[عماد حسنى]

حوار مع الكنيسة
يا كنيستى صلى



صليتلك وبصليلك وهاصليلك
بس مين يصليلنا ..أنتى ولا أحنا !!
ندآااارى فيكى ولا نداريكى .. بس مش نقصد نخبيكى
أو حتى نحميكى
هو أنتى مين ع الارض يقدر يأذيكى
دانتى وأخده أعظم وعـــد
ان أبواب الجيم لن تقوى عليكى ..

صليتلك وبصليلك وهاصليلك
بس مين يصليلنا أنتى ولا أحنا !!
تندهيلنا ولا نجيلك .. تشكيلنا ولا نشكيلك
محتاجة حضن أبنك حضن بنتك .. ولا أنتى اللى تحضنينا
محتاجة نبقى جمبك . طب مانتى صخرة واحنا ف قلبك
كل محاولة من عدوك .. أى ضربة بتبقى ضدك
بتضعفه وتقويكى .. بتسحقه وتعليكى .

صليتلك وبصليلك وهاصليلك
بس مين يصليلنا أنتى ولا أحنا !!
أحنا اللى نبطل نجرحك .. ولا أنتى اللى تسامحينا
نقف حواليكى نطمنك .. ولا أنتى تريحينا
دايماً قوية بتتحملى حروب العالم حوالينا
وفاتحة بيبانك بتستقبلى كل الضعف اللى مالينا
طبيعى يا كنيستى تتألمى .. بس مش طبيعى يبقى من حد فينا
ألمك لما يبقى مننا .. ده شىء صعب علينا
مش عارف أقولك اتحملى
ولا أقولك اتحملينا !!!
صدقينى الكل بيحبك
وعارف مكانه فى قلبك
محدش أبداً يقصد يضايقك ..
بس انا من اللى بيخافوا عليكى .. زى كل ولادك بدماهم يفدوكى
مع ان الهك عندهُ جنود .. فى السما ملهاش أى حدود
كلى القدرة بسلطانهُ بيحميكى .. انا اللى من ضعفى بقلق عليكى .

صليلتلك وبصليلك وهاصليلك
بس مين يصليلنا أنتى ولا أحنا !!
نبكيكى ولا تبكينا .. نعزيكى ولا عزاءنا منك الينا
عارفك مش ناسية ولا يوم أحنا ناسينا
ولادك اللى ضحوا واللى خدموا
واللى على دماهم بقيتى سفينة
الرمز بيقول .. انك سفينة
والوعد بيأكد .. أنك حصينة
والماضى بيحكى .. أنك أمينة
والحاضر شايفك .. صامدة ومتينة
والمستقبل بكره كاتب ........
أنك منتصرة وده اللى يكفينا.

صليتلك وباصليلك وهاصليلك
بس مين يصليلنا أنتى ولا أحنا !!
نصلى لأبائنا الرهبان وامهاتنا الرهبات
ولا هما يصلولنا للجاى واللى فات
نصلى لأباهتنا الكهنه والمتوحدين
ولا هما يذكرونا فى صلواتهم كل حين
نصلى لقديسينا فى كل مديحه
ولا هما يشفعولنا مع كل ذبيحة
ولا أحنا وأنتى وكل الشعب
نصلى للبابا شنوده بجد

محتاجين صلاه مع كل آه
خارجه م القلب تطلب نجاه
نجاه من نفوسنا من شرور عايشه جوانا .
نجاه من حواسنا من طباع بقت سكنانا .
نجاه من عالم عايش فينا وبقى علينا .
نجاه من محنة نجاه من ضيقه فيها بقينا .
نجاه من شر بقى محاوطنا بيطولنا ويأذينا .

يا كنيستى صلى وأذكرينا
لو حد ناسى فاكرينا
أصل اللى خايف والقلقان واللى ناسى وعد الامان
ده يسوع قالهالنا زمان
ها انا معكم كل الأيام

يا كنيستى بدمعى ودمى بدميكى
وحياتى هاعيشها واموتها فيكى
ربنا يحافظ علينا وعليكى
اصلك ياكنيستى مش فى أيد الناس
انتى فى أيد رب الخلاص

_____________


عماد حسنى
27-2-2011

المصدر: †† ارثوذكس †† - من قسم: القسم الادبي