[aymonded]

رجاء العودة لهذا الموضوع لكل من يدخل هنا أو في اي مشكلة تخص ما قد حدث للأهمية
https://www.orsozox.com/forums/f37/t61926/

[emmmy]

عملنا اية يا ايمى فى احداث نجع حمادى
ولا حاجه مع انها ابشع بكتير من الحادث ده
وبرضوه مش ها يحصل حاجه كا العاده
احنا اتعودنا اننا نضرب ونسكت
اتعودنا ننضرب ونقولهم تانى
كل حادث مجنون او مختل عقلية

خلاص الواحد زهق من كتر اللى بيحصل
واما نشوف اية اللى هايحصل فى العيد
الجااااااااااى

ما هو دة قصدى يا مجدى بالظبط كلامك اللى قلتة
معملناش حاجة وعلشان كدة بقولك اية هو رد الفعل اللى المفروض نعملة اكتر من كدة
ولا حاجة
يبقى نرفع قلوبنا لربنا وهو يتصرف بقى انا مش اقل منك نار جوايا وربنا وحدة اللى يعلم بس مينفعشى مع كل تجربة نفقد سلامنا لان تجارب ابليس ملهاش نهاية حتى النفس الاخير
بس بلاش لهجة التشاؤم اللى بتتكلم بيها دى

[nwwfaltas]

انا من شعب الكنيسة و عرفت ان التاسونى بتاعتى اما كنت فى مدارس الاحد استشهدت امبارح و مش كدة و بس بنت من الخدمة استشهدت ناس كتير و اطفال ماتوا
ربنا ينيحكم
اذكرونا قدام يسوع
يا
تاسونى سميرة
و مريم فكرى
و استاذ صموئيل
حتوحشونا اوى

[zaza2006]

ربنا يصبر الجميع
مفيش غير اننا نقول لتكن ارادتك يارب

[aymonded]

المشاركة الأصلية كتبت بواسطة nwwfaltas انا من شعب الكنيسة و عرفت ان التاسونى بتاعتى اما كنت فى مدارس الاحد استشهدت امبارح و مش كدة و بس بنت من الخدمة استشهدت ناس كتير و اطفال ماتوا ربنا ينيحكم اذكرونا قدام يسوع يا تاسونى سميرة و مريم فكرى و استاذ صموئيل حتوحشونا اوى

نيح الله نفوسهم بسلام في فردوس النعيم ، لأن مسرة الرب في شهداءه الذين ماتوا على اسمه العظيم القدوس ، وطوبى للراقدين في الرب ، فأجرهم عظيم في السماء ...

آمين يا إلهنا القدوس الحي أقبل شهدائك الذين ماتوا على اسمك القدوس
ولأنك أنت الحياة فلن يموت من يحبك ويمسك في شخصك إلى الأبد يا إله الخلاص والرحمة والبر الأبدي
وأيضاً ليتك تطهر وتقبل كل من ماتوا لأنهم يحرسون كنيستك وأولادك ولم يكونوا يعرفوك
لأنك أنت وحدك القادر أن تعطي حياة ابدية حسب مسرة مشيئتك يا عالم بخفايا القلوب محب البشر القدوس
طالبين ايضاً قوة عزاء بغنى مجد حضورك الخاص لكل أسر الشهداء الذي أُصيبوا بحزن عظيم في هذا اليوم
ولأنك إله الرحمة والمحبة فلنا ثقة في شخصك المهوب المخوف المملوء مجداً
طالبين أيضاً أن تقرر لنا سلامك وتزرعه في قلوب محبيك وايضاً في مصر كلها
أقبل منا كل صلاة يا سامع الصلاة وعالم بكل ضيق البشر
فلك المجد ايها الآب مع ابنك الوحيد والروح القدس
مجداً للثالوث القدوس الإله الواحد آمين فآمين

[سيف الاسلام]

اولا انا بقدم عزائي لكل اسر المتوفيين في الحادث
وبتمني الشفاء العاجل لكل المصابين ..

كـ واحد مصري

ثانيا الحادث اللي حصل ده مش بيستهدف المسيحيين بس
او لانهم مسيحيين
لا ده بيستهدف مصر كلها ..

والمرة الجاية هيضربوا مسجد ... عشان يقولوا ان المسيحيين
بيردوا وبينتقموا
ويشعلوا الفتنة الطائفية في مصر

وده اللي بيتمناه ناس تانية .. بتحلم تشوف مصر في دمار وحروب اهلية

المسلمين مستحيل يقوموا بعمل زي ده
لانه مش من طبع الاسلام ولا المسلمين التدمير والقتل والخراب

احنا دين تسامح .. وطول عمرنا عايشين مع بعض
ومستحيل يكون ده تفكير حد مصري ايا كان

اتمني الاخوة المسيحيين يتفهموا الموقف
ويتصرفوا بعقل
وميدوش الفرصة لناس تانية تدمر البلد

وبجد انا زيي زي اي حد مصري حزين للي حصل
لانه تحت اي ظرف ميصحش ولا ينفع انه يكون في كدة

اتمني يارب الامرو تهدي

ويكون الجميع بخير

[emmmy]

اولا بشكرك على عزاءك يا سيف ومشاعرك الجميلة
ثانيا صدقنى الاساءة والخطة الاجرامية المتوحشة واللى مفيهاش رحمة ولا انسانية دى الاضطهاد والاجرام والظلم اللى موجود من نشاءة المسيحية بيزودها ايمان وصلابة وعزيمة وقوة وثبات بنعمة المسيح وقوة ربنا
والاحداث كلها مش موجهة لقبطى ولا مسيحى اد ما هى موجهة للمسيح نفسة هو قال كدة صدقنى
لقد نقشتكم على كفى
من يمسكم يمس حدقة عينى

[سيف الاسلام]

يا ايمي

طب ليه اضطهاد ؟
وفين اصلا مظاهر الاضطهاد دي ؟

مش عشان حادث من اشخاص غير مسئولين ومعندهومش دين .. يبقي نقول اضطهاد

دي احداث بتستهدف امن مصر كلها .. مسلمين ومسيحيين

وعايز اناقشك في نقطة

لو فعلا مصر والمسلمين بيقوموا بأضطهاد ضد المسيحيين
هيعملوا تفجيرات عبيطة كده في اعياد الميلاد ؟

ولا ينظموا خطط مدروسة .. ويضطهدوا المسيحيين من غير ما حد يحس
يعني في اوقات عادية
ولو الحكومة والبلد عايزين كده هيعرفوا

بس ليييييييييييييييييييه ؟
احنا شعب واحد
مسلمين ومسييحين شعب واحد
وعايشين مع بعض من 14 قرن
ومكنش بيحصل اي حاجه من دي
صح ؟

يبقي ليه نقول اضطهاد علي احداث خارجية قصدها الاول كرامة واستقرار مصر
والله انا ما بقول كده عشان انا مسلم

لا بقول كده عشان دي الحقيقة
وعمر ما هتلاقيب واحد مسلم فرحان وهو شايف الدم والتفجير والقتل ده

....................

ياريت تشوفي منزلة المسيحية والسيد المسيح في القرأن وعند المسلمين ايه
http://st-takla.org/FAQ-Questions-VS...istianity.html

القرأن بيتكلم عن المسيحية .. والسيد المسيح .. والسيدة مريم

[emmmy]

عزيزى / الاخ سيف
اناا طبعا اتمنى من قلبى نبقى بلد واحدة وقلب واحد
محدش ابدا يكرة السلام والحب والامان وصدقنى
انا عارفة ان فى مسلمين كتير كويسيوبتعامل معاهم واشهد لهم وعندهم مبدا ودين ورحمة
وعارفة ان اصحاب الاحداث دى ناس معدومة من الضمير والانسانية
بس بصراحة مش عارفة اصل دينهم اية لسة
هنعرف يا سيف هنعرف كل حاجة ؟
اذا كانت خطة من خارج مصر لهدف التدمير والفتنة بين الاقباط والمسلمين وسببها التاثير على امن البلد ولا اضطهاد من المسلمين وكرة وتعصب من ناس مش فاهمين ان فى يوم حساب امام الديان العادل

يبقي ليه نقول اضطهاد علي احداث خارجية قصدها الاول كرامة واستقرار مصر
والله انا ما بقول كده عشان انا مسلم

لا بقول كده عشان دي الحقيقة
وعمر ما هتلاقيب واحد مسلم فرحان وهو شايف الدم والتفجير والقتل ده

....................

انا واثقة من دة مفيش انسان يحب منظر الدماء والخراب والدمار ابدا
لا مسلم ولا قبطى
وعموما زى ما قلتلك هنعرف يا سيف هنعرف الحقية كلها وقريب جدا
ربنا هيعلن عدلة ومجدة وهيجازى كل واحد على حسب عملة
مرة تانية اشكرك حقيقى على محبتك وشعورك الجميل
ربنا موجود