[emmmy]

اخواتى الخدام والخادمات وكل الاعضاء واحبائى فى المسيح
----------------------

عايزة اتناقش معاكم فى موضوع مهم ...

لو فى حقل خدمة وفية مجموعة خدام وخادمات لكل المراحل
وفى بعض الخدام مفيش بينهم محبة وود وتعاون

تفتكروا ان الاباء الكهنة والامناء المسئولين ليهم ذنب فى دة
يعنى المفروض انهم ليهم دور يقوموا بية علشان دة ميحصلشى ولا الاباء الكهنة والامناء مالهمشى دعوة بدة مالهمشى ذنب

اتمنى اسمع ارائكم ومناقشتكم
وانما هتكلم معاكم بس بعد ما اسمعكم
اتمنى المشاركة من الجميع

الرب معكم

المصدر: †† ارثوذكس †† - من قسم: قسم اعداد الخدام واجتماعات الخدمة

[zaza2006]

عارفة يا ايمى بامانة انتى سبقتينى انا كنت عايزة انزل موضوع متعلق بالنقطة دى انا الفترة اللى فاتت فخدمتى شفت حاجات كتير اوى تعبتنى نفسيا شفت انعدام المحبة بين الخدام بطريقه صعبة اوى زى ما بيقولوا بنقف لبعض على الواحدة واللى يضيق ويحزن ان القدوة بتاعتنا بقيت كده سواء الكهنة او امناء الخدمة مع احترامى ليهم بس فى حاجة غلط بتحصل يعنى انا شفت كتير خادمات حصلت بينهم مشاكل ووصلت لحد الخصام وهما فخدمة واحدة المفروض هنا دور امين الخدمة والكاهن انه يصالحهم ويحاول يوعيهم ويعرفهم ان الخدمة بدون محبة مش مقبولة بس للاسف لقيت الكل واقف بيتفرج وبس طيب هو الغلط بقى فمين والعيب فمين نفسى حد يجاوبنى لان انا حاسة ان دى بداية انهيار الخدمة لانها مش متاسسة على محبة ولا ده تدخل عدو الخير
ده راى من اللى انا شفته واتمنى اسمع راي باقى الاعضاء ميرسى اوى يا ايمى لطرحك الموضوع المهم ده

[emmmy]

ادى اول واحدة من الاعضاء المهمين وعمالقة المنتدى ردت وموافقانى على طرح الموضوع
حقيقى بشكرك يا نهى على مشاركتك الجميلة ونسمع راى باقى الاعضاء

اية هو دور الامناء والاباء فى المواقف دى يا حضرات

[كرستين ص]

انا طبعا معاكم لان الموضوع دة بدا ينتشر فى الخدمة كتير دة الموضوع وصل انى شوفت خدام وشمامسة واقفين بيتخانقوا والقداس شغال ومفيش حد بيتكلم لا كاهن ولا امين خدمة الخوف ان عدم المحبة دة يتسرب الى المخدومين من خلالنا
وبدل ما نكون احنا السبب فى تعليمهم المحبة نكون السبب فى تعليمهم عدم المحبة

[hany1982]

أكيد ليهم ذنب فى كده لأنهم ليهم دور زرع المحبه بين اللى اقل منهم فى الرتبه الكنسيه بأنهم يقدموا ليهم محبه الاول ويقربوا منهم لأن اكيد احنا فى الكنيسه اسرة واحده لازم فيها الكبير يعلم الصغير ويبقى قدوه ليه

ميرسى يا ايمى على مناقشتك الجميله

[ماروجيرافك]

شوفي يا ايمي قبل ما نتكلم عن دور الاباء الكهنه او الامناء ودورهم في زرع المحبه بين الخدام نتكلم الاول عن الخدام نفسهم اذاي انتي بتقولي مفيش محبه ولا ود بينهم وبين بعض ممكن اعرف هيقوله ايه لاودهم ويعلمهم ايه عن المحبه وهما نفسهم معندهمش فاقد الشئ لا يعطي
ومعلش من راي الشخصي الخادم الي معندوش محبه لايصلح من الاثاث انه يخدم
والمخدمه الي مفهاش محبه اكيد مش هيكون ليها دور ولا تطور في كنستها
لان الخدمه تبني علي روح المحبه والخدمه ولو مش موجودين يبقي مفيش خدمه ناجحه
بس لو قلنا ان مفيش محبه او مفيش ود بين بعض الخدام ممكن فعلا امين الخدمه المتنثل في الاب الكاهن او الخادم العام انه مثلا يشكرهم في عمل واحد بحيث انهم يشتغلو مع بعض وبكده هيخلق روح الود بينهم
الرب يبارك روح المحبه والخدمه بينكم

[elphilasouf]

اي مكان فيه الوحش وفيه الحلو
من وسط الاباء البطاركه القديسين الى جلسوا ع الكرسي المرقسي كان فيهم الى مش حلو .....
لكن احنا مش مسؤليتنا أننا ندين او نحاكم أن كان في بينعم محبه ولا لا
ولا في قدرتنا نفسر اي مواقف او تصرفات بحسب مزاجنا الخاص


الاهم هو أن نفرغ كل طاقتنا في الخدمه وحب المخدمين
فنور المسيح داخلي قادر أن ينير كل ظلمات العالم ,,,,,

وطبيعي لن تكون هناك خلطه بين النور والظلمه
لان النور تنير الظلمه

[كيرو رافت]

الخادم هو خدام
عارفه يعنى ايه خدام يعنى طاعه ومحبه للكل دون تزمر او زكر كلمه الانا
يخدم الجميه دون النظر الى انهم يستحقون او لا
ولكن فى النهايه الخادم بيحاول يكون صورة حيه للسيد المسيح
الذى جاء ليخدم لا ان يخدمه الناس

بصى يا ايمى هو عدو الخير من الطبيعى جدا انه يدخل فى اى خدمه بس لمجرد انه يحس ان الخدام عندهم ولو القليل من المحبه لبعضهم
وده لازم يقابله الخدام بالاتضاع والحب المتبادل وانكار الذات
وطبعا مانقدرش نلوم على الاباء الكهنه لان الاب الكاهن
مشغول بما هو اكبر واعمق وترك مهام الخدمه الى الامناء
ان يديروها بحكمه تحت ارشادهم طبعا
العيب فينا احنا موش فى الامناء ولا الاباء الكهنه

الموضوع ده انتشر تقريبا فى جميع الخدمات وده بسبب غيرة عدو الخير
وزى ماقال فيلو ان كل مكان فيه الحلو وفيه الوحش

يبقى انا كخادم احاول اتجنب الشئ الوحش وابعد عنه ده لو ماقدرتش اصلحه
الموضوع ده صعب جدا جدا وخطير جدا لانتشاره السريه
ونتائجه السيئه التى تجبر الكثير من الخدام على ترك الخدمه
ولكن ده لسبب بسيط وهو قله المحبه
وان كل خادم بيقول فى نفسه وانا مالى هادوش روحى ليه خلينى بره الخدمه هو انا لو بره الخدمه موش هاعرف اصلى ولا هاقرب من ربنا
تسمحلى اقولك اسف بجد لانك غصب عنك هاتبعد عن الخدمه شيئا فشيئا
وبعد ماكنت بتقرأ الانجيل كل يوم حتى ولو علشان التحضير هاتلاقى نفسك بتقل من القراءه
وحضور القداسات وسوف تقل روحانياتك جدا
ارجو من كل خادم وخادمه ان يتمسك بما هو عنده
حتى لا يقال له مثل الملاك فى سفر الرؤيا الذى قيل له
( عندى عليك انك قد تركت محبتك الاول اذكر من اين سقطت وتب )

المحبه تحتمل كل شئ وتصبر على كل شئ
وخادم بدون محبه كالاناء الفارغ

فى النهايه يا ريت مانحملش كل حاجه على الاباء الكهنه وننسى انفسنا وننسى اننا موش بنطيع رب المجد اللى طلب مننا ان نكون خدام امناء فى كرمه

اسف على الاطاله

وميرسى جدا ليكى يا ايمى

[magdy totti]

نـــــــــداء الــــــى اللــــــــه

[سندريلا2009]

فى ناس كتيير مش واخدها خدمة بالمعنى اللى قصده السيد المسيح
عشان كدة مش بتبقى موجودة المحبة بنهم
ومش هنقدر نلوم على الاباء الكهنة
لانهم اكيد بيحاولو يزرعوها بس فى ناس مش بتبقلها