنى هانلبس فين؟
مضحكة قوى المهم القاعة و نحترم الزى الرسمى للقاعة
طبعا القاعة دية فى الاخر ديسكو ورقص و بنات تخبط فى ولاد ومفيش مانع فى كاسين و كام قزازة بيرة وغيرة واللى فى الديسكو مين؟
ولاد ربنا اللى لسة من ساعة مرشومين بزيت المايرون
تخيل انك طالع من القداس الصبح بعد التناول ورايح تزنى اوتسكر او رايح تقتل؟
مهى هى هى يا ناس
خليتوا الناس تقول علينا ويا ترى الموزة داخلة فين؟ اةةة دية داخلة الكبارية
الحل؟
ü الحل اننا لازم نوقف المشهد دة واننا نمنع الناس تدخل الكنيسة الا بزى الكنيسة وزى ما الكتاب قال بلباس الحشمة
ü الحل ان ابونا يعتذر عن القداس ما دام فية ناس موش محترمة ربنا وياما يطلعوا برة يا اما موش هانعمل اكليل للزواج
ü الحل ان يتبة على العروسين وهما بيحجزوا ان الكنيسة موش بتقبل الدخول بسوريهات
ü والحل اننا لو موش قدرين نعمل كدة مع المعازين والقرايب يبقى بقة نعمل طقسية والصبح وكل واحد يبقى محترم احسن

وزى القاعة الرسمى دية مشكلة اللى عايز يلتزم بية موش مشكلة الكنيسة يتلبس بقة فى اى مكان الا الكنيسة
حد عايز يقول حاجة؟ اسمع رايكم من فضلكم

المصدر: †† ارثوذكس †† - من قسم: المنتدى العام

[polaalfons]

بسم الصليب عليك ياكيرو

انت قلت كل اللى فى نفسنا وفكرت فى الما خذ اللى بتؤخذ علينا كمسيحيين اولاد الله ولانحترم بيته

ربنا يخليك لينا بجد انت اتكلمت عن لسانى ولسان كتير من اخواتى فى البلد كلها مش المنتدى بس

وكمان وضعت حلول ايجابية جدا ومش عيب الاربع نقاط دول يبقوا شروط اقامة الاكليل خالص.

ياريت تنقل الموضوع الى منتديات اخرى لانه بجد مفيد وعندك كل الحق .

احنا بنسىء لالهنا اللى مات عشاننا وفدانا

وانا هعمل فى فرحى الشروط دى انشاء الله واللى محترم صاحب البيت بس يدخله

سلام رب المجد يكون معاك

امين

[zaza2006]

معاك حق لازم فعلا ده اللى يحصل لازم نحترم بيت ربنا وناخد موقف من اللى بيحصل فى الافراح

[Team Work®]

فعلا موضوع حلو وعلشان كدة تم التنبية عنوا

[keroo82]

ميرسى ليكم يا اخواتى على مروركم
الواحد مش عارف يعمل اية بس انا قربت ابطل اروح الكنيسة من اللى بيحصل دة مش معقول خالص بجد احنا بقينا فى كبارية فعلا

[كيرو رافت]

بجد بجد يا احلى كيروووووووووووووووووووو انت دايما مواضيعك مثيرة وخطيرة فعلا
كلنا دلوقتى بقينا بنعانى من الموضوع ده صدقنى اتحول فعلا من مزبح مقدس الى دار عرض للازياء بس الخاصه بالمصيف بس
موش عاوز اقولك قد ايه بتألم من المناظر المخجله دى وقد ايه بكون مكسوف وانا بتخيل البنت وهى خارجه من الكنيسه وكل العيون هاتبقى مراقباها من الاديان الاخرى
وفى النهايه بيتقال بص المسيحيين بص العرى اللى بقوا فيه
بجد انا موش ضد ان الواحدة تلبس كويس وموش عايزها تلبس شوال علشان خاطر ترضى الناس وتبعد عنها النظرة الشريرة انا عايزها ترضى ربنا وترضى نفسها
وانا واثق انها هاتبقى صورة حيه لامنا العزراء مريم
ميرسى ليك يا اغلى كيرووووووووووووووو على موضوعك الجميل الرائع جداااااااااااا ده
وميرسى ليك يا هيما على ارسال الموضوع للجميع ربنا يبارك حياتكم

[keroo82]

ميرسى ليك يا كيروووو يا غالى على مرورك وردك اللى اسعندنى جدا
ومستنى راء بقية الاعضاء للموضوع الهام دة
ربنا يبارك حياتك

[elphilasouf]

ياااااااااااااااه فعلا مبقتش كنيسه دي
بقت كباريه
بنات وولاد دخلين بس عشان اغراض تانيه غير حضور السر الالهى
بنات دخله للاستعراض وولاد للفرجه
ولا تعليق


ميرسي بجد ع الموضوع وفعلا يستحق التنبيه
ميرسي ليك جدا جدا و ربنا يعوض تعب محبتك وغيرتك ع الكنيسه

[keroo82]

ميرسى ليك كتير على رائك الجميل يا فيلوو
ربنا يباركك

[totoshiry]

بجد يا كيرو مفيش كلام بعد كلامك بجد بس المهم اننا عاوزين افعاااااااااااااال واظن ان الموضوع صعب انه يتنفذ فى كل البلاد او معظمها
بس ربنا يعوض تعبك الرااااااائع ده