مساء الخير .......... انا ده اول موضوع ليا في منتدي ارثوذوكس
حبيت اضيف الموضوع بمناسبة ان انهاردة ميعاد ظهور اللوتري
انا هابتدي معاكم من بعد الجواب التاني (علي فكرة سمعت ان خلاص موضوع الجوابات ده اتلغي وبقي كله من علي النت ) عامة خلينا نبتدي ان خلاص جالك ميعاد المقابلة هاتعمل ايه:
1-هاتحضر الاوراق دي (ليك وللي هايدخل معاك المقابلة):
أ-جواز السفر وصورته
ب-اخر مؤهل (اصل +صورة +ترجمة)
ج-شهادة ميلادك (اصل +صورة +ترجمة )
د-فيش وتشبيه (أصل +صورة +ترجمة )
هـ- شهادة الجيش للذكور (أصل +صورة +ترجمة )
و - الكشف الطبي هايبقي مظروف مغلق اياك تفتحه
ز - وعقد الجواز (أصل +صورة +ترجمة )
ح - وتاخد معاك 819$ دولار لكل فرد
ط - شهادة تحركات (أصل +صورة +ترجمة )
ي -الجواب التاني اللي اتحدد فيه ميعاد المقابلة
ق - صورتين حديثتين 5*5 بخلفية بيضاء يظهر فيها الوجة والاذنين والاكتاف
بعد ماتظبط ده كله هاتحطهم في فولدرات كل شخص بمفرده
ماتنساش الترجمة لازم تكون من عند مكتب معتمد (لو دخلت علي سايت السفارة هاتلاقي قائمة بالمكاتب المعتمدة ) بالنسبة للي من المنيا ومراكزها انا برشح الحاج راشد بسمالوط معروف وترجمته كويسة جدا
هاتاخد الحاجات دي وتروح علي السفارة يوم المقابلة وتكون هناك من الساعة 6.30 صباحا بالنسبة للي مقابلاتهم 7.30 او عامة قبل المقابلة بساعة
هاتقف قدام السفارة وشوية هايقولوكم اقفوا طابور وهايبقي عندهم اسماؤكم ويدخلوكم واحد واحد علي حسب نوع الفيزا اللي انت داخل عليها وبعد كده هاتمر بخمس مراحل:
1-امن البوابة ( هاياخد منك الموبيل ويديك رقم)
وبعد ماتدخل هاتقعدوا علي كراسي وتدخلوا بالترتيب
2-هاتدخل تاخد رقم وتستني وهاينادو علي رقمك ورقم الشباك اللي هاتروح عليه هاتقال فيه السكرتارية اللي هاتاخد منك الورق(خلي بالك دي اهم حد في المقابلة لانها اللي ممكن تشك ان في ورقة مزورة او غلط حاول تبقي واثق من نفسك قدامها وجوابك جاهز) ودي اللي هايكلمها اللي الورق الاصلي معمول باسمه مش اي حد تاني الا لما هيا تساله
3-لو خلصت مع السكرتارية دي هاتقولك روح ادفع هاتروح تدفع 819 دولار لكل فرد
4- بعد ما بتدفع بتقعد مكانك علي ما ينادولك تاني وممكن يظهر رقمك علي اللوحة ولما بيظهر او بنادولك هاتروح تبصم انت واللي معاك
5- بعد كده هاتستني تاني وهاينادوا عليك او يظهر رقمك برضه علشان تقابل القنصل هايسألك شوية أسئلة زي دي :
* رايح عند مين في امريكا وبيشتغل ايه الشخص ده وفين
*وممكن يسالك طيب هو متجوز ؟ عنده اولاد؟؟ واخر مرة نزل مصر امتي
*هايقولك برضه رايح امريكا ليه ( قوله رايح ادرس واشتغل ) او اي اجابة مقنعه زي مثلا انا رايح علشان فزت في اللوتري دي برضه اجابة كويسة
* ممكن يسالك متجوز من امتي وسافرت قبل كده ولا لا المهم تقول الصدق ولازم يكون متفق مع اللي في الورق علشان لو كدبت واتكشفت اضمن انك مش رايح
*هايسالك عملت الورق ده عند مين تقوله ولازم علي فكرة الورق يكون مختوم وممضي من المكتب او الشخص اللي ترجملك الورق وعمله معاك
*هايسالك طيب هو فهمك اللي في الورق وانت عارف ايه اللي فيه هاتقوله اه
بعد كده لو كله مشي تمام بإرادة ربنا هاياخد منك الباسبور ويقولك مبروك وهانبعتلك الفيزا في خلال 10 ايام ( حقيقة بتاخد من 3-15 يوم علي حسب سكنك في مصر)
وربنا معاكم كلكم ويساعدكم فيها