لو كنت مكانى كنت هتعمل ايه ؟

سلام و نعمة

لو سمحتو انا محتاجة ارشاد او رأى او حتى شوية اهتمام . هاحكيلكو على كل حاجة :

انا بنت . عمرى 17 سنة . كنت متفوقة فى الدراسة بس دلوقتى لأ ، علاقتى بربنا ساعات بتبقى كويسة جدا و ساعات نص نص
علاقتى ببابا مقطوعة من سنين و علاقتى بماما سطحية جدا لدرجة انى ساعات كتير بحس انها بتكرهنى او انها بتتمنى انى مكنتش اتولدت و هى نفسها قالتهالى كذا مرة

اتعرضت لحاجات كتير و انا صغيرة و .. و انا كبيرة كمان . دايما ماما و بابا كانوا بيتخانقوا و الاتنين كانوا بيقولوا انى انا السبب . الاتنين كانوا بيرمونى كتير عشان كل واحد يثبت للتانى انى مش نقطة ضعف بالنسباله
مبقاش عندى ثقة فى اى حد . مش بكره الناس بس مش بحبهم . حتى لما بلاقى حد بيتعامل معايا كويس بكون حاسة انه بيعمل كده عشان سبب فى دماغه مهما كان سبب كويس او لأ بس ببقى حاسة انه بيتعامل معايا او بيحبنى عشان اى حاجة مش عشانى انا

ده خلانى ابقى وحيدة جدا و معنديش اصحاب غير انى معنديش اخوات ولا قرايب فبقضى تقريبا ساعتين يوميا عياط

حاولت مرة انى اعمل صداقات من النت بس لقيت ان الناس بتكره الشخصية الكئيبة اللى كلها حزن [ مع انى عمرى ما حكيت لحد عن حياتى الشخصية بس كنت بتكلم بأسلوب كئيب شوية ] . قلت اتغير عشان الاقى اصحاب و السلام . فعلا بقيت دمى خفيف جدا فى الكلام معاهم و مهما كانوا زعلانين بحاول اضحكهم و اوريهم انى شخصية متفائلة و كويسة جدا . بس بعد فترة تعبت . كنت بعيط كتير و انا عمالة اكتبلهم كلام مضحك . كنت ببقى مخنوقة و مفحومة جدا و نفسى اتكلم معاهم بس كنت بخاف ان حد يستغلنى او يحس انى ضعيفة و انا اكتر حاجة بكرهها فى حياتى انه حد يفتكرنى ضعيفة

نفسى حد يقوللى انى مش وحشة . مش قصدى انه حد يحبنى بس نفسى احس انى مقبولة او انى محبوبة و لو شوية صغيرين . نفسى الاقى حد اشكيله و ابقى مطمنة انه هايحفظ سرى . هتقولولى ربنا ممكن يكون الشخص ده .. انا معاكو بس نفسى يبقى فى انسان يعمل ده .. حد زى كل الناس . ما كل الناس عندها ربنا و حد تانى بيثقوا فيه و بيحبهم

لو حد منكو كان مكانى .. كان هيعمل ايه ؟
و انا السبب فى كل اللى بيحصل حواليا ؟


متأسفة صدعتكو بس كنت محتاجة اتكلم
و شكرا