[يوم مماتى]

ياجماعه انا نفسى اتكلم واطلع كل اللى جوايا وفى نفس الوقت تساعدونى وتقولولى اتصرف ازاى
انا مخطوبه لشخص كان بينا قصه حب جميله جدا ومليانه تضحيات كتير اوى وتنازلات كتير علشان نكمل مع بعض ونرتبط ببعض
دلوقتى حساه اتغير شويه بس لما بحلفه يقولى ابدا مفيش حاجه من ده دا مجرد ضغوط شغل وفعلا بيبقى كويس جدا معايا
بس الفتره دى حاسه انه بيتلكك يعنى بيتخانق على اسباب تافهه جدا وجه مره وقالى نسيب بعض وعايز يفك الخطوبه
وحلفته كتير ليه بتقول كده قالى على السبب وانا شيفاه تافهه
ولحد اخر وقت بحاول اتكلم معاه بهدوء بس كان بيضايقنى بكلامه الجارح والموضوع كبر اوى واخر حاجه وصل ليها اننا نسيب بعض
انا دلوقتى مش عارفه انا مخطوبه ولا لا
وانا صح ولا لا
بأمانه المسيح انا بعشقه وهوه كمان بس مش عارفه ايه اللى حصل ده والموضوع كبر اوى كده ليه


نفسى افهم اعمل ايه اقلع الدبله وانسى كل اللى فات ولا استنى يومين واحاول اتكلم معاه تانى بهدوء
ارجوكوا حد يرد عليا لانى بجد تعبانه جدا ومش متخيله بعد كل اللى بينا ده كل حاجه تروح لحالها

وعلى فكره محدش فى البيت يعرف حاجه
ومحدش يطلب منى انى ادخلهم لانهم مش هيقتنعوا بالسبب اللى بيقوله وممكن كمان بكل سهوله يقولولى سيبيه

واب اعترافى ميعرفش تفاصيل بكره انشاء الله هتكلم معاه
هوه يادوب عرف العنوان النهارده لما بقوله احتمال نسيب بعض
قالى بطلوا جنان انتوا الاتنين واعقلوا


مستنيه ردودكوا من فضلوكوا

المصدر: †† ارثوذكس †† - من قسم: حوار من الاعماق

[anosh]

انتى بتقولى انه قالك سبب انه عايز يفك الخطوبه
و انتى شايفاه سبب تافه
و احنا كده مش عارفين السبب
يعنى بصراحه لو انتى شايفه السبب ده فعلا تافه حاولى تقعدى و تتكلمى معاه بهدوء تانى
يمكن يكون فيه حاجه مضيقاه فى الشغل او فى بيته
او يمكن يكون مثلا حاسس باى مشاعر تانيه اتجاه انسانه تانيه غيرك
او يمكن فيه حاجه فيكى مش عجباه و مش قادر يقبلها فيكى لحد دلوقتى و انتى ماتغيرتيش
حاولى تفكرى فى الموضوع بهدوء و من جميع النواحى كويس جدااااااااااااااااااااااا اااااااااااا
لان فعلا لو فيه بينكم قصة حب جميلة كده و تضحيات و عشرة حرام كل ده يروح كده فى لمحة عين
صلى ان ربنا يعدى الفترة ديه على خير
و ربنا يديكى نعمة و حكمة فى تدبير الامور
و يبارك حياتك انتى و خطيبك
و حاولى تتفقى معاه و تروحوا الكنيسة تحضروا قداس و تتناولوا مع بعض
صلى كتتتتتتتتتتتتتتتتتتتتتتتت تتير و ربنا ان شا الله يدخل و يحلها من عنده
ببركة البابا كيرلس
امين

[حنين سنين]

بصى يا حبيبتى انتى لازم تصلى كتير جدا من دلوقتى تطلبى مشوره ربنا
يظهر كل شئ لانه جايز جداااا يكون دى اراده ربنا انا عارفه انك ممكن تضايقى من كلامى
بس دى الحقيقه لو ربنا رايد ارتباطكم هيحل المشاكل وبعدين انتى عليكى حمل كبير اوى لازم تستحملى خطيبك ومش لازم تفكريه بانكم ضحيتوا علشان بعض انتى عملتى كدا علشان قلبك وهو كمان عمل كدا علشان حبه ربنا يسعدكم بس لازم تصلوا وحاولى توصليله هو كمان يصلى فى فتره تطلبوا مشوره ربنا

[iyiy]

انا عارفة ان سنى صغير وانى لسة ما مرتش بتجارب كتير
بس هقولك خليكى معاة يمكن فى مشكلة عندة وهو مش عايز يقولهالك علشان خايف عليك وبيتلكك علشانك
وبجد طالما بتحبية كل الحب دة وهو كمان بيحبك هاتتعبوا اوى لو سبتو بعض وانتى لما تفضلى معاة هايقدر حبك وهايتمسك بيكى اكتر
دة من وجهة نظرى ولو انا مكانك يعنى لو ارتبطت بالانسان ايلى بحبة مش هافارقة الا ساعة الوفاة حتى لو هو طلب منى الفراق لاى سبب

[mony_nnn]

انا شايفة انك لو بتحبيه بجد يبقى لازم تصبرى عليه ومش تستعجلى لو مش قالك سبب مقنع تعرفى ساعاتها انه مش بيحبك ولا حاجة وبيضحى بيكى يبقى لازم تسبيه ومش تبقى على واحد بايعك.

[love is the key]

اختى المحبوبه في الرب
اولاً انا عاوزك تبقى هاديه وتفكري في الامور بعقلنية شويه
ثانياً صلي كتيررر جداااا من اجله ومن اجلك واحضري قداس واعرفي ربنا عاوز يقولكم اية
ثالثا حاولى ان انتى تخرجي خطيبك من الحاله اللى هو فيها دي
وطبعا زي ما اتقالك متفكرهوش بتضحياتك من اجله
رابعا انتى لو هو عنده اخوات حالوى تعرفي اية الظروف اللى هو بيمر بيها
وخصوصا لو عنده اخت ممكن تبقى عارفه كل اخباره
خامسا اتكلمى معاه بتمسك وان انتى متمسكه بيه للنهاية

وياريت رجاء محبه من كل اللى يقراء هذا الموضوع نرفع صلاه خاصه من اجلهم
وربنا يوفقكم ويبارككم

صلي من اجلى
اخوكى

[Robika]

اختى الجميلة سلام ونعمة ربنا يسوع المسيح تكون معاكى
انا هاعتذر مقدما عن اى كلام هايجرح مشاعرك بس سامحينى انا اعرف خبرات من كل اللى حواليا وهاقولك وانتى حكمى قلبك مع عقلك انا شايفة انه ممكن يكون عندة ضغوط وهى دى اللى خلتة يقولك كدة فرضا صح يبقى استنى مهلة تتاكدى انها مجرد ضغوط وظروف وهاتعدى لكن لو لقيتى انه بيكررلك الكلمة دى كتير انسحبى بهدوء لان مفيش راجل على الارض هايكرر الكلمة دى كتير وهايطلبها منك كتير انكوا تسبوا بعض وتثقى فية تانى لانة فى اتفة الامور فى نظرك بيقول كدة امال فى الامور الكبيرة الصعبة يبقى هايقول اية
اخيرا علشان مطولش عليكى فكرى بعقلك شوية فى الفترة دى قبلقلبك وربنا معاكى ويفرح قلبك ويرشدك للصالح ويارب تكملوا مع بعض وتمر الازمة

[ظريف]

المشاركة الأصلية كتبت بواسطة يوم مماتى بأمانه المسيح انا بعشقه وهوه كمان بس مش عارفه ايه اللى حصل ده والموضوع كبر اوى كده ليه

فيه مثل مشهور بيقول ..... يابخت من بكانى وبكى عليا ولا من ضحكنى وضحك الناس عليا ........
بإختصار شديد أى شاب بيفك الخطوبه بيبقى فيه سببن رئيسيين
1ـ بيكون شاب مستهتر وبيتدارى وراء ستار الخطوبه ولما بيزهق منها بيتركها ويشوف غيرها بنفس الطريقه
2ـ بيكتشف الشاب عيوب فى خطيبته ويخشى أن تكون عائق فى إستمرار الحياه الزوجيه فيما بعد

[bright]

انا رايي انكوا تبعدوا عن بعض فتره

تكونو فكرتو كويس قبل ما تاخدوا قرار سواء انكو تكملو او تنفصلو

ربنا معاكي

[goneer]

اختى انتبهى لكلامى من فضلك

اوللا: انا بحضر ماجستير فى علم النفس.
ثانيا: انا مريت بنفس تجربتك لانى كنت مخطوبة لانسان كان بيقول انو من غيرى يموت. فانا حاسة بيكى اوى وعارفة حالتك ومشاعرك وتفكيرك ولومك لنفسك ع كل شئ حتى لوماكنتيش غلطانة فى شئ.
ثالثا: انا اتفق جدا وعن خبرة مع اختى robika واختلف تماما مع اخى ظريف واطلب منك لا تحطى كلامة فى بالك لانها تعبر عن وجهة نظر وليست قاعدة لان مافى نوع من البشر ينقسم الى جزئين فقط وصدقينى العيب ممكن مايطلعش فيكى اصلا.
رابعا: من فضلك وراح اقولها ليكى الف مرة كرامتك...كرامتك....كرامتك....ك� �امتك.وثم كرامتك................اختى عيشى غالية وماتقللى من نفسك تحت اى ضغط(قلبك) ولاتتنازلى لان التنازل مابيجيب الا التنازل فى النهاية وراح تصغرى فى نظرة.
خامس:نسيتى اية مهمة جدا "ما جمعة الله لا يفرقة انسان" يعنى ربنا كاتب ليكى نصيبك ومهما عملتى ولو خطيبك دة مش هو نصيبك مش هتتجوزية ولو هو نصيبك مهما اتفرقتوا ربنا هيجمعوا تانى "لكل شئ تحت السماء وقت" ثقى كل الثقة فى وعود ربنا لانها الوعود الوحيدة الصادقة والثابتة الى الابد.
اذكرينى فى صلواتك