[bisho03]

قالوا كريسماس ... قلنا العيد
هنجيب طبعا لبس جديد
وهنتفسح .. نخرج شلة ..
نعمل دوشة وظيطة وحفلة
وجايز برضه نأجر فيل
او خرتيت..
انا مش عارف بالتحديد
لبس جديد
قلنا اكيد هنروح السيما
ونشوف فيلم الموسم هيما
ولا اقولك نطلع بينا
على اى ملاهى ونتفسح
فسحة وتبقى عليها القيمة
ونجيب شيش و شاورمة وبرجر
نعمل ليله ونروح نسكر
نصرف اكتر و اكتر واكتر
يوم العيد

وف يوم العيد
كل الدنيا راح تتبسم
كله ماعادا ست بيوت
أصل الفرحة اخدت منهم
حتى القوت
قوت افراحهم اللى هجرهم
واللى حايشهم كان الموت
من سنه كاملة
ولا فرحوش
صوت اناتهم مابيسكتش
دمع عيونهم مابينشفش
واما بيسكت يبقى سكوت
فين الحق
ليه قتالهم ماتحاكموش
ليه التأجيل من يوم للتانى
وعدو شهور يتحسبو ثوانى
ومتعدموش؟؟

ايوة بطالب بالاعدام
اللى بيمسك مدفع آلى ويقدر يقتل
مش كده برضه اسمه حرام
وأصله حرام على بلد التقوى
تِمُرّ أًمورنَا مُرُورهَا كِرام
واللى قتل مروة الشربينى
شوية كفره - ده بتأويلهم - يبقوم أعدل فى الاحكام
ايه ياقضاء ؟؟
خيبتك بانت ولا دى خيبه عشاننا وبس ؟
نفسى فى مره ياعم تحس
بالغليان
يوم ورا يوم بيعدى فى قصه مصيرها ده محتوم بالاعدام
ونجيب شاهد .. هوبّا الشاهد قال ايه قاعد ف الحمام
قوم تتأجل بالشهرين..؟
مخيمر فين ؟
اصل مخيمر دة الفراش
اللى بيمسح الحمام
هاتلى شهود ان الكمونى عنده امساك
هوبّا مخيمر لف وداخ
علشان ملقاش
قوم تتأجل تانى شهرين
بقى معقول ؟؟
حد يصدق ان الحكم ده كله يطول
طب هنعيّد بس ازاى ؟
مين يضمنلى مفيش كمونى ولا حمام ؟
مين هيشكك اللى قتلنى يكون مختل وعنده جنان؟
مين يضمنلى ان العدل ما هوش معوج ؟؟
وان المقتول فى القضبان!!
سلو بلدنا
اللى معاه واسطة ميتذلش
واللى معاه الغول كسبان
ايه يا حكومة
مش عارفين تسوقوها قولولنا
ولا بمزاجكو تمشونا ؟؟
ولا هنعملها بتنجان؟؟
انا مش عارف ..
خايف اطلع يوم العيد والاقى رصاص كده ف المليان
انا مش خايف م الموت ابدا
بس انا خايف ع الانسان
ليه الوعظ فى كل زوايا فى مصر مندد بالكفران
ليه بتقولو ان احنا ضيوفكم
وان القبطية دى بلدكم
ودى مش مريم
علشان تدوها لوكيلكم
لما فتحها ابن العاص كانت قبطية
وفضلت برضه زى ماهى
لسه الارض بتنطق قبطى
لسه النيل يسقيها المية
وان بيوتنا تحت بيوتكم
ييجى العيد و ف 7 يناير
اول سنه من بعد النكسه
قصدى الوكسه
بعد ما كل الناس كده امنت
ان مفيش ف بلدنا عداله
وان كلامهم ده قصص فاكسة
وعايزة عيال تسمع بريالة
واننا مالناش غيره الواحد
فوق فى سماه
هوه فى ايده القدره ينفذ
حتى ولو حكم الاعدام
الاعدام

المصدر: †† ارثوذكس †† - من قسم: القسم الادبي

[emmmy]

موضوع لذيذ جدا
بس متخافشى يا بيشو
ان كان اللة معنا فمن علينا
احنا مش بنخاف من موت
ابواب الجحيم لن تقوى عليها
افرح بملاد يسوع وطفل المذود قادر يحفظك ويفرحك
كل سنة وانت طيب
ومرسى لكلماتك الجميلة ربنااا معاااك

[اشرف وليم]

قصيدة معبرة وجميلة
الرب يبارك حياتك

كل الاشياء تعمل معا للخير للذين يحبون اللة

[كيرو رافت]

ايه يا بيشو ده
قلبت عليا المواجع
يا حبيب قلبى ليه متدايق وليه زعلان من احساسك بالظلم والطغيان
موش هو الرب بلسانه قال اننا هانشوف من ده كتير
واننا هانوصل لمرحله ان كل من يقتلنا او يظلمنا يفتكر فى نفسه انه
بيقدم خدمه لربنا
يا جماعه كل اللى بيحصل ده تاكيد لكلام لربنا وكل ما بيحصل ايمانى بيزيد وبتاكد من صدق المواعيد
يا جماعه بجد الارض موش لينا ولا ميراث من اهالينا احنا لازم نبص لفوق
لميراثنا الابدى اللى عشانه ندوق الظلم ونستحمل الطغيان بفرح ومسره