[مايكل عبد الشهيد]

السلام لكم ((((احبائي واخوتي))))

طبعا انا باشكر كل الناس اللى سألت عليا فى فتره تعبي والظروف اللى مريت بيها الايام اللى فاتت

ياسلام على الاصحاب بجد حسسوني اني كنت وحش اوي

كام واحد تعب وانا ماسالتش عليه....

كام واحد كان واقع فى مشكله واما جه حكالى عنها بحسن نيه انا بدال ما اقف جنبه اتهربت منه وقولت انا مالى....

كام مره حد حطني فى موضع مسؤوليه وانا ماطلعتش قدها..

كام مره جم اسكندريه عندنا وانا قولت ياعم انا مالى مانا هاخرج معاهم الصبح اعملهم ايه انا....

كام مره اتعاملو معايه بمحبه خالصه وانا اتعملت معاهم بسوء نقدير وهما سامحوني وقالو طالما اننا بنحبه يبقي لازم نسامحه

كام مره اتقابلنا وكانو عارفين اني مش جاي عشانهم وضحكو وقالو المهم اننا شوفناه وخلاص عشان كان واحشنا.....

ولما بعدت وعرفو من غير ماحد يقولهم ولا شافو بعنيهم وسمعو اللى بيحصل معايه من غير ما احكي حتي و اقولهم اني تعبان ونفسيا مش مظبوط وبمر بظروف صعبه سألو عليا.... وحبو يطمنو مع اني عمري ماكنت انسان بيقدر الصداقه....

بجد بجد انا اسف ليهم على كل لحظه حد اتعامل معايه فيها بما يرضي الله .. زي مابيقولو كده ولاد البلد الاصحاب اللى بيقدرو اصحابهم ....

والغريبه اني كنت عاملها صحبيه نت بس ....

بس هما كانو بيقولو اننا طالما عاشرنا الشخص ده واتكلمنا مع بعض واعدنا معاه كتير خلاص المرحله بتاعه صداقه النت دي عدت وبقت صداقه حقيقيه....

طبعا انا ماستهلش منهم كل الحاجات الكويسه اللى هما عملوها معايه...

بس اعمل ايه بقي هما كان عندهم امل اني اتغير واحس ان معرفه الرجال كنوز بس للاسف....

مافيش احساس ولا تقدير ......عندي ياعني

واحب اهديهم شويه من اللحظات ...(اللى هي لحظات المحبه ياعني)

اهو اعتزر ليهم عن طريقها

اسف يا اعز وارجل واجدع اصحاب

وشكرا على ( محبتكم )

ملحوظه

الكلام اللى انا كاتبه ده عم ظريف وميكي مالهمش دعوه بيه

عم ظريف بعقله الكبير هايفهم المغزي من كلامي

وميكي لو زعل هافهمه اللى ممكن مايفهموش من الموضوع ده

2 - باشكر الانسه اللى جت عندنا اسكندريه واعدت تتغني بطباع اهلها اللى هما اهلى وعيلتي واصحابي

بالرغم من اني كنت المفروض اني اروح مناسبه عندها وانا فضلت اني اروح العزومات اللى هي مش هاروحها عشان ده واجب لازم اعمله تجاه عيلتي واهل اصحابي اللى بيقدروني وطبعا انا فضلت العزومات مش عشان ده واجب لاني لو بصيت لكده كنت المفروض اعمل الواجب لضيوفي اللى جايين فى بلدي بس اعمل ايه بقي ماهو

الاسكندراني معروف عنهم انهم ناس وحشين ومش بيقدرو الاصول والواجب

المصدر: †† ارثوذكس †† - من قسم: صندوق مناقشات الاعضاء

[MICKEY]

وميكي لو زعل هافهمه اللى ممكن مايفهموش من الموضوع ده

انا مش هرد علي الموضوع لحد مافهم منك كل حاجه زي مابتقول
وعلي فكرة انا مش ليا حق ازعل
انت جزمتك علي دماغي ياعم

[الناى الحزين]

حمدلله على سلامتك يا مايكل
واكيد محدش يزعل ابدا منك
لان الكل بيحبك وبيعزك
ربنا يفرح قلبك

[elphilasouf]

يا مايكل انا اشهد انك اجدع واحد مكن اشوفه فى اليكس
ويمكن اجدع واحد شوفته اصلا فى حياتى

واحنا فعلا اظاهر انا كلنا مقصرين معاك
بس يمكن احنا عندنا مشاغل شويه ونسينا ده كله
ونسينا كل الى كنت بتعمله معانا مع كل واحد جيه اليكس
ليك مخصوص او حتى مش عشانك اصلا

بس معلش
بحبك وقلبك الى ضيفتنا بيه فى اليكس
اعزرنا
وكل واحد فينا فيه الى مكفيه
ويمكن عندك حق تزعل
وكمان من حئك تعاتبنا
وده الصح
انت فعلا حاجه كبيره جدا احنا منستهلهاش

*بس ياريت تبقى تراجع رسايل الزوار بتحتك بتوريخها

[kamer14]

انا عارفه يامايكل احنا مقصرين معاك اوى وانت بجد اسكندرانى جدع اوى وبتحبنا جدا جدا جدا وفى منتهى الرجولة والشهامة وانت عارف ان كلنا بنحبك ياريت متزعلش من حد فينا كلنا هنا اخواتك

[bolalover]

مايكل عبد الشهيد

الراجل الاسكندراني

الي اعترف و اشهد قدام كل منتدي ارثوذوكس انه ارجل شخص عرفته من المنتدي
مش علشان خاطر الموضوع ده ولا علشان اطيب بخطره ولا علشان اي حاجه
بس ده علشان هو فعلا كده هو ده مايكل عبد الشهيد الي عاشرته
كلت معاه و شربت معاه و نمت معاه و خرجت معاه

عرفته بجد لو هو بيقول علي نفسه مش راجل معانا
انا بقول ارجل راجل في المنتدي شوفته
و المواقف دليل و تشهد علي كده
بننزل اليكس بيكون معانا باللحظة و الثانية
بسيب شغله و بنعمله مشاكل في الشغل بسببنا

مايكل انا الي اقولك اسف
انا الي اقولك اسف اوي يا صحبي
اسف اني قصرت في حقك و مكنتش بسئل عليك
انا مش فاهم الموضوع ده ليه ولا ايه الي حصل
بس انا جه عليا وقت كان عندي ظروف كتير
و مكنتش بسئل علي حد خالص
بس انت عارف اني لما بكون بحالتي الطبيعية بسئل عليك يا صحبي

بس برده سمحني اني مكنتش بسئل عليك في الفترة الي فاتت


مايكل عبد الشهيد ارجل راجل و اجدع صاحب كسبته من ارثوذوكس

[الماكس مايكل]

مايكل محدش زعلان منك
ده احنا اللى مقصدرين معاك ياباشا
ويارب متكونش زعلان من حد فينا
اولا واخيرا كلنا اخوات
وانت اجدع اسكندرانى عارفته
رجواله اوى وصحاب صحبه بجد
وانت عارف انامش محتاج اقولك الكلام ده
ربنا معاك يا مايكل ويسهلك كل امورك

[M!SS N@NO]

المشاركة الأصلية كتبت بواسطة مايكل عبد الشهيد 2 - باشكر الانسه اللى جت عندنا اسكندريه واعدت تتغني بطباع اهلها اللى هما اهلى وعيلتي واصحابي بالرغم من اني كنت المفروض اني اروح مناسبه عندها وانا فضلت اني اروح العزومات اللى هي مش هاروحها عشان ده واجب لازم اعمله تجاه عيلتي واهل اصحابي اللى بيقدروني وطبعا انا فضلت العزومات مش عشان ده واجب لاني لو بصيت لكده كنت المفروض اعمل الواجب لضيوفي اللى جايين فى بلدي بس اعمل ايه بقي ماهو الاسكندراني معروف عنهم انهم ناس وحشين ومش بيقدرو الاصول والواجب

ههههههههههههههههههههههههه ههه
هو الكلام مش متركب على بعضه
بس متهيألى ان الانسه دى تبقا انا
مممممممممممممممم
بص يا مايكل
انا هعزرك لانك متعرفنيش كويس
ولا فيه بينا كلام لا ع الميل ولا حتى ع المنتدى
بس هقولك حاجه واحده
اسال ايللى يعرفونى كويس
هيقولولك انى دايما بتريق عليهم وعلى بلدهم
اسال فيرونيكا قولها انا بقول ايه ع الاسكندرانيه
اسال بولا قولو انا بقول ايه ع الشراقوة
والفيلسوف والاسمعلاويه
وميكى والبدرشين وايللى بيجيلنا منها
بس هما بيتقبلوها بهزار ومحبه
ويمكن كمان بيتريقو عليا وعلى الحلوانيه
انا فعلا اتعاملت مع اسكندرانيه كتير
منهم ايللى طلع كويس
والاغلبيه طلعت ربنا مايوريك
وزى ماقولتلك فى الخروجه وانت كمان قولت كل بلد فيها وفيها
ماهى حلوان كمان فيها ناس ماتتعاشرش
وع فكرة انا اعرف جيوفانى من سنه تقريبا فى خروجه شهر مايو ايللى فات
وشوفتو اكتر من مرة
وقعدت قولتلو الكلام ده وغلست عليه كتير ع الميل
وهو كان بيهزر وبيقولى ده اكيد فيه حد اسكندرانى عمل فيكى مقلب خلاكى تقولى علينا كده
وحكالى على نصبايه حصلتلو فى شركه عندنا فى حلوان
وقالى انتو نصابين وحراميه
وكل ده عادى وهزار
يالهوووووووى انت شايل كل ده فى قلبك بقالك اسبوعين وساكت
مااحنا جينا فى الاخر وقولنا ان كل ده هزار وكله كان تمام

ع العموم يا سيدى حقك عليا
بس انت كده هتثبت الفكرة الطين ايللى فى دماغى عن الاسكندرانيه
ذنبك على جمبك

[مايكل عبد الشهيد]

المشاركة الأصلية كتبت بواسطة hanan sadeq ههههههههههههههههههههههههه ههه هو الكلام مش متركب على بعضه بس متهيألى ان الانسه دى تبقا انا مممممممممممممممم بص يا مايكل انا هعزرك لانك متعرفنيش كويس ولا فيه بينا كلام لا ع الميل ولا حتى ع المنتدى بس هقولك حاجه واحده اسال ايللى يعرفونى كويس هيقولولك انى دايما بتريق عليهم وعلى بلدهم اسال فيرونيكا قولها انا بقول ايه ع الاسكندرانيه

ياعني لو انا جيت مثلا وقولتلك ان حلوان مافيهاش راجل بهزار ياعني مش هاتزعلى؟؟؟




طيب انتي بنت هاتزعلى ليه ....لا لازم تزعلى لاني كده هابقي مش باقول عليكي انتي انا هابقي باقول على اي راجل قريب منك سواء قريبك او عزيز عليكي......





صح ولا انا غلطان فكونك عممتي كلامك ولو حتي بهزار انتي كلامك مش عليا بس لا دا انتي ومن غير قصد وبهزار غلطتي فيا وفي اهلى وفي مدينتي اللى عمري ماحسيت فى يوم ان فى مكان اروع منها ولا في ناس ارجل واجدع من اهلها...






((لأنك برضو عشان ماتعرفنيش ولا تعرفي انتي بتتعملي مع مين انا بقي اللى هاعزرك)))

وكفايه ان جدعنه شاب اسكندراني انه طلع نفسه غلطان وطلع فى نفسه صفات ابعد ماتكون عنه فى كل الكلام اللى كتبه فى الموضوع ده عشان حاجه واحده





عشان يعاتب ناس عزيزه عليه من غير ما يجرحهم





بس اقول ايه بقي معلش اصلي اسكندراني اتربيت على العشره والجدعنه اللى تمنعني من اني حتي اعتب على حد عزيز علي قلبي بطريقه تدايقه او تزعله حتي لو انا بعشم زعلان منه

[M!SS N@NO]

اسمحلى اقولك انت مكبر الموضوع اوى
وعامل مشكله من لا مشكله
وبتقول كلام على لسانى
انا مقولتش الكلام الكبير ده
انا لا كنت ماسكه فى خناقك ولا كنت بشخط وانطر
احنا كلنا كنا بنضحك واحنا بنتكلم
واولنا جيوفانى
ايللى هو من اسكندريه
لانه عارفنى كويس
وعارف انى بحب الهزار
وانا وهو ع الحال ده من سنه
هو يتريق ع الحلوانيه وانا اتريق ع الاسكندرانيه
ليه معملش زيك كده؟
اقولك ليه؟
ولا بلاش
الطيب احسن