[philolover]

جيفارا مات
جيفارا مات
آخر خبر فِ الراديوهات
و فِ الكنايس
و الجوامع
و فِ الحواري
و الشوارع
و عَ القهاوي و َ البارات
جيفارا مات
جيفارا مات
و اتمد حبل الداردشة و التعليقات
********
مات المناضل المثال
يا ميت خسارة عَ الرجال
مات الجدع فوق مدفعه جوّه الغابات
جسّد نضاله بمصرعه
و من سُكات
لا طبالين يفرقعوا
و لا اعلانات

• ********
  ما رأيكم دام عزكم
  يا انتيكات
  يا غرقانين
  فِ المأكولات و الملبوسات
  يا دفيانين
  و مولعين الدفايات
  يا محفلطين (1)
  يا ملمّعين يا جيمسنات
  يا بتوع نضال آخر زمن
  ف العوامات
  ما رأيكم دام عزّكم
  جيفارا مات
  لا طنطنة
  و لا شنشنة
  و لا إعلامات و استعلامات
  عيني عليه ساعة القضا
  من غير رفاقه تودّعه
  يطلع أنينه للفضا
  يزعق و لا مين يسمعه
  يمكن صرخ من الألم
  من لسعة النار فِ الحشا
  يمكن ضحك
  أو ابتسم
  أو ارتعش
  أو انتشى
  يمكن لفظ آخر نفس كلمة وداع
  لَجل الجياع (2)
  يمكن وصية للي حاضنين القضية
  بالصراع
  صور كتير ملو الخيال
  و ألف مليون إحتمال
  لكن أكيد و لا جدال
  جيفارا مات موتة رجال
  *******
• يا شغالين و محرومين
  يا مسلسلين (3)
  رجلين و راس
  خلاص خلاص
  مالكوش خلاص
  غير البنادق و الرصاص
  دا منطق العصر سعيد
  عصر الزنوج و الامريكان
  الكلمة للنار و الحديد
  و العدل أخرس أو جبان
  صرخة جيفارا يا عبيد
  في أي موطن أو مكان
  ما فيش بديل
  ما فبش مناص
  يا تجهّزو جيش الخلاص
  يا تقولو عَ العالم
  خلاص
• ♦♦♦♦♦♦♦♦♦♦♦♦♦♦♦♦♦♦♦♦

(1) محفلطين : متأنقين
(2) لجل : من أجل
(3) مسلسلين : مربوطين بالسلاسل

كلمات الشاعر :: احمد فؤاد نجم

المصدر: †† ارثوذكس †† - من قسم: القسم الادبي

[نبيل نصيف جرجس]

كلمات حلوة ربنا يباركك يا رب

[zaza2006]

شكرا على الكلمات الحلوة دى

[nana222]

ميرسى على الموضوع الرائع جدا جدا
ربنا يعوض تعب محبتك

[وردة حزينة]

الراجل ده انا بعشق اسلوبه فى الكتابه الساخره للى بيقول من وراها كتير
الف شكر ليك على الكلمات الحلوه ده

[philolover]

شكرا ليكم كلكوا علي كلامكم
الجميل ده

[مجنون كمبيوتر]

شكرا philolover تستحق التثبيت

[عماد حسنى]

كلمات حلوه اوى اوى لشاعر كبير زى احمد فواد نجم
شكرا ليك ياجميل

[philolover]

شكرا ليك استاذ عماد لردك
وشكرا ليك مجنون كمبيوتر