[MARMORAM]

عل صح انى ابحث عن عريس ام خطأ انا ابى وامى مسنين ومعنديش اخوات ولاد فهل صح انى اروح لابونا اقوله شوفلى عريس ارجو الافاده و الاهتمام بالموضوع لان دى مشكلة بنات كتيييييييييييييييير .

المصدر: †† ارثوذكس †† - من قسم: حوار من الاعماق

[ظريف]

المشاركة الأصلية كتبت بواسطة marmoram هل صح انى ابحث عن عريس ام خطأ .

أكيد صح مش غلط بس ممكن تتركيها للوقت
وأكيد أب أعترافك يعرفكى ويعرف أسرتك كويس
وثقى جيدا أن .....المر الذى تختاره لى يارب خير من الشهد الذى أختاره لنفسى

[G.a.L.a.x.y]

من وجهه نظرى واللع واعلم انك متطلبيش من حد انتى اطلبى من ربنا بس هو هيديكى من عنده عريس حلو وصالح
ربنا معاكى بس موضحتيش انتى سنك كام ولا تروحى لابونا ليه هو انتى سنك كبيرؤ مثلا ولا ايه النظام؟

[samornotika]

انا مش حابة ان انتى اللى تروحى و تدورى على عريس و لا حتى تقولى لابونا دورلى على عريس انا شايفة ان انتى كدة بتقللى من نفسك
انتى تفضلى فى بيت اهلك معززة مكرمة لحد ماربنا يبعتلك اللى رايدلك انك ترتبطى بيه بقيت حياتك
و بعدين انتى بتقولى ان باباكى و مامتك مسنين فانشغلى بخدمتهم بدل ماتنشغلى بانك تدورى على عريس
العريس ربنا هيبعتهولك فى الوقت اللى هو محدده
متستعجليش و افتكرى الاية اللى بتقول كل شئ تحت السموات وقت
ربنا يكون معاكى و يبعتلك الانسان الكويس اللى يكون ابن ربنا و يقدر يسعدك
ربنا يفرح قلبك

[الفتى المحبوب]

عادى وفيها ايه يعنى الكنيسه هى امنا كلنا والاب الكاهن هو انسب واحد
والشباب لما يلجأو للكنيسه ده عين العقل
لو شاب هيخطب ياخد رأى ابونا ولو بيدور على بنت الحلال يسأل أبونا
ونفس الكلام ينطبق على البنت ايضا
بس فى النهايه منحملش الكنيسه أى مسؤليه فى حالة الاختلاف لاقدر الله

[MARMORAM]

سنى اربعه وعشرون سنه

[ramysefen]

سلام ونعمة
لكي اختي اعرفي انك بطلبك هذا لم تخطيئ
وانت كلمتي كاتم اسرارك الذي هو اب اعترافك
وهو قادر ان يجد لك المناسب
اذ انت ابنته ويعرف عنك كل شئ

[goneer]

اختى انا فى مثل سنك لكن انا حابة اقولك ان احنا لسة صغيرين على ان احنا ندور ولية حبيبتى الاستعجال ربنا يعطى والدينك الصحة والعمر الطويل .
بس صدقينى لو دورتى وحطيتى الموضوع فى بالك وانشغلتى بية ممكن صدقينى تتسرعى فى اختيارك وترجعى تقولى لية يارب.
بصى اتركى الموضوع لإرادة ربنا وسبية هو يدبر حياتك كيفما يشاء لانه اختياراتة كلها بتكون للصالح لينا.
اذكرينى فى صلواتك

[megomagamego]

أختي الحبيبة
أنا ليا رأي في موضوعك المهم ده بس في الأول هحكيلك حكاية صغيرة
أنا لما كنت في الجامعة كنت بحب بنت أوي أوي فوق ما تتخيلي والحب ده إستمر 4 سنين كانت بتبادلني نفس المشاعر الحلوة لكن بدون مانعلن لبعض أي حاجة وفي الآخر أخذت صدمة كانت زي جردل المية الساقع في شهر أمشير لما لاقتها إتخطبت لواحد غني جداً وإتجوزت في خلال شهرين وبعدين نزلت خدمة في مكان ما ... وحبيت بنت تانية لكني تركت الخدمة بناء علي تعليمات مرشدي الروحي لأنه محتاجلي في خدمة تانية ، وروحت الخدمة التانية ومسكت بجانب خدمتي خدمة المكتبة الإستعارية وكانت معايا خادمة بتساعدني وحبيتها كالعاده وجه اليوم اللي كنت هسيب فيه الخدمة بس المفجأه بقي إني كان معايا مراتي اللي هي الخادمة اللي خدمت معايا في المكتبة الإستعارية وإكتشفت وكل يوم بكتشف إنها أحسن واحدة في الدنيا ... أنا بس عايز أعلن ليكي إن ربنا بيكون مخطط للواحد أومرتب إنك هتأخذي أحسن واحد في الدنيا لكن إحنا البشر مش بنستحمل ولا نتمهل علي ربنا ونفضل نفكر ونخاف ... لكنه في الآخر بيعطينا أحسن حاجة وبيقولنا ساعتها لو كنت إستعجلت ماكونتش أخذت الحاجة الحلوة دي وهو ده فعلاً الإحساس اللي بيجي لكل واحد بعد ما ربنا يعطيه
* علي فكرة مافيش مشكلة أبداً إنك تسألي أبونا وتحكي معاه وتعترفي بكل اللي في قلبك ليه ما هي دي وظيفة أبونا إنه يسمعلك إنتي وغيرك وربنا يعطيكي الإرشاد علي فمه دا حتي من إسمة ( أبونا ) ومش معني إنك تتكلمي مع أبونا إنك مستعجلة لأ طبعاً (أبسولوتلي )
ربنا معاكي ... صلي إن ربنا يدبر ليكي حياتك ويختار ليكي النصيب الصالح
يارب نحن لا نعلم ماذا نفعل .... ولكن نحوك أعيننا

[حنان الأخ]

أختي العزيزه مرموره
كان نفسي ما طولش عليكي، لكن السؤال بتاعك بيفتح مواضيع كتيره.
أولاً: الإعتماد على الكنيسه في كل شيء:-
أنا عن نفسي، ماليش أصحاب و لا أحباب و لا مشاكل و لا حلول... غير جوه الكنيسه. لكن أنا بعرف أميز و أفرق كويس بين علاقتي بالناس في الكنيسه كأمناء و زلاء خدمه و شركاء فصول و شمامسه و إداريين في الكنيسه... على جنب و على الجانب الأخر علاقتي بيهم كأصدقاء، ممكن في يوم يرشدوني للصواب و ممكن للخطأ، ممكن نتفسح مع بعض و ممكن نعمل شغل مع بعض. و الكنيسه طبعاً غير مسئول عن ذلك و لا عن نتائجه.
ملخص النقطه دي، إن أبونا مرشد روحي مش مرشد إجتماعي، يعني لما أخد رأي أبونا في أي شيء غير الأمور الروحيه لازم لازم لازم أكون حذر و أعرف إن الأمر مش مسلم بيه، و إني المسئول الأخير عن اللي هايحصل يعني رأي أبونا زي رأي أي واحد كبير عنده خبره، لان أبونا نفسه على سبيل المثال ممكن يكون مش ناجح في جوازه.
ثانياً: إنتي سنك مش كبير أبداً
24 سنه في زماننا ده و من زمان هو سن مش كبير أبداً، و عاوزك تحذري من بحثك على العريس اللي ممكن ينتج عنه إن شروطك في العريس تتنازل و ترضي بواحد أقل من اللي كنتي متخيلاه
ربنا معاكي، و يوفقك للي فيه صالحك بشفاعة العدرا و البابا كيرلس
أرجوكي وافيني بأخبارك و طمنيني عليك
مع خالص حناني