اولا الوصفه دى محدش علمهانى ولا قريتها فى كتاب
و لكن ده اللى انا الحمد لله بتميز بيه و هو النفس فى الاكل و بعرف ازاى ازبط الاكله بدون تحديد للمقادير
فانا حبيت اقولكم كده عشان تعرفوا ان بعض الاكلات اللى هعرفهلكم
هتعملوها بالويم زى ما بيقولوا يعنى بدون مقادير و لكن متقلقوش مش هتخرب
الطريقه \
تجيبى طاصه او حله ( حسب الكميه ) و تحطى حبه زيت صغيرين على( قد تحمير التومه ) او معلقه سمنه لو تفضلى
و تجيبى كام فص توم مدقوقين و على قد كميه السجق اللى هتعمليه حطى اللى يناسبه من التوم
بس يستحسن على قد معلقه توم مفروم طبعا
و تحمرى التومه و تكونى مجهزه عصير طماطم عباره عن طماطم متقطعه قطع صغيره و نصها معصور (يعنى عصير طماطم قطع و عصير سوا ) و بعد تحمير التومه حطى عصير الطماطم اللى يكون مناسب انه يغطى كميه السجق اللى هتعمليه
و قطعى فلفله خضرا و حطيها عليهم
و حطى واحده مرقه دجاج كنتاجى او فاين فودز و لو لسه عادب شويه ابقى حطى شويه ملح
و سيبى الطماطم عالنار تتسبك شويه
و بعدين تكونى جايبه السجق الاسكندرانى التخين اوى ده . و تفكى الكيس اللى عليه من بره و تفرتكيه
و بعد اما تتسبك الطماطم حطى معلقه صغيره اوى فلفل اسود و بعدين حطى السجق اللى لازم يكون متغطى بعصير الطماطم
و سيبيه شويه و باشريه لغايه اما يستوى و اطفى عليه و كلى و ادعيلى
ازاى تعملى احلا سجق اسكندرانى ........
المواضيع المتشابهه
العرض الشجري