[zaza2006]

zaza : صباح الفل على احلى واجمل اعضاء فى منتدانا صباح الفل يا مجدى

totit: صباح الفل يا نهى صباح النور على اعضائنا

اهلا وسهلا بيكم فى الحلقة الثامن عشر من برنامج الوجه الاخر




zaza: العضو اللى معانا النهاردة عضو هادى ونشيط ومحبوب




totit: عضو حلقتنا النهاردة سجل فالمنتدى يوم 22/3/2009





zaza: عضو النهاردة عدد مواضيعه 163 موضوع عدد اصدقائه 82 اغلبية مواضيعه فى اقسام الاطفال

totit: مش هنطول عليكم هنسبكم مع عضو حلقتنا النهاردة

zaza: حلقتنا شاملة كل حاجة عن العضو حياته الشخصية خدمته هواياته حياته العاطفية مش هنطول على اعضائنا ونشوف لقاء حلقتنا السابع عشر مع العضو .........

عضوناا النهارده


هو

miro_rook

اهلا وسهلا بيك يا مراد نورت برنامجنا

Zaza : فالبداية نحب نتعرف عليك؟

اسمك؟

سنك؟

مؤهلك؟

عدد اخواتك؟

مراد: اسمي: مراد حليم
سني: 24 سنة

المؤهل:هو المؤهل لسه لاني دخلت كذا كليه وسيبتها عشان اقدر احقق حلمي وادخل كليه الهندسه اولا كنت في تجاره انخليش وبعد كدا سيبتها ودخلت معهد ومنه الي هندسه وهانت فاضلي سنتين واخلاص

عدد اخواتى : عندي اختين بنات

totit: مراد ايه هى هوايتك؟



مراد: ممارسه كوره القدم
وكمان بحب موت البحث عن التاريخ الحقيقي للكنيسه القبطيه
وبحب اعمل زي مراجع لنفسي ولخدمتي بخصوص الموضوع ده
وكمان بحب الموسيقيه وكمان بتعلم عزف بس مش با ستمرار لظروف خاصه

Zaza : مراد اوصفلنا شخصيتك؟

مراد: يمكن معرفش اوصف كويس شخصيتي بس
اللي اقدر اقوله عنها اني شخصيه باحثه عن الكمال بمعني ديما عاوز كل حاجه كويسه في خدمتي في اسرتي وفي حياتي
وكمان اعتبر شخصيه اجتماعيه احب اسال علي اصدقائي واقربائي
لكني حريص كل الحرص في التعامل مع الناس بسبب اني صريح شويتين

totit: مراد ايه هو حلم حياتك؟



مراد: هو لغايه فتره قريبه كان حلم حياتي اني ادخل هندسه واول ما اتحقق لقيت نفسي عاوز اكتر اني كون مهندس شاطر يقدر يخدم الكنيسه بعلمه وعمله مش بالكلام بالفعل

Zaza : ايه هو مبدئك فى الحياة؟

مراد: اني اعيش مسيحيتي
مش بالاسم بالفعل

totit: وياترى امتى تتنازل عن مبدئك؟



مراد: مستحيل

Zaza : مراد ايه هو الحلم اللى حلمته بس فشلت فى تحقيقه؟

مراد: كان زمان وانا صغير كان نفسي اكون راهب في دير الانبا صموئيل لكن ربنا
مااردش

totit: امتى مراد بيحس بالضعف؟



مراد: لما اشوف حد قريب مني محتاج مساعدتي ومقدرش اساعده

Zaza : مراد دموعك قريبه ولا لا؟

مراد: بصراحه مش بالظبط لان دموعي محدش بيشوفها غيري انا وبس

totit: مين هو مثلك الاعلى؟



مراد: مثلي لاعلي في الجانب الروحي
ابونا بيشوي كامل في تعليمه وخدمته

ومثلي لاعلي وموجود حاليا في كل حاجه والدي لانه هو اللي بيساعدني في كل امور حياتي حتي لما طلبت منه اني اسيب كليه عشان خاطر هندسه (وده كان قرار صعب عشان خاطر السن)
الا انه وافق وساعدني في كل الامور المعنويه

Zaza : ايه هى الشخصية اللى مراد بيرفض التعامل معاها؟

مراد: شخصيه الكذبه اللي تقول انها بتحبك ومره واحده يسيبك
وده جربته مع اعز اصدقائي سابقا

totit: لو حبينا نلخص حياة مراد فى كلمة تقولنا ايه؟



مراد: صريح (وده سبب مشاكل كتير في حياتي)

Zaza : مراد الخدمة بتمثل ليك ايه؟

مراد: ديه كل حياتي بمعني الكمله صدقيني لو قولتلك اني رغم من اني اضعف الخدام اللي معايا في الخدمه الا ان ربنا بيعطيني بركات مستحيل حد يتخيلها عشان كدا الخدمه هي حياتي واليوم اللي مرحوش فيه الخدمه انا بحس انا الاسبوع بدون اي بركه

totit: ايه هى اقتراحاتك بالنسبة للخدمة؟



مراد: الخدمه اللي عندنا في الكنيسه بصفه عامه نفسي اخواتي القديسين الخدام يهتموا اوي بالافتقاد لاني بامانه شوفت ناس كتيرها ومنهم بعض اقربائي بعدوا عن الكنيسه بسبب عدم الافتقاد

Zaza : مراد ايه هى مواصفات شريكة حياتك؟

مراد:
1- تكون بنت المسيح
2-شرط اساسي انها تكون خادمه عشان تقدر ظروفي في المستقبل كاخادم
3-طبعا تكون طيبه وحنينه
وتكون اساس حبها ليه معين نظير ليه
يعني زي ماقال ربنا عن حواء

totit: مراد عايش قصة حب فى الوقت الحالي؟



مراد: بصراحه ايون علي الرغم اني بدرس لكن اهلي واهلها متفقين علي كل شئ واهم شئ اني اخلاص علي الرغم اني بشتغل مع الكليه
بس هم بيقولوا اني رجل وعشان كدا مباركين الموضوع

Zaza : الحب بيمثل ايه فى حياتك؟

مراد:اساس من اسس حياه الانسان بختلف طبيعه الحب يعني الراهب حبه هو ربنا وبس
اما العلماني حبه لربنا بالاضافه لاسرته
اما انا زي زي كتير من الناس اللي حب بيعطينا نوع من انواع الدفعه اني اكون افضل وكمان نفسي عن طريق الحب ده في يوم من الايام اعلم اولادي في المستقبل ازاي يحبه ربنا وازاي يحبه المجتمع وازاي يحبه بلادهم وكل الناس بدون اي تميز

totit: ايه رايك فى الناس اللى بتقول ان مفيش حب فالزمن ده؟



مراد: اقول انهم ممكن ظروف حياتهم مجعلتهمش يجدوا الحب او ممكن يكونوا اتعرضوا لتجربه ما وبسببها قالوا ان مفيش حب لكن رائ اللي مش ممكن اغيره
ان الله محبه
يعني اكيد في حب طبعا اللي ربنا بيظهروا لينا

Zaza : مراد بتحب الكورة؟

مراد: بموت فيها

totit: ياترى بتشجع مين؟



مراد: الاهلي بدون منازع
علي الرغم اني لعبت زمان في نادي الزمالك ههههه

Zaza : هههههههه باللون الاحمر اهو
مراد تفتكر موقف مضحك مريت بيه؟

مراد: المواقف كتير بس اقرب موقف اني مره اني كنت بقراء الجريده وانا في المواصلات ولسه بقلب الصفحه لقيت واحد قاعد جانبي استنه شويا اني لسه مخلصتش قرائه

totit: مراد ازاى اتعرفت على منتدى ارثوذكس؟



مراد: اول مدخلت النت انا كنت بحب اوي افلام القديسين وكنت بدور علي فيلم معين ودخلت ارثوذكس ولقيت عندها اكتر مماكنت اتخليل وبعدين اقبل ما اخرج بعد ماخدت اللي انا عاوزه لقيت قسم عن تاريخ الكنيسه فرحت اوي وقعدت اقراء واقراء وبعدين لقيت نفسي لسه مخلصتش روحت مقرر اني ادخل تاني يوم لغايه لما اخلاص وموضوع يجر موضوع لغايه لما اصبحت ارثوذكسي صميم
هههههههه

Zaza : ههههههه طيب ياترى ايه اكتر حاجة شدتك للمنتدى؟

مراد: محبه الناس لبعضيهم هنا

totit: مين اقرب عضو لقلبك فى المنتدى؟



مراد: هم كتير اوي بس اكتر ناس قريبا اوي
سمسم وكيرو رافت و ا/ايمن وماروجرافيك وكيرولكس ونهي ونرموا
وجورج الفيلسوف
وميرا الامور امير وميكي
ومانو وعماد حسني وايمي وماري جرجس وmenovich وكتير اوي حقيقي مش عاوز حد يزعل لو نسيت اسمه لكنهم بجد اساس وجودي في المنتدي
وطبعا هيما

Zaza : مراد ايه هى اقتراحاتك للمنتدى؟

مراد: الاقسام اللي بدون مشرفين من فضلكم

totit: لو مراد حب يوعد ربنا بوعد يوعده بايه؟



مراد: اني اخدمك ياربي طول ما انا عايش

Zaza : مراد امتى بيحس بالندم؟

مراد: لما محسبش تكاليف مشوار بعد ما امشي فيها واجد نفسي اتورطت في امور اكبر مني

totit: لومعاك الرسايل دى تهديها ل مين؟

رسالة حب
رسالة عتاب
رسالة تهنئة
رسالة افتقاد


مراد:

رسالة حب؟
سمسم و كيرو رأفت

رسالة عتاب؟
لكتير من اغلي اخوات سابوا المنتدي رغم انهم علي النت في كذا موقع زي الفيس بوك

رسالة تهنئة؟
هي متأخره بس معلش للناي الحزين ميلاد بمناسبه جوازه

رسالة افتقاد؟
ميكي وامير وفادي ومانو

Zaza : مراد تقول ايه ل هيما مدير المنتدى؟

مراد: قبل ما اقوله عاوز اقول حاجه للناس اللي متعرفش هيما هيما يا جماعه هو الواحيد في المنتدي اللي بيشتغل في صمت صدقوني انه حتي الاقسام اللي فيها مشرفين الا انه بردوا بيساعدنا عن طريق توفير كل حاجه زي سيرفرات رفع زي برامج وكتير اوي انا بصراحه يا جماعه مقدرش اوفيه حقه
بس رسالتي ليه ربنا يكون معك يا هيما وياريت تشوف الاقسام اللي بدون اشراف ضروري

totit: وتقول ايه لاعضاء المنتدى؟



مراد: انا بحبكم جدا ياريت تكونوا مصدقني

Zaza : تقول ايه ل برنامجنا؟

مراد:ربنا يعوضكم علي تعب محبتكم وياريت تفضلوا تمتعونا ديما بحوارات مع اعضاء حقيقي الواحد نفسه يعرفهم

Zaza : نورتنا يا مراد وبنشكرك على محبتك وقبولك انك تكون ضيف معانا نتمنى لك كل خير وربنا يوفقك

انتظرونا فى حلقة جديدة وعضو جديد هاا نعرف عنه كل حااجه عاايزين اسئلة كتير لاننا ببساطة فتحنا الباب ليكم ومش ينفع اننا نسال فى كل حااجه

انتم عليكم الباقى

انتظرونا الحلقة القادمة مع برنامج الوجه الاخر

اميل البرنامج

[email protected]

مع تحيات

zaza2006

magdy totti

المصدر: †† ارثوذكس †† - من قسم: الموضوعات الشبابية

[aymonded]

مراد الأخ الحلو الذي أحبه من قلبي محبة ليست على مستوى الجسد وتقلبات المزاج حسب العواطف الإنسانية المتغيره ، بل محبتنا صارت روحية بغنى نعمة الله المنسكبة في قلوبنا بالروح القدس على حساب بذل ربنا يسوع الذي مات وقام وصعد بجسم بشريتنا ليجلس عن يمين الآب بمجد عظيم ...
أخي المحبوب سرني جداً حديثك الذي كشف عن شخصيتك الحلوة ومقدار شوقك لخدمة الله بإخلاص المحبة ، وقد طبعت في قلبي قبل ذهني شخصيتك الحلوة والتي يتضح فيها بصمات الله الحلوة ، والتي أطلب من الله أن يقويها فيك ويثبت كل السجايا الجديرة باللاهوت في أعماق قلبك مطهراً داخلك بكلمته الحية والفعالة التي تنقي القلب لمعاينة الله والتخلق بأخلاق المسيح الرب الذي صلبنا معه وأحضرنا فيه قديسين وبلا لوم أمام الآب في المحبة بغنى فيض الروح القدس الذي يأخذ مما له ويعطينا ...

أخي المحبوب سرني جداً حديثك وسروري الأعظم هو بمعرفتي بشخصك الجميل لأنك صرت أخاً حلواً لي كما للجميع ، قواك الله وأعانك في كل أمور حياتك ولمس كل أعمالك ومذاكرتك واعطاك نجاحاً لأجل مجد اسمه العظيم القدوس ...

أقبل مني كل احترام وتقدير لشخصك الفوق الرائع ، ولك مني أجمل تحية وأعظم سلام لشخصك المحبوب في الرب ؛ نعمة ربنا يسوع تغمر قلبك سلام وحرية وفرح سماوي لا يزول ...

[miro_rook]

المشاركة الأصلية كتبت بواسطة aymonded مراد الأخ الحلو الذي أحبه من قلبي محبة ليست على مستوى الجسد وتقلبات المزاج حسب العواطف الإنسانية المتغيره ، بل محبتنا صارت روحية بغنى نعمة الله المنسكبة في قلوبنا بالروح القدس على حساب بذل ربنا يسوع الذي مات وقام وصعد بجسم بشريتنا ليجلس عن يمين الآب بمجد عظيم ... أخي المحبوب سرني جداً حديثك الذي كشف عن شخصيتك الحلوة ومقدار شوقك لخدمة الله بإخلاص المحبة ، وقد طبعت في قلبي قبل ذهني شخصيتك الحلوة والتي يتضح فيها بصمات الله الحلوة ، والتي أطلب من الله أن يقويها فيك ويثبت كل السجايا الجديرة باللاهوت في أعماق قلبك مطهراً داخلك بكلمته الحية والفعالة التي تنقي القلب لمعاينة الله والتخلق بأخلاق المسيح الرب الذي صلبنا معه وأحضرنا فيه قديسين وبلا لوم أمام الآب في المحبة بغنى فيض الروح القدس الذي يأخذ مما له ويعطينا ... أخي المحبوب سرني جداً حديثك وسروري الأعظم هو بمعرفتي بشخصك الجميل لأنك صرت أخاً حلواً لي كما للجميع ، قواك الله وأعانك في كل أمور حياتك ولمس كل أعمالك ومذاكرتك واعطاك نجاحاً لأجل مجد اسمه العظيم القدوس ... أقبل مني كل احترام وتقدير لشخصك الفوق الرائع ، ولك مني أجمل تحية وأعظم سلام لشخصك المحبوب في الرب ؛ نعمة ربنا يسوع تغمر قلبك سلام وحرية وفرح سماوي لا يزول ...

ميرسي خالص لكلامك الجميل ا/ايمن وبجد يسعدني ان حضرتك اول واحد يقول في حقي كلام الوحد بجد ميستهلوش ربنا يخليك لينا وميحرمناش منك ابدا

[rookaa_m]

ميرسي ليكم علي الحلقه الجميله ديه
وبجد مراد انسان رائع وكمان زميلي في الكليه
ووحقيقي كانت حلقه حلوها جدا
ربنا يخليكم

[elphilasouf]

ايه الى مش عجبك في المنتدي ؟!

[menovich]

حوار جميل جدآآآآآآآآآ مع عضو مميز ونشيط فعلآ مراد شخصية رائعة ومجهودة كبير

ما هو مخاوفك من الغد ؟؟؟

ميرسى ميدو ونهى على البرنامج الممتاز

الرب يبارك حياتكم ويفرح قلوبكم

[emmmy]

Zaza : مراد دموعك قريبه ولا لا؟

مراد: بصراحه مش بالظبط لان دموعي محدش بيشوفها غيري انا وبس



كتمان الدموع قدام الناس نوع من انواع الكبت يا مراد
يعنى ممكن جدا تبقى تعبان ومش هيرحك الا الدموع فى اللحظة دى لو كتمتها علشان انت متصور انها ضد رجولتك هتتعب جدا دموع الرجل بصفة عامة غالية جدا جدا لانها مش بتكون لاى سبب زى المراة
على فكرة
دة مجرد راى اوعى تزعل منى

totit: لو مراد حب يوعد ربنا بوعد يوعده بايه؟



مراد: اني اخدمك ياربي طول ما انا عايش


اللة على تفكيرك يا مراد حقيقى عجبتنى اوى
مجرد انك تبقى عايز تبقى خادم للمسيح حقيقى دى فى حد ذاتة بداية جميلة
اقتربوا الى اللة يقترب اليكم

Zaza : مراد امتى بيحس بالندم؟

مراد: لما محسبش تكاليف مشوار بعد ما امشي فيها واجد نفسي اتورطت في امور اكبر مني

معلش بس هتستفاد برضوا من تجارب الحياة
اكيد الخسائر مش بيكون معمول حسابها بس ما اروع دروس الايام والزمن والتجارب حقيقى بتقوينا يا مراد


شخصيتك جميلة يا مراد حقيقى اسمتعنا بالحلقة الجميلة دى
واتعرفنا على شخصية جميلة اكتر
ربنااا معاااك وتبقى مهندس اد الدنيا ههههههههه

ممكن سؤال بقى
لو اكتشفت ان خطيبتك فى حياتها ماضى وكانت بتحب واحد تانى بس نسيتة خلاص وبقى مجرد ماضى وهى مش قالت لك عنة لسبب انها مش عايزة تفتح صفحات اتقفلت وشايفة انها خلصت وكانت مرحلة وعدت
هتزعل وتعاتبها ويمكن تسيبها علشان المفروض كانت تقولك
ولا لا هتعتبر ان دة عادى وطبيعى
رد فعلك هيكون اية ؟
جاوب وبصراحة انت مقبوض عليك لحد ما تجاوب هههههههههه

[emmmy]

ايه الى مش عجبك في المنتدي ؟!

ماهو قالك يا فيلو

[miro_rook]

المشاركة الأصلية كتبت بواسطة rookaa_m ميرسي ليكم علي الحلقه الجميله ديه وبجد مراد انسان رائع وكمان زميلي في الكليه ووحقيقي كانت حلقه حلوها جدا ربنا يخليكم

ميرسي خالص يا روكا علي الكلام الجميل ده
ربنا يخليكي ويباركك

[miro_rook]

المشاركة الأصلية كتبت بواسطة elphilasouf ايه الى مش عجبك في المنتدي ؟!

صدقني يا فيلو المنتدي بيعجبني في كل حاجه بس اللي مش بيعجبني بصراحه اوي
ان في اقسام مهمه جدا جدا في المنتدي ومفيش غير قليل اللي بيهتم بيه
زي اقسام الابائيات وكدا وده نتيجه عدم وجود مشرفين علي الاقسام ديه
بس فانفسي ان اقسام المنتدي كلها يكون فيها مشرفين