[كيرو رافت]

موش عارف فيه ايه بس بجد احساس غريب جالى فجأه وخلانى قعدت ابكى كتير على نفسى وعلى احوالى
قعدت افكر انت لغايه امتى يا رب هاتفضل صابر عليا لغايه امتى هاتفضل تدينى فى فرص
بجد يا رب انا خايف ومرعوب انك تيجى فى مرة وانا لسه فى خطيتى وتقول اعطنى يا ابنى حساب وكالتك
وانا يا رب عملت زى التاجر الاحمق اللى خبى الوزنات ومارضيش يتاجر بيها علشان خاف منك
وبجد انا موش عارف ليه يا رب ماتاجرتش بيها كل مرة بتدينى الفرصه انى اقوم من بعد سقطتى كل مرة بتمنحنى قوة جديده
لكن لغايه امتى يارب هاتفضل تسامح لغايه امتى هاتفضل صابر على خطاياى بجد يا رب انا كلى خطايا وخايف خايف تبعت ملايكتك وتقولهم هاتوهم حتى استوفى دمى منهم وساعتها يا رب انا موش عارف اعمل ايه هالوم على نفسى ولا هالوم واعاتب عليك انى سيبتنى فى خطاياى
يا رب ابونا داود قال ان لم يبن الرب البيت فباطلا تعب البنائون يعنى يا رب انت اللى بتمد ايدك وتساعد وتبنى سايبنى ليه طيب لنفسى ولخطايايا ما نت عارف انى ضعيف وخاطى مد ايدك وخلصنى زى ماعملت مع شاول وشيلت الغشاوة من على عينيه
وزى ماعملت مع الانبا موسى القوى اعمل معايا نور يا رب عينى حتى ارى عجائب رحمتك
يا رب انا بجد موش قادر لوحدى انى ابنى ساعدنى موش قادر لوحدى انى اعدى امسك بايدى يا رب
يا رب هو انا موش ابنك وانتى اللى خالقنى طيب ماتمد ايدك وتنتشلنى من اللى انا فيه هو فيه اب بيفضل سايب اولاده كدا بيتفرج عليهم موش بيؤدبهم ويرجعهم ويحوط عليهم
ادبنى يا رب لو لزم الامر بس ماتحسسنيش انى لوحدى
سامحنى يا رب يمكن اكون اتكلمت معاك بطريقه موش كويسه لكن بجد انا تعبت من نفسى امسك يا رب ايدى وقدنى حيثما تشاء
سامحنى يا رب انا ابنك انا عارف ان كلماتى قاسيه عليك بس بجد موش مستحمل نفسى يا رب

المصدر: †† ارثوذكس †† - من قسم: التأملات الروحية والخواطر الفكرية

[miso]

اعطنى يا ابنى حساب وكالتك
رغم الكلمة دى خلت قلبى بتقبض من اليوم ده
بس عارف اكتر حاجة فموضوعك ايه
انه مكتوب ببساطة جداااا مش عامل تصنع للكلمات
انت حسستنى انك واقف بتصلى قدام ربنا مش مجرد بتكتب علشان تنزل موضوع
بجد جميل اوووى يا كيرووو احساس الانسان اللى مشتاق لربنا
وخايف من مقابلته فاليوم اللى هو مش عارف هيجى امتى

[وردة حزينة]

تعبت من نفسى امسك يا رب ايدى وقدنى حيثما تشاء

باامانه يارافت ميش عارفه اعلق على الكلمات اللى حاسه انها طلعه من كل قلب فينا نفسه وبيحاول يفرب من ربنا وميش قادر ولسان حاله وقلبه وفكرته بيقول امسك يارب ايدى كما تشاء يسوع سر امامى فااتبعك فحيثما تسير خدنى معك
عاملين زى الاطفال اللى محتاجين ايد ابوينا يعدينا ويسندنا ويعدي بينا ويعرفنا سكتنا اللى نمشى فيه عشان نوصله ونعرفه ونقابله فى الاخر
صراع جميل اوى وحوار جميل مع الله يارافت روعه بجد

[حنين سنين]

بجد يا رافت موضوعك تلقائى جدا وطالع من القلب فعلا وكلنا جوانا ندم على اللحظات اللى بتعدى والسنين اللى بتفوت واحنا زى ماحنا واقفين فى الخطيه غارقنين ميرسى اوى اوى يا رافت على الكلمات الصادقه فعلا من القلب ربنا يفرح قلبك

[kottah_sh]

انا مش عارفه اعلق لانى بجد قاعده اقرى الموضوع
وكأنه فيلم بيمر من قدامى
بفتكر كل خطيه واد ايه كنت قاسيه مع ربنا
ومش بفكر فيه خالص

بجد ميرسى يا رأفت على الكلمات اللى نابعه
من جوه قلب حاسس اد ايه انه زعل ربنا
وكان قاسى عليه
بجد انت بتبكت كل واحد فينا على خطيته

[كيرو رافت]

اجمل ميسو
بجد بشكرك جداااااااا على وجودك وردك ربنا يفرح قلبك
اغلى ورده
موش عارف ارد على كلامك الرقيق والجميل ده بايه ربنا يفرحك دايما
ارق هنا
بجد بشكرك قوى قوى على كلامك وردك الرقيق الرائع ده ربنا يبارك حياتك
احلى كوتا
من كل قلبى بجد بشكرك على تعبك ووجودك الجميل وردك

[بنت الراعي]

المره دي يا رافت انت اللي عبرت وعبرت حلو اوي
بس عايزه اقولك حاجه
احنا ليه بنضيع وقتنا في خوف وقلق ليه مانقولش الان اقوم وارجع لابي
وحتي لو في السكه قابلتنا صعاب او سقطات لازم هانقوم لانه هو معانا وعينه علينا وايديه في ايدينا ويمينه محوطانا وبترعانا دايما بس المشكله فينا احنا
عارف الناس اللي في الجحيم دلوقتي بيتمنوا لحظه يتوبوا فيها واحنا عندنا الوقت كتير جدااااااااااااااااا وبنضيعه في كلام فاضي
عارف ربنا عمره مابيسبنا ابدا حتي لو احنا حسينا انه بعيد وايبنا ومش شايفينه
هو برده بيبقي معانا وبيحبنا وفي عز مابنلوم عليه نقوله انت فين وسايبنا هو بيكون مشغول بينا وبيرتب لخلاصنا ده ربنا بيحبا اكتر من نفسه علشان كده بزل ذاته عنا لكي لايهلك كل من امن به
يعني هو مش خلقنا علشان يعزبنا او علشان تكون اخرتنا وحشه او النار لا هو خلقنا للكرامه والمجد والنعيم خلقنا علشان نكون معاه
لانه هو بيحبنا لاننا ولاده وباته وغالين جدا عنده لاننا صنعة ايديه
بس احنا المفروض اننا نصلي له ونقوله حسسني يارب بوجودك املي كياني كله املك علي قلبي وعقلي وفكري يارب
اجعل ارادتي طوع مشيئتك
صدقني يا رافت ربنا مش ممكن ينسي محاولتنا للنهوض حتي لو كانت فاشله من وجهة نظرنا لكن من وجهة نظره غاليه اوي وبيفرح بيها كتير
ميرسي يا رافت وسوري اني طولت عليك
ربنا يعوضك ويباركك ويفرح قلبك

[كيرو رافت]

ميرسى قوى قوى يا ايمى
انا عارف بجد ان ربنا رحمته واسعه جداااااااااااا
وعارف ان احنا السبب فى كل اللى بيحصل ده
بس الواحد لما بتعدى عليه لحظات ضعف كدااااااااااا
بينسى كل ده وموش بيفكر غير فى الضيقه
لانها بتعمى حاجز بينه وبين ربنا

بجد كلامك يا ايمى رائع جدا وبشكرك على وجودك الجميل ده
ربنا يفرح قلبك دايما

[الناى الحزين]

يا رب هو انا موش ابنك وانتى اللى خالقنى طيب ماتمد ايدك وتنتشلنى من اللى انا فيه هو فيه اب بيفضل سايب اولاده كدا بيتفرج عليهم موش بيؤدبهم ويرجعهم ويحوط عليهم
ادبنى يا رب لو لزم الامر بس ماتحسسنيش انى لوحدى

جميل جدا تأملك يا رافت
اتكلم مع ربنا كتير
وقوله انا منك ومنسوب اليك واسمى مسيحى على اسمك
متسبنيش اغرق فى مشاغل العالم
فكرنى دايما انى ناسيك وزى ما بتقوله
ادبنى ايو ادبنى ادبنى علشان اصحى وافوق من اللى انا فيه
لانى بدونك انا تايه ومش عارف طريقى من غيرك انا لا ارى الطريق الصحيح مع ان عيناى ترى فى الظلام
لكن عرفنى يارب طريقك علشان امشى فيه

بجد اسلوبك الجميل البسيط عاجبنى جدا
وموضوع من المواضيع اللى بجد ابدعت فيها يا رافت ربنا يفرح قلبك

[دموع الورد]

تبعت ملايكتك وتقولهم هاتوهم حتى استوفى دمى منهم وساعتها يا رب انا موش عارف اعمل ايه هالوم على نفسى ولا هالوم واعاتب عليك انى سيبتنى فى خطاياى

متقلقش يارأفت ربنا حنين وبياخد الانسان فى احسن حاله روحيه ليه
تاملاتك رائعه
انا مش بعرف اتكلم حلو ولا اعبر عن الى جوايا بالكلام وبجد مش عارفه اوصف جمال وتلقائية كلامك
ربنا معاك يارأفت