[عماد حسنى]

أنا مين !!

مهما الجراح . بتعيش . بتاخد وقتها
والليالى . بتلف وتدور . وزى بعضها
حتى اللى جاى . مش فارق عن اللى راح
كل حاجه عادى . ماهو مش بإيدى خسرتها


مش هسأل (ليه) وكلمه (ليه) مش هلاقى ردها
بس هاصرخ .. هاعلن ليك للعالم والدنيا كلها


انا مين ؟؟؟ انا مين !!
انا مشاعر محكوم عليها تتعدم ومش ذنبها
لحظه أمل قبل ما تتولد بتموت جنين فى وقتها


انا علامات الدنيا بكل مرارها وذلها
أيام ودموع وذكرى كانت وعشتها


انا معادله الزمن بيعقدها مش بيحلها
رحله مجهوله لا عارف قربها ولا بعدها


انا النهايه لكل بدايه أتعبلها
والنهايه لكل بدايه احلملها


انا صدى صوت لا بيتسمع ولا بيتشاف
أحساس كلمات بتموت تتحس مش بتتعاش


انا الباكى فى سهر الليل الحزين
ولعبه لتضحيه كدبتها السنين


انا المجروح اللى ابداً مابيتعلم
والجرح الكبير المحفور اوى ومعلم


انا الرفض المحتم الرفض من غير مابتكلم
القلب اللى عايش .. بينبض علشان يتألم


انا عده تجارب نتايجها العذاب
نقطه ضعف فى قلب كان وداب


مش هسأل (ليه) وكلمه (ليه) مش هلاقى ردها
مش محتاج أجابه لان الاجابه عندى كلها


عرفتى يا حبيبتى انتى ليه سبتينى
عرفتى ليه مش بأديكى بعتينى
عرفتى أد ايه انتى غاليه عاليا
وعرفتى أن مفيش أدك جرّح فيّا


سيبك من بحر الحنان
سيبك من كانا وكان
سيبك من الحب اللى أديته
سيبك من الشوق اللى راعيته
سيبك من عشرتنا الطويله
سيبك من دموع كل ليله


اجرحى تانى مايهمكيش اجرحينى
مانا مستنى بأديكى تدبحينى

دى نهايه طبيعيه مش مؤلمه
تعمل أيه الجروح لروح ميته ومستسلمه

المصدر: †† ارثوذكس †† - من قسم: القسم الادبي