نفسى اعرف ايه السبب

سلام لجميعكم
شكرا جدا على فكرة حوار من الاعماق ربنا يبارك خدمتكم
بصراحه انا جوايا حاجه كان نفسى اعرف سببها من زمان
والطريقه ده اتاحت ليا كتير
بس نفسى اتكلم ونفسى اعرف هو ليه بيحصل كده معايا
وهل ده عادى ولا لاء؟
الحقيقه انى ساعات بمر بمرحلة اعجاب بشخص ما وتعدى عليا فتره بحس انه كويس جدا وبصراحه ده بيلفت نظرى لما بحس باهتمام منه ولو بسيط لكن انا بأعجب جوايا بس ممكن تفتكروا انى برسم لنفسى كده او بحسس نفسى بحاجه مش صح من ناحية الاهتمام بس بصراحه مش انا بس اللى باخد بالى
انا ساعات باخد بالى ومركزش علشان مش بحب احط فى بالى حاجات ملهاش اساس لكن صحباتى ممكن يحسسونى بده لما يتكلموا قدامى وكده
المهم انى بحس بالاعجاب ده لكن بيكون مجرد وقتى لانى بعد ما بحس انى مشاعرى بدأت تتحرك بأقف قصاد ربنا واطلب منه بدموع انه مايخلنيش اتعلق بالشخص ده وبقاوم نفسى وفعلا بنسى هذا الشخص وده كله برضوا جوايا انا مش بصرح لحد على اى حاجه انا بحكى مع ربنا والبابا كيرلس
المشكله ان الحكاية ده ممكن تتكرر لما احس ان شخص تانى بيهتم بيا وكده وبتعلق بيه جوايا فتره وباخد فتره علشان اطلع نفسى من الشعور ده وبحاول ابعد
كنت دايما بسأل ربنا ليه ادتنى مشاعر تتحكم فيا؟؟ وبكلمه بدموع ؟؟
عاوزه اقولكم على حاجه يمكن يكون بيلفت نظرى فى اى شخص قربه من ربنا و احترامه واهتمامه بيا
وفى وقتا ما اعجبت بشخص لكن ماكنتش بقدر اطلعه من جوايا لانه كان كل يوم بيكبر فى نظرى اكتر لما بشوفه بيعمل موقف كويس مع اى حد
وزاد جوايا تعلقى بالشخص ده وحاسيت با هتمامه بيا على الرغم انى مش بتعامل معاه الا قليلا جدا حتى صحبتى حاست باهتمامه نحيتى
ولانى بصراحه معجبه بيه فاكيد صدقت الاهتمام ده
كنت كل يوم ببكى لربنا يارب انا ضعيفه يا تخلينى انسى الشخص ده يا تخلينا نكون لبعض
وعدت ايام ورا ايام وسنين وانا خلصت كليتى وهو لسه جوايا لكن بنسيه لنفسى واصلى لربنا نفس الصلاه
وحاولت انى انساه فعلا لانه لو كان عاوزنى كان اتقدم وخلص واخدت قرار انى لازم انسيه لنفسى
المهم
فى يوم اتقدملى شخص كويس جدا
قعدت معاه وارتحتله وهو كمان ارتحلى
جه يوم انى اخد قرار وكنت خايفه كانت جوايا مشاعر مختلطه
ياترى هحبه ياترى هقدر اسعده هو شخص جميل جدا
وفى نفس الوقت جوايا شعور بيقولى طب ماتدى فرصه تانى للشخص التانى يمكن يتقدم
بصراحه حاسيت انى بضحك على نفسى هفضل استنى الى متى ؟؟
والشخص اللى متقدم حد رائع و انسان جميل
طلبت من ربنا انه يتدخل فى الموضوع
قولت لربنا يارب لو انت شايف ان الشخص ده هو اللى هكون سعيده معاه حسسنى بده اكشفلى يارب
طلبت بصلوات حاره وطلبت من ربنا انه كمان يساعدنى ان مفيش لحظه يجى الشخص التانى على بالى وانه يساعدنى انى انساه
وفعلا حاسيت بارادة ربنا وكمان البابا كيرلس كشفلى بطريقه عجيبه عن انه بيطمنى من ناحية الارتباط د وفرحت جدا
وفعلا اتخطبت للشخص ده و مبسوطه
لكن كل شويه بتعدى جوايا مراحل خوف ياترى انتى اخترتى صح ياترى مش هتندمى
ياترى هتكونى سعيده مع العلم انى مبسوطه مع خطيبى الا بعض الاوقات بيبقى فيها شد واعتقد ده عادى مش غريب
لكن الخوف اللى جوايا مش سايبنى
خايفه يحصل جوايا زى ما كان بيحصل زمان
خايفه فجأه الاقى مشاعرى متلخبطه
خايفه لانى مش هسمح لنفسى لانى دلوقت لازم اكون امينه على كل فكره بفكرها لان ده امانه اتجاه خطيبى
قوليلى من فضلكم ليه بيحصل كده
كنت بتمنى ابقى زى البنات العاديين
بس اللى عاوزه اقوله انى بجد بحب خطيبى واكتر حاجه بتشغل بالى ان اكون مصدر سعادته
صلوا من اجل ضعفى