كان راهبا يسمي الأنبا يعقوب ساكنا في منطقة القلالي بالاسقيط و كان متضعا و محبا للصلاة و في أيامة كانت توجد كنيسة للأرثوذكسيين المستقيمي الرأي و كنيسة أخري للتابعين لبدعة اوطاخي..و لأجل قداسته كان محبوبا من الجميع كان التابعين للكنيسة الأرثوذكسية يشجعونه علي الحضور معهم وعدم الذهاب للأوطاخيين ..أما كنيسة الأوطاخيين فيحاولون جذبه اليهم و يتهمون الكنيسة الأرثوذكسية بأنهم تابعون لبدعة نسطور ...
لما تحير الأب يعقوب أغلق علي نفسه مغارته و أخذ يصلي و هو صائم لمدة 40 يوما و كانت أفكار الشياطين تحاربه ..أما هو فثابر علي الصلاة و بعد ذلك خرج من مغارته فظهر له السيد المسيح في شكل ولد نوراني و قال له :"لماذا أنت حائر ؟..فقال الي أي الكنيستين أذهب ؟.." فقال له :" الي الكنيسة الأرثوذكسية ." و في الحال حمله روح الله فوجد نفسه أمام باب الكنيسة الأرثوذكسية ..
حبايب المسيح
كتير أوي في حاجات بتبقي محيرة لينا و خاصة من جهة التعليم ..هتروح لأي مكان أو هتستقبل مين في بيتك ؟؟؟..هل في كنيستك اللي اتعودت عليها و لا في اجتماعات و وعظات تشعر انها مفيدة لك ؟؟
للأسف دلوقتي بدأت ناس كتيرة تضللنا و بدأنا نشرد عن الايمان الصحيح يمكن لما نسمع عن السبتيين و شهود يهوه و كنيسة القديس أثناسيوس الرسولي لأتباع مكسيموس و اللي كل الطوائف اقروا انهم مش مسيحين لأجل ايمانهم الخطأ ......نقول يستحيل اننا ننضم للناس دي ..طيب ليه فيه ناس بتضل و اتباعهم بقوا كتار ؟؟..ساعات كتير بنحتار ..و بنتعب ......
و مهما علت مكانتنا الروحية الشيطان ممكن يتعبنا و يحيرنا لكن وقتها نلجأ لربنا ..... فلو مريت بلحظة الشك دي اعمل زي الراهب ده
افتكرت في اللحظة دي شعر قداسة البابا اللي بيقول
ايها الحائر يا من تهت في فكر عميق .....تسأل الناس و تشكو صارخا أين الطريق؟
هل وجدت الحل يا مسكين و القلب الشفيق؟هل ازال الناس ما عندك من هم و ضيق؟
يا صديقي سوف لا يجديك في الدنيا صديق
ليس عند الناس رأي ثابت شاف يليق .....فحلول لفريق ضد أخري لفريق
انما عندي علاج قد خبرناه جميعا ...
اغلق الباب و حاجج في دجي الليل يسوع ...و املأ الليل صلاة و صراعا و دموعا
يمكن نسأل ناس كتير ..بالرغم ان مشورة الناس و خاصة الحكماء حاجة جميلة لكن مايكونش كل اعتمادنا علي أراءهم ..لأن الشيطان ممكن يستخدمهم ..ياريت نتعلم ندخل لمخدع الصلاة و نكلم ربنا و نثابر في الصلاة و نعضدها بالأصوام و الميطانيات ..عارفين مشكلتنا الكبيرة ايه ..اننا بنصلي يوم و التاني بكل حرارة ..و بعدين نقول ربنا ماردش علينا ..ربنا سايبنا محتارين ..أو ناخد اول كلمة من اول انسان نشوفه ان هو ده اللي ربنا عايز يقولهولنا ..الحكاية محتاجة مثابرة في الصلاة ..مانيأسش و صدقوني ربنا لما هيشوف صبرنا و مثابرتنا في الصلاة و اننا بنجاهد علشان تعرف مشيئته و ارادته ..عمره ما هيسيبنا محتارين
و ربنا اللي وعد ..أمين انه يحقق كل وعوده ..
(في الضيق دعوت فنجيتك استجبتك في ستر الرعد ) ( مز 81 :7 )
و صدقوني دي بتبقي احلي فرصة ان يكون لينا علاقة و عشرة حيه مع ربنا لما نحتار ...و نصلي لربنا بمثابرة ..و نشوف قد ايه بيتمجد معانا بعد كده ....لأنك عمرك ما هتعرف ربنا غير لما يكون ليك مواقف و علاقة شخصية معاه ..حتي لو سمعت كل الوعظات و قريت كل الكتب عمر ما هيبقي عندك علاقة بجد بربنا غير لما تختبره في وقت ضيقك ..حيرتك ..تعبك ....
يللا جرب ..لو كنت محتار أو خايف او في ضيقة ..و اختبر محبة ربنا الجميلة
و ماننساااااا ش و احنا بنصلي ..نصلي لأجل كل اللي طلبوا منا اننا نذكرهم في صلواتنا اللي بنرفعها قدام عرش النعمة ...علشان ربنا يرفع عنهم كل حزن و يسندهم في كل ضيفة و يشفي امراضهم ...يللا نصلي كلنا لأجل بعض زي ما انجيلنا قال (( صلوا بعضكم لأجل بعض .)
و احنا واثقين و كلنا ايمان ان ربنا هيستجيب لنا ...زي ما الأربعة رجال اتشفعوا من أجل المفلوج و يسوع شفاه ( لما نظر ايمانهم ) (مر 9 : 23 ) ...
ماتقولش صلاتي هتعمل ايه يعني ..لأ صدقني قادرة تحرك الجبال بس صلي و خلي عندك ثقة ...
ياريت تجيب ورقة صغيرة و تكتب فيها اسماء كل اللي طالبين صلاتك ...و تذكرهم في صلاتك أو تصلي كل يوم في صلاتك و تقول........
( يارب أولادك في المنتدى اللي طالبين صلاة ..ان كانوا طالبين شفاء أو تعزية أو معونة أو نجاح أو صبر في الشدة أو أطفال..احنا واثقين يارب انك تقدر تحقق لهم طلباتهم ان كانت حسب ارادتك ..,,و ان كانت بغير ارادتك ..أعطيهم الصبر و ارشدهم لطريق ارادتك .و اكشف ليهم عن تدبيرك لخطة حياتهم)
و لا تنسوا الصـلاة لأجل نجــاح و استمراريـة الخدمــــة
مشاهدة صفحة طباعة الموضوع
أرسل هذا الموضوع إلى صديق
الراهب الحائر
رد: الراهب الحائر
المواضيع المتشابهه
العرض العادي
