[بيلاجية]

حاولت اكتب و اعبر عن الاحداث الجارية فلم اجد غير تلك الكلمات
مسكت القلم و حاولت اكتب
لكن القلم مش عاوز يكتب
اترجيته كتير انه يكتب
صرخ فيا .. انا مش هاكتب
انت عاوزانى اكتب
اكتب لمين و ليه
انا حبرى جف و سنى انكسر
حتى الورق كله انحرق
يا قلم ازاى سنك انكسر
و بتقول ان الورق كله انحرق
ايوه انحرق و الحبر اندلق
انحرق لما ابانوب مات
انحرق لما البابا اتهان
انحرق امبارح بعد الامان
مينا و بيتر و تريزا
كانوا امبارح جوه الكنيسة
كانوا فرحنين و بيصلوا للقدوس
و ابونا مقار بيقول اجيوس
و الشعب كله بيصلى لايسوس
بصوت واحد بينادوا على القدوس
كانت الفرحة و السعادة بتملى النفوس
عم مرقس فرحان و طنط فردوس
الكل سعيد و حاسس انه مرفوع
فى السما فوق عند يسوع
كانت طلبات و امنيات الجموع
ان الحب و السلام يسود الربوع
و الفرحة تغمر كل قلب موجوع
العيون مقفوله و الكل واقف بخشوع
2010 خلصت بكل الشرور
2011 يارب تيجى بالسرور
فجأة الكنيسة اتهزت من الجذور
لقينا الكل بيجرى مذعور
ابونا قال اهدو ماتخفوش
و الشعب بيصرخ يارب حوش
و لما نزلنا نشوف الحوش
لقينا جثث كتير مايتعدوش
و ناس بتجرى شمال و يمين
الكل فى حزن شديد و انين
يارب ارحم و ساعد شعبك الحزين
اللى ينادى و يقول فين المسعفين
و اللى يصرخ و ينادى رب القديسين
و اللى يشيل فى المصابين على مستشفى القديسين
و لما سالت مين هم المسئولين
اللى قال دول ناس مفخخين
و الى قال لا ده العربية اللى راكنه على اليمين
سواء مفخخين او العربية اللى على اليمين
فى النهاية اللى ماتوا مبسوطين
معلش نرجع تانى للمصابين
ادى مصاب اتنين قول تسعين
واحد زايد او اتنين مش فارقين
ده طفلة جميلة لكن وشها حزين
و قالتلى انا مش عارفة مين
مين هو السبب فى الانين
ليه كل عيد بيخلينا حزننين
لكن انا مبسوطه انه الشهداء عند يسوع معيدين
و ده واحد تانى من المصابين
ايده مجروحه و شاعر بانين
لكن فرحان و مش حزين
و ادى انبا موسى و انبا مارتيروس و الانبا روفائيل
جايين يعزو و يدو المصابين امل
امل فى بكرة و فجر جديد
امل و رجاء و ايمان من حديد
ايمان يخلى القلب سعيد
سعيد لان الهنا اتألم قبلنا
اتألم علشان يفدينا
يفدينا و من خطايانا ينقينا
و النهاردة احنا بناخد بركة كبيرا
بركة لان الهنا سمح لينا نشاركة الالم
هو ده لسان حال المصابين
هو ده الرد على كل المراسلين
دلوقتى هاقولك اكتبى و انشرى
اكتبى و قولى لكل المؤمنين
ان كان حبرى جف و سنى انكسر
هاصلح سنى و حبرى هايكون دم الشهداء
هاساعدك تكتبى و تكتبى
هاساعدك انك تملى الصفحات
علشان تكتبى احلى المنشتات
و تقولى ان الشهيد مش ممكن يكون مات
الشهيد عايش فوق فى السموات
عايش و شايف رب القوات
افرحوا ياشعب المسيح
افرحوا و هللوا بالتسبيح
رنموا للقدسين بالمديح
امدحوا فى كنيسة القديسين
الرب اختارها تشهدعلى مر السنين
الرب منحها شوية من الانين
لكن علشان يخليها من الممجدين
طوباكى ثم طوباكى ياكنيسة القديسين
شهدائك هايصلوا عنك كل حين
و ياريت يصلوا من اجل المصابين
ان الرب يمد ليهم يديه الحانيتين
و فى النهاية هاقول للمؤمنين
افرحوا و تهللوا كل حين
ان الرب يسوع امين
هايحفظ شعبه المؤمنين
على مر الدهور امين
الرب يعزى الجميع

المصدر: †† ارثوذكس †† - من قسم: القسم الادبي

[ريم الخوري]

ايمان يخلى القلب سعيد
سعيد لان الهنا اتألم قبلنا
اتألم علشان يفدينا
يفدينا و من خطايانا ينقينا
و النهاردة احنا بناخد بركة كبيرا
بركة لان الهنا سمح لينا نشاركة الالم

يعني ميش عارف شو رد عبرتي اختى بيلاجيه بامتيار عن الحدث المؤلم
برغم انه احساس مؤلم بس ربنا يجرح ويعصب لحتي ينقى النفس اكتر
ربنا يدي الكل الايمان والصبر لندرك محبته لنا وافتقداه الدائم لان المحن والتجارب هيى كبوتقه تنقي النفس ليكون ذهب خالص منصوب امام عرش النعمة باستحقاق
ليرتب الرب نفوس المنتقلين في مصاف القديسين الابرار
شكرا للموضوع الرب يقويكي ويحفظ حياتك

[بيلاجية]

ميرسى على مرورك الجميل

و ربنا يعزى الجميع

[اشرف وليم]

شكرا لتعب محبتك
الرب يبارك حياتك

[بيلاجية]

المشاركة الأصلية كتبت بواسطة اشرف وليم شكرا لتعب محبتك الرب يبارك حياتك

ميرسى على مرورك

[عماد حسنى]

الكلمات والموضوع مش محتاجين تعليق
الاحساس احساسنا واللى عبرتى عنه صدقينى كتير اوى اوى عايش جواه
ربنا يعزى شعبه ويحميهم ..
شكرا جدا جدا جدا لكتاباتك بلاجيه
ربنا معاكى ويباركك

[بيلاجية]

المشاركة الأصلية كتبت بواسطة عماد حسنى الكلمات والموضوع مش محتاجين تعليق الاحساس احساسنا واللى عبرتى عنه صدقينى كتير اوى اوى عايش جواه ربنا يعزى شعبه ويحميهم .. شكرا جدا جدا جدا لكتاباتك بلاجيه ربنا معاكى ويباركك

ميييرسى على كلامك الجميل

و ربنا يعزى كل شعبه

[منيمو]

بجد حقيقى تحفة جدااا و لن استطيع ان اصف اد اية عجبتنى اوىىىى ربنا يعوضك

[بيلاجية]

المشاركة الأصلية كتبت بواسطة منيمو بجد حقيقى تحفة جدااا و لن استطيع ان اصف اد اية عجبتنى اوىىىى ربنا يعوضك

ميرسى كتير على مرورك الجميل