ليه يارب
ليه يارب كل عيد نبقي فيه زعلانين
هو احنا مش من حقنا نفرح
ولا الفرحة بقيت غلط للمسيحيين
يارب ...... يارب احنا مش عارفين نعمل ايه
نبكي ولا نفرح ولا يكون شعورنا ايه
احداث الكشح ونجع حمادي
والعمرانية وفرشوط
والسنة دي الدور جه علي اسكندرية
يقدموا ولادهم للملكوت
يارب مش عارفين مين تاني هيقدم ولاده ليك
ما هي البقية تأتي
مش عارفين البقية دي هتبقي مين
يارب .... يارب شعبك بيصرخ ويقول
مالناش غيرك
مالناش غيرك يارب نلجأ ليه
يارب حقنا ضايع في بلدنا
قلنا يارب هناخد حقنا من مين
وهل هيرجعولنا حقنا ده
ولا خلاص بقينا في بلدنا معتقلين
هيرودس رجع تاني
وشهداء بيت لحم رجعوا من جديد
بس المرة دي في اسكندرية
ومش أطفال بس
لأ ده أطفال وشيوخ
وشباب تحزن عليهم العين
يارب ..... يارب في نهاية كلامي بقولك قوينا
اشفي كل مصاب في شعبك
من فضلك نجينا
وإذا كنا احنا البقية
ياريت يارب تقوينا
علشان نوصلك بأمان
وتفرح بيك عينينا
ويارب صبر الأهالي
كل أب وأم قدموا ولادهم ليك
يارب عينهم علي فراقهم
واقبل اولادهم كذبيحة حب ليك
وادينا يارب الإيمان
اللي بيه نقدر نقول بصوت واحد
مالنا سواك يا معين
اقبلنا في ملكوتك يارحيم
نفوسنا وأجسادنا يارب
بنقدمها علي مذبحك قرابين
من فضلك يارب اقبلها
واذكرنا يا أبانا متي جئنا في فردوس النعيم
مشاهدة صفحة طباعة الموضوع
أرسل هذا الموضوع إلى صديق
ليه يارب ( شعر عن أحداث الإسكندرية )
المواضيع المتشابهه
العرض الشجري