[bisho03]

أحلى مسا على الناس الحلوه الجميله الكويسه
وأحلى صباح .. طبيعى لو ماكنش مسا
اسمى بيشوى من اسكندرية ودى اول مشاركة ليا يارب تعجبكم
بمناسبة الزيت ... واذا ذكرنا الزيت قصدنا الصيام
انا كتبت ال ..... مش عارف اسميها ايه بس يارب تعجبكم

بدأ الصوم و إبتدت الشكوى فول و فلافل يوم ورا يوم ( طعمية لو فى القاهره)
واما نغير تبقى بطاطـس و الزيت كدة مابقاش مهضوم
واما نقول نتـأخـر حبة م الاسبوع التانـى نـصوم
نلقى كلامنا عامل ضـجة وكأنـنا أخرنـا الصـوم

واما سألنا قاموا قالولنا إن الصوم ده فوايدوه فى ديلوه
منها إنك هتشم اللحمه من على بعد العشرين كيلو
غير إنك راح تمسك نفسك و مافيش ريشة فرخه تهزك
قوم و إتجدعن و إسند نفسك من بروتين الفول إديلو

يوم ورا يوم و المعدة تحجر أصل الفول زى الاسمنت
يدخل جوه المعدة يبلَّط و لا يتحرك فوق ولا تحت
آدى الفايدة التالتة بتظهر تحت بلاطتك حوِّش وفَّر
طقه وحيدة تاكلها و تشكر و ان مت يبقى أكيد إرتحت

بس صراحه الصوم ده راحه مش لينا لأ للجزار
و بتاع الفول يطلع بوزوه مقطع نفسه ليل و نهار
فاية صومنا الرابعه أهيه تحقيق مساواه إجتماعيه
لو بمرتب أو بيوميه ماحدش فيهم ليه أعذار

المصدر: †† ارثوذكس †† - من قسم: القسم الادبي

[ظريف]

منور المنتدى يابوأحمد قصدى يابوأسكندر
بدأ الصوم و إبتدت الشكوى فول و فلافل يوم ورا يوم ( طعمية لو فى القاهره)
لو أكلت عند أبو ربيع هتغير رأيك يابشوى وبدل الشكوى هتبقى شكر

[nrmo]

هههههههههههههه
اهلا بيك معانا فى المنتدى ونورت المنتدى

[bisho03]

متشكر يا ظريف اسما وصفه بس فى كل الاحوال الزيت هو الزيت كان من الشارع او م البيت
ومتشكر يانرمو على الرد ويارب اقدر اسعدكم

[عماد حسنى]

اهلاً بيك يا بيشو وسط اخواتك
واهلا بكل الاسكندرانيه
احسن ناس يا جميل

وشكراً ليك على الكلام الجميل اوى ده
ونورت المنتدى بوجودك
نتمنى المزيد من انتاجك
ربنا يباركك ويكون معاك

[bisho03]

ربنا يخليك يعماد وعلى فكره انا عجبتنى اوى كتاباتك
ويارب تدينا على طول كده من ولاد افكارك عشان بنات الافكار مابيعمروش
نوع من التحيز بقى

[kamel]

هو يابيشو الزيت للفول والطعمية
أنا عارف عندك بطاطس مقلية
وبطرف عينى لمحت العدس أبو تقلية
وخلينى مقلش الباقى..!!
ولا عشان أنا مش من أسكندرية
مخبى عنى كل الأكلات الى دية
ههههههههههههههه
الرب يباركك
موضع جميل ورااااااااااائع

[Team Work®]

الله الله الله بجد بس ليا سؤال انت وصلت لابوا ربيع انا باكل عندوا على طول

حلو مش وحش بجد جميل

ويا سلام بقى فى غدوة سمك من عند قدورة

يا عيني يبقى تمام

يالله جوعتونا

انت منور الموقع كلوا اشكرك جدا جدا جدا جدا وربنا يفرح قلبك امين يا رب

ونتمنى وجودك معانا على طول

[MICKEY]

بجد شعرك اكثر من رائع
لدرجة احتفظت بيه
انت هايل
وكلامك منسق وحلو اوي اوي
ربنا يخليك لينا
ربنا يحفظك

[bisho03]

فيه اكل كتير قوى يا كامل بس انت تعالى بس ومالكش دعوه هنظغطك

وعلى فكره يا هيما انا وصلت لابو ربيع وقدورة وبصرلحه 100 100

ومرسى قوى يا ميكى على الجامله الرقيقه منك وربنا يباركك

واسف جدا على التأخير ياجماعه لان الكمبيوتر عندى كان مشيع ومازال بصراحه انا شغال على النت من مكان تانى خااااااااااااالص