[bolalover]

سلام و نعمة لكل اعضاء منتدانا الغالي ارثوذوكس

كل عضو فيكم هيقراء الحلقة دي يركز كويس و يطرطق وداناته الاتنين
حلقة انهارده مفهاش اي تعصب ولا اي نصائح ولاكن فيها براءة الحمل الوديع
و جمال روح المحبة
معانا انهارده عضوة بجد و في راي الشخصي
تستحق ان تاخذ لقب
افضل عضوة علي مدار تاريخ ارثوذوكس
عضوة رغم صغر سنها و لكنها مبدعة
مبدعة في موضعاتها
مبدعة في بسمتها
تلقائية و بسيطة في حياتها
بنوته عندها 15 سنة بس قدرة تدخل وسطينا و تفرد سيطرتها و نفسها و يتعملها الف اعتبار
بجد انا بعزها جدااا و كنت اتمني يكون ليا اخت في البيت زيها
و هي صاحبت
16,271
مشاركة

kamer14

بولا : اهلا بيكي يا قمر 14 معانا انهارده في نأسف علي الازعاج يا ارثوذوكس

قمر : اهلا بيك يابولا

بولا : في البداية بنرحب بيكي و نقولك كل سنة و انتي طيبة
قمر : ونت طيب يا خويا ها خش فى التقيل

بولا : ياااه و انتي مستعجلة اوي ليه كده دا انتي هتكرهي نفسك دلوقتي .... طيب ادينا بطاقة التعارف بتاعتك يا قمر

قمر : هههههههههههههه ربنا يستر

بص ياسيدى باختصار شديد انا اسمى فيرونيكا
ودى عارفنها

ابلغ من العمر 15 سنه

عاوز ايه تانى ؟

بولا : يا سلام بس كده
في سنة كام طيب
قمر :كفايه عليكو
تالته اعدادى

بولا : اها طيب قمر 14 عندها 16239 مشاركة ... يخرب بيتك عملتيهم ازاي دول ولا امته ؟؟

قمر : ههههههههههههه اه دخلنا فى الحسد بقى وشغل القر عاااادى جدا انا اصلا فاتحه المنتدى ليل نهار وكنت بدخل على الالعاب كتير جدا جدا وبحط مواضيع
بولا : قمر 14 حياتها الطبيعة نت و بس ؟؟ يعني بتروحي كنيسة بتخرجي مع صحابك بتعملي ايه في اليوم الدراسي بتاعك و في اليوم العادي
قمر : اكيد مش نت بس جت عليا فتره الصيف ايلى فات كنت ليل نهار نت
بالنسبه لحياتى فاليوم الدراسى ممل وطويل ومعظمه بنام فيه
واكيد بخرج مع صحابى بس مش كتير والكنيسه مليش صحاب اوى هناك بس بروح
بولا : بتحبي المذكرة يا قمر ؟
قمر : بزمتك فى حد بيحب المزاكره اه طبعا بحبها كره العمى
اكيد لا
بولا : طيب و هتنجحي ازاي كده ؟؟ ولا بتعرفي تغشي في الامتحانات ؟؟
قمر :ههههههههه حد قالك انى مش بزاكر لابزاكر طبعا والغش كان فى سنوات النقل مناديل بقى وجومه وبلاوى انما السنة دى بلا قر ولاحسد ناويه اجيب مجموع
بولا : لو نجحتي بابا هيجبلك ايه ؟
قمر : لابتوب
بولا : يارب مش تنجحي ... طيب احكيلي علي موقف كده حصل ليكي في الفصل او المدرسة او اي حاجه بخصوص الدراسة ؟
قمر : هههههههه ياساتر
اممممممممم موقف مش عارفه الصراحه بس السنة اغلبها انى بنام فى الفصل وبيرمو عليا التباشير ووبيبقى منظر مضحك
بولا : امتحاناتك ابتدت ولا لسا ؟
قمر : ابتديت الانجليش يوم 10
انما الوزاره يوم 17
بولا : و بابا و ماما سيبينك كده قاعدة علي النت لحد الفجر ؟
قمر : لاده يوم اسثنائى وبعدين بتعلى صوتك ليه هووووش
بولا : ايه هما نايمين دلوقتي ؟؟ اكيد انتي قاعدة من وراهم صح
قمر : اه صح بس بقى عشان الفضايح
بولا : تيب .. قوليلي يا قمر بتحبي ارثوذوكس قد ايه و امته كرهتيه و كنتي عاوزه تبعدي عنه ؟
قمر : بحبه جداااااااا بس عمرى ماكرهته وفكرت ابعد عنه مفيش سبب خلينى ابعد مهما كانت قوته
بولا : قمر 14 بنت عسولة دمها خفيف لسانها طويل شكلها ملايكي الكل بحبها ... عمرك عملتي مشكلة مع حد في المنتدي قبل كده ؟
قمر : فى المنتدى جواه لا انما اكيد فى مشاكل بتحصل بس برة المنتدى
بولا : ايه هي كانت اكبر مشكلة قبلتك في حياتك عموما ؟؟
قمر :فى حياتى؟ اممممممممممم لامفيش كلها مشاكل عادية وبتعدى
بولا : مممم طيب تعالي معانا يا قمر لفقرة اسم واحد لكل مين ... اكيد عرفاها و فاهماها
قمر : اقول عيوب ومميزات العضو ايلى هتقوله باين صح؟
بولا : لالالالا دي فقرة تانية .. الفقرة دي هقوله مين كذا و انتي تقوليلي اسم عضو واحد بس
قمر : اه طيب
شكلك عاوزنى اخرج من المنتدى بجلاجل
بولا : مين تقوليله العب بعيد يا شاطر ؟
قمر : من اولها كده منك لله يابولا
بولا : هههههههه مليش دعوة لازم تقولي اسم حد
قمر : لالالا مفيش حد هقوله كدة
بولا : لا لازم يكون في حد مليش دعوة
قمر : ههههههههههه عاوز تخربها انا عارفه من الاول ان اليوم مش هيعدى
بولا : يالا انجزي
قمر :اقولهالك يالا بقى روح العب بعيد ياشاطر
بولا : مممممم بقا كده طيب استلقي وعدك مني بقا انتي الي جبتيه لنفسك
قمر : يامى يامى خفت وركبى بتخبط على الجيران
بولا : مين تقوليله مش عاوزة اشوف وشك تاني في المنتدي ؟؟ هههههههه يالا جوبي يا شاطرة
قمر : ههههههههههه بولا عاطف
وعارف لو دخلت المنتدى تانى يانا يااانتا
واستلقى وعدك بعد الحلقه
بولا : هههههههههههههه يا تيت عليا الطلاق لخليها حلقة سوده عليكي يا بنت عم 14
بولا : مين تقوليله شكرا بجد
قمر : اقولها لابو الارفيت
بولا : مين اول بنت اتعرفتي عليها من علي المنتدي ؟
قمر : rose
بولا : و مين اول ولد ؟
قمر :سيادتك
بولا : كانت معرفة سوده يالا ما علينا ... طيب مين تقوليله اسفة ؟
قمر : هههههههههههه حسابك معايا بعدين
اسفه اممممممممم لامش لحد
بولا : طيب مين تقوليله ارجع ؟
قمر :اممممممممممممم هى كانت لحنان بس حنان رجعت خلاص
بولا : مين اقرب بنت ليكي في المنتدي حاليا ؟
قمر : حنان صادق
بولا :مين يا قمر بتروحليه ديما لما يحصل ليكي مشكلة في المنتدي ؟ او مشكلة عموما
قمر : عموما انا مش بحكى مشاكلى لحد خالص بكتمها فى نفسى واحلها لوحدى مش بحب احكى لحد
بولا : طيب يعني مفيش حد بتعيني اسرارك معاه خالص
قمر : اعين؟ لا مفيش اكيد الا ربنا
بولا : طيب يا قمر تعالي معانا لاسئلة الحوار العادي .. هنحطك في موقف و انتي تقولينا تعملي ايه فيه
قمر : هيا بنا
بولا : عضو من المنتدي عنده 30 سنة و جه قالك انتي بنت زي العسل و جميلة جداا و لذيذة اوي و انا نفسي اتجوز واحدة ذيك و هو عارف انك عندك 15 سنة و قالك عنونكم ايه علشان اجي اطلبك من بابا ... هتقوليله ايه ؟؟
قمر :هقوله يفتح الله ايه مجنون ده ولاايه
بولا : ههههههههههههههه الله في ايه يا قمر الراجل بيتكلم جد هترفضيه ؟
قمر : هههههههههه طبعا هرفضه
بولا : هههههههههه طيب يا ست قمر لو مثلا مثلا يعني عرفتي ان في مشكلة بين اتنين و انتي بتعزي الاتنين دول اوي هتحولي تحليها ولا هتقولي لا مليش دعوة ؟ و الاجابة تكون اه هحاول احلها او لا مليش دعوة بس
قمر : اه هحاول احلها
بولا : طبعا انتي قريتي حلقات نأسف علي الازعاج الي فاتت و عرفتي ان كان في مشاكل ليه مكنش بيبقا فيه ليكي اي ردود او اي مشاركات في الموضوع ؟؟
قمر :مكنتش بلاقى حاجه اقولها ومش بحب ادخل فى المشاكل والحوارات دى بس انا مثلا بدخل اقدم شكر واطلع
بولا : ايه رايك في المنتدي الايام دي يا قمر ؟
قمر : هو زادت المشاكل اوى فى الفتره الاخيره وتحس ان كله مستنى اى مشكله للتانى ويتكلم عليها وبيكبرو المشاكل اوى تحس ان المحبه والتعاون بتوع زمان قلو شوية
بولا : طيب دلوقتي يا قمر بعد دخول 2009 مش تفتكري ان الدنيا بقت هادية شوية و كله اتصافي و بقا رايق ولا ايه ؟
قمر :اه الحمدالله حصل تحسن كتير
بولا : لو اتعمل خروجة تاني في اليكس يا قمر هتيجي ؟؟ و لو جيتي هتكوني خايفة زي الخروجة الي فاتت كده هههههههه؟؟
قمر : ههههههههههه احم احم ليه الاحراج ده
اه هاجى اكيد
واكيد مش هبقى زى اول مرة ومتنساش ان مكنش فى بنات غيرى
بولا : طيب ليكي انتي بس و متعرفيش حد من الاعضاء خالص يا بت .. هنجلكم في اول شهر 2 الي جاي و هنعمل خروجة في اجازة نص السنة في اليكس
كتمي علي الخبر بقا
قمر :هههههههههههههه اوك تنوروا
بولا : نفسك تشوفي مين من الاعضاء يا قمر ؟ قمر : نفسى اشوفكو كلكم بجد
ونفسى اشوف حنان وروز
بولا : طيب يا قمر تعالي معانا لفقرة 4 سلبيات و 4 ايجابيات و دي الي انتي كان قصدك عليها في الاول
نبتدي ؟
قمر :اوك
بولا : رافت شكر ؟
قمر : هما لازم اربعه كفايه واحد هو انا هكتب قصيدة شعر
بولا : هههههههه لا يا اختي لازم 4 و 4 هي رخامة
قمر : اولا رافت انسان طيب جدااااااااا جدااااا وبيحب المنتدى واعضائه جدا وبسيط جدا ودمه خفيف جدا
السلبيات امممممممممممم لامفيش
لامش اربعه ليه بقى هو موضوع انشا
بولا : مليش دعوة هو نظام البرنامج كده الله
و لازم تطلعي سلبيات في العضو
قمر : النظام ده بله واشرب ميته
بولا : بت انتي مش تقرفيني خلي الحلقة تعدي علي خير و اسمعي الكلام لاما هجبلك الخرزانة
قمر : هههههههههههههه بلطجه بقى ولاايه لاهو كده اخرى كدة
بولا :عند تيته الكلام هنا احنا في برنامج محترم و البث مباشر يعني تنجزي في الحوار علشان ننام في يومك الي مش فايت ده
قولي اربع سلبيات في رافت يالا
قمر : يالهوى اربعه سلبيات مش لاقيه طب اعمل ايه اخترع؟
اجيب من عند ماما؟
طب ثوانى انزل اشترى من تحت البيت فى عندنا واحد بيبع سلبييتين وعليعهم اتنين هديه
بولا : مليش دعوة ماما بابا المهم تجيبي
هي رخامة بقا و قفلت في دماغي تطلعي في رافت بالذات 4 سلبيات مليش دعوة
قمر :طب انا اعملك ايه اجيب منين
بولا : اتصرفي ... مش الجيش قالك اتصرفي
قمر :ههههههههههه
متبقاش كده وحول على ايه بعده
عاوزيين نينام
بولا :و رحمة ابويا الي السنوية بتاعته الشهر ده يا قمر ما هعديها غير لما تقولي اربع سلبيات في رافت
قمر :ههههههههههههه يالهوى عليك
بولا :قولي 4 سلبيات في رافت و انا اخليلك كل عضو بعد كده سلبية واحدة و اجابية واحدة
قمر : طب ورحمه الغاليه ايلى معرفش هى مين مانا قايلة هة
بولا :انا حلفت قبلك قولي و انجزي
قمر : طب اقول ايه طيييييييييب؟ مفيييييييييش
بولا : مليش دعوة و يالا علشان وقت البرنامج يا فندم
قمر : امممممممممم
ابقى صوم تلات ايام واقلب على ايلى بعده
بولا :قولنا مفيش هزار انا حلفت انجزي بقا و مش تبقي مملة كده الفي اي حاجه يالا
قمر : مش حرام التلفيق
رافت امممممممممممممم مفهوش مفهوش مفهوش مفهوش اهم الاربعه يالا ابسط
بولا : حسبي الله و نعمة الوكيل فيكي يا بعيدة
انا هعديها بس بمزاجي و علي فكرة انتي اول واحدة تقع تحت ايدي و معرفش اخد منها ولا حق ولا باطل يا بعيدة
قمر : هههههههههههههههه طيب خش في الي بعدي و ارحم اهلي
بولا : الناي الحزين ؟
قمر : الناى الايجابيات طيييييييييب جدا جدا ودمه خفييييييييف جدااااااااااا واجتماعى ومحترم وزوق جدا
السلبيات اممممممممممم انه صعيدى ودول كده مش اربعه لا ده موال لوحده
بولا : ههههههههههههه طيب جاسيكا
قمر : جاسيكا انا معرفتى بيها من المنتدى بس يعنى سطحيه او شبه سطحيه بس هى بنوتة عسوله اوى اوى ودمها خفيف ونفسها تبقى مضيفه هههههههه
السلبيات معرفش مشوفتش بعينى حاجة لان المعرفه مش عميقه اوى
بولا : ميكي ؟؟
قمر :ههههههههههههههه
لاده لسبيات بس مفيش ايجابيات
بولا : ههههههههه طيب قولي
قمر :بص ياسيدى
ميكى بالنسبه لايجابياته دمه خفييييييييييييييف جدا جدا واجتماعى
السلبيات بقى انه تيت وتوت وتربتيت
بولا : هههههههههه طيب بولا لافر
قمر : ههههههههههههه ده اركنه على جنب ده عاوز مجلد
بولا : ههههههههههه مجلد سلبيات ولا ايجابيات يا بت
قمر : هههههههههههههههه ايجابيات طبعا .............. سامحنى يارب
بولا : طيب قولي الي عندك و اخلصي
قمر : الايجابيات زكى جدااااا يقلب على لئم كده ههههههههه ومخه شغال وطيب ودمه خفيف
السلبيات محوراتى كده ويتوهك فى الكلام باختصار يوديك البحر ويرجعك عطشان
بولا : ههههههههههههه حسبي الله و نعمة الوكيل فيكي يا فيكي
قمر : هههههههههههههه
الصراحه فوق كل شئ
ماكفايه بقى نتفنا فى ريش الناس
بولا : طيب تعالي معانا لاسئلة الحوار العادي .. و نزنقك شوية في الكلام
قمر : حسبى الله ونعم الوكيل
هيجليك يوم وتتزنق
بولا : قمر 14 بنوته لسا صغيرة عندها 15 سنة بس عليها عقلية و تفكير يفوق الـ 20 عاما ... لما حد يجي يقولك ملكيش دعوة انتي لسا صغيرة ايه الي دخلك ؟؟ بيكون رد فعلك ايه ؟
قمر : الموضوع ده بيعصبنى اوىىىىىىىىىى بيحسسونى انى مثلا نونو صغير ماسكه المصاصه بحكايه لسه صغيره دى
بزعل اكيد
بولا : طيب سؤال و تجوبي بكل صراحة و ربنا يشهد عليكي ؟؟ انتي لسا بتشتري مصاصات ؟؟
قمر : ههههههههههههههه اه
بس بينى وبينك
بولا : هههههههههه عادي عادي ما انا كمان لسا بجيب مصاصات بس بيني و بينك برده هي طعمها حلوة اوي و بتبقا مزه
قمر : هههههههههههههههه طب الحمدالله مش انا وحدى
بولا : طموحاتك ايه لمستقبلك يا قمر .. يعني نفسك تبقي ايه في المستقبل ؟
قمر : هههههههههه هقول بس بلاش تريقة نفسى بصراحه اطلع الفضاء واجيب تليسكوب واشوف النجوم والكواكب والحاجات دى واعمل ابحاث فى المجال ده
على الله حد يتريق
بولا : بصي يا قمر انتي لو ختيها جد و حطيتي الهدف ده قدامك و صممتي علي تحقيقه اكيد مش هتوصلي الفضائيات بس لا انتي ممكن توصلي للمصرية و الحياة و القناة الاولي كمان
قمر : هههههههههههههههه ايوه اتريق اتريق بكره تشوفونى فى التليفزيون والجرايد اكيد مش الجرايم
بولا : هههههههههه طيب يا قمر انتي الشخص الوحيد الي ابصم بالعشرة و علي رقبتي انك بتحبي ارثوذوكس من كل قلبك لصفاء و نية قلبك ... نفسك ايه يكون موجود في ارثوذوكس مش موجود دلوقتي ؟؟
قمر : مش عارفه مفيش حاجه فى مخى دلوقتى بس نفسى ارثوزكس يرجع زى زمان
بولا : امنيه بنتمناها كلنا يا قمر هي رجوع ارثوذوكس زي زمان بروح المحبة الكبيرة ... تقولي ايه لاعضاء المنتدي كلهم يا قمر في نهاية الحلقة ؟؟
قمر : اقلهم بحبكم اوى اوى ومقدرش استغنى عنكم وخليهم كلهم بقى يصلولى عشان الامتحانات على الابواب وهى تقريبا كسرت الابواب ودخلت
بولا : قمر احنا اخوات اكيد و انتي بتعزيني .. ليكي 3 اسئلة تسئليهم ليا .. بس طبعا انتي عندك امتحانات و مذكرة و يادوبك تقومي تذكري علشان مش تلحقي تسقطي يا حلوة .. مش صح كده
قمر : ههههههههههههههههه اه على التلات اسئله وهتفلسع
هو انا اه ورايا مزاكره
وحظك حلو انى مش محضرالك اسئله مش كنت تقول كنت انا جهزتلك شويه فى مخى
بولا :طيب كويس اول ضيف يكون متعاون معايا و ميسئلش التلت اسئلة بتعوته ليا

قمر : هههههههههههههههه لو عايزنى اسال اسال انتا تؤمر

بولا : نشكرك جدااا يا قمر علي تعاونك الجميل و بجد انا كنت سعيد باللقاء معاكي و بامانة و اشادة مني انا بولا عاطف .. انتي افضل عضوة في ارثوذوكس علي الاطلاق و بلا منازع و ده راي الشخصي

قمر :ياسلام ياسلام ميرسى بجد يابولا وميرسى انك اخترتنى حلقه البرنامج النهاردة وربنا معاك


عاوز اقولكم اني بجد استمتعت جدااا بالحوار ده

و متستغربوش من بساطة الاسئلة

العضوة هي الي اجبرتني ان الحلقة تكون بسيطة كده
لان هي بطبعها انسانة بسيطة عسولة صغننة
ملهاش في مشاكل و الي في قلبها علي لسانها
ولا بتنافق ولا بتجامل و زي القمر
ما هي قمر 14

يارب حلقة انهارده تكون عجبتكم
و نالت استحسان الجميع
و يارب ميطلعليش حد في البخت و يشلني اي اوفة


نأسف علي الازعاج يا ارثوذوكس

بناءو ليسهدام

انتظرونا مع ضيف جديد
و لاكن بعد ما اخلص امتحانات يا حلوين
و البرامج بتاعتي كلها هتتوقف في خلال فترة امتحاناتي بمعاد برنامج
WeeKenD

كل سنة و انتم طيبين
اطيب امنياتي بسنة سعيدة و الي عنده امتحانات ربنا يوفقه و اولهم قمر
و صلولنا كتير في امتحاناتنا

شكر خاص
فريق اللهو الخفي

كان معكم من استديوهات ارثوذوكس
بولا عاطف

المصدر: †† ارثوذكس †† - من قسم: البرامج والخروجات الخاصة بالاعضاء

[الماكس مايكل]

ههههههههههههههههههههههههه ههه
بجد يا بولا حلقه جاااااامده
بجد عسل جدا شكرا ليك ياباشا وشكرا
لقمر طبعا بجد حلقه حلوه اوى
ربنا يفرح قلبكم

[بنت الراعي]

ههههههههههههههههههههههههه
دمها زي العسل البت قمر دي
هههههههههه انا كمان استمتعت بالحلقه علي فكره
ربنا يكون معاكي يا قمر وتطلعي عالمة فضاء وفلك والحاجات الغريبه اللي حباها دي
وربنا معاك يا بولا في امتحاناتك
ميرسي علي الحلقه
ربنا يعوضكم ويفرح قلوبكم

[M!SS N@NO]

ههههههههههههههههههههههههه ههههههههههههههههههه
ههههههههههههههههههههههههه ههههههههههههههه
ههههههههههههههههههههههههه هههههههههههه
حلقه زى العثثثثثثثثثثثثثثثل
بجد هلكتنى من الضحك
البت دى كارثه فعلا
وانا بموت فيها وبحبها من قلبى
ميرسى يا بولا ع الحلقه اللذيذه دى
بجد امتعتونا
انتو الاتنين تحفه
ميرسى كتير ليكو
وفى انتظار باقى الحلقات
بعد الامتحانات انشالله
ربنا معاك انت وفيكى وكل ايللى بيمتحنو

[sawsaw]

ميرسى كتير على الحوار مع روح قلبى قمر
وقومى يا حلوه زاكرى
والحاجات دى كبيره عليكى انتى لسه صغنونه
ههههههههههههههههههههههههه ههههه
فرقعى من الغيظ
لا ميرسى بجد وللمزيع بتاعنا
وانت كمان قوم يا حلو زاكر

[ماروجيرافك]

الله عليك يا بولا بجد انت استاذ
وحقي انا استمتعت بحوارك مع قمر المنتدي
مع اني الاول مكنتش مصدق انها عندها 15 سنه لان بجد تفكرها ومواضعها اكبر من سننا
واحب اقولك زي بولا لو حطيت الهدف قدامك مسيرك تطلعي المريخ
ربنا معلكي في مذاكرتك وامتحانتك
ومعاك يا بولا في مواضيعك الشيقه

[bolalover]

شكرا ليكم كلكم علي ردودكم
و متابعتكم المستمرة لحلقات البرنامج
و يارب نكون ديما عند حسن ظنكم

[miso]

ههههههههههههههههههههههههه ه عسل يا قمر
دمك خفيف وباين فردودك الجميلة دى

[@M@R!N]

لولووللولوولوي
هههههههههههههههههه
مع اني مستمعه بس للبرنامج ده
بس قمر دي حبيبتنااااا
ولازم ادخل اقولها انها بنوته فله بجد
والاسئله جميله اوي يا بولا وردودها اجمللللل
ميرسي ليك يا بولا

[عماد حسنى]

حلقه جميله جدا جدا يا بولا وحوار زى العسل مع عضوه زى العسل
شكرا جدا ليك على الحلقه وشكرا جدا جدا للقمر قمر 14 على حوارها الحلو اوى ده
وربنا معاها فى امتحانتها ومعاك ومع كل اولاده اللى فى امتحانات