[menalove2031]

المشهد الأول : ( فى الجامعة )

جون :يا أعوز بالله يارب أخيرا الواحد ارتاح من الثانوية وقرفها
توني : ياريت يا أخي ما تجيبش السيرة دية أحسن الواحد عايز ينسى .
جون : عندك حق ده حتى الواحد لما بيسمع سيرة الثانوية العامة دية بيجيلوا مغص.
توني : طيب يبقى أقفل على السيرة دية عشان النهاردة أول يوم فى الجامعة ومش عارفين مكان الحمامات .
جون : بس أيه النظام .
توني : نظام أيه بالظبط .
جون : مفيش ولا بت شدتني أو لفتت نظري ، أمال بس عماليين يقولوا تجارة بنات وحركات ، ولا شوفنا أي حاجة .
توني : أنت جاى سخن من أولها أتك على الصبر ، أحنا قدمنا 4 سنين بحالهم .
جون : بص أنا مش عايز أضيع ولا لحظة عايزين يا أخي نعوض الكبت إللى كنا عايشين فيه .
توني : بص هناك كده مش ده الواد جرجس نواعم .
جون : أه هو أبن الأيه ما بيضيعش وقت .
توني : يا عم اسكت ده كل البنات اللي يعرفهم ماقشفين خالص .
جون : يا عم هو إحنا لاقين مقشفين ولا غير مقشفين .
توني : إلي مجنني أن الواد ده مش طبيعي وتحس كده أنه مش متظبط ومع ذلك بيكلم بنات بالعبيط .
جون : ما هو النوع ده هو اللي ماشي دلوقت مش عارف أيه اللي جارى للبنات شكلهم أتحوالوا.
توني : عندك حق يا ابني البنات كلها بقى عندها عمى ألوان ومبتكلمش ألا الفرافير وسايبه الرجالة
جون : ده إللي هو إحنا .
توني : آه طبعا
جون : ماشي يا عم المان المهم عايزين نروح نسلم على الواد جرجس ده عشان يعرفنا على الكام قطة إلى معاه .
توني : يا عم ده كل البنات اللي واقف معاه من ايام الستينات ومش استايل .
جون : ياعم مش مهم أه حاجة تطري القاعدة بدل ما إحنا واقفين ذي قرد قطع .
توني : بص أنا هاجي معاك بس مش هتكلم ماشي .
جون : ماشي ياعم انا إللي هتكلم ياله بقى .
جون : أهلاً ......جرجس رجولة أزيك يا برنس عامل ايه .
جرجس : أزيك يا جون ، أزيك ياتوني.
توني : أنا تمام الحمد لله .
جرجس : اه لما أعرفكم كرستين وناردين وأنجي .
توني و جون : تشرفنا
جرجس : توني... وجون
كرستين وناردين وانجي : فرصة سعيدة
جون : أحنا الأسعد
جرجس : على فكرة كرستين ناردين من كفر الشيخ ومعانا فى كلية تجارة
جون : كفر الشيخ مش ديه إللي جنب كفر البطيخ .
كرستين : الله أيه العسل ده
جون : عسل وطحينة .
توني( يهمز جون ): ايه ياعم الكتكوت الأيفهات الحامضنة ديه أنا اتخنقت
جون ( يهمز توني ) : يا عم أخبط أي كلام فى التلاتيني.
جون : أمال انجي منين
انجي : أنا من بني سويف
توني : أمال انتوا نازلين فين ولا بتيجوا وتسافروا.
انجي : لا طبعاً نيجى ونسافر أذاي احنا نازلين مع بعض فى الكنيسة
جون : أمال انتوا اتعرفتوا على جرجس أذاي .
جرجس : انا اتعرفت عليهم من اجتماع الشباب بتاع الكنيسة
كرستين : بس أنت بتسأل ليه .
جون : لا ابداً اصل انتي وناردين من كفر الشيخ وانجي من بني سويف فا انا قولت ايه إللي لم الشامي على المغربي.
جرجس : هو مش ميعاد المحاضرة بدأ ولا أيه
ناردين : اه ده زمان الدكتور دخل المحاضرة
جون : ايه يا جماعة انتوا سخنين أوى من أولها ليه ده إحنا فى كلية تجارة يعني المحاضرات والسكاشن وكل ده كلام فاضي ومحدش اساساً بيحضر .
جرجس : ياعم مين قلك كده على الأقل نحضر ونشوف المواد بتكلم عن ايه.
انجي : على كده انتوا مش ناوين تحضروا.
جون : لا نحضر أيه لسه بدري على حكاية الحضور ديه السنة لسه طويلة .
ناردين : طب المفروض أن أحنا نستأذن دلوقت عشان منتأخرش على المحاضرة .
[يودع جرجس وناردين وانجي وكرستين توني وجون] .
جون : أنا عايز اطلب منك طلب وتحققه ليا .
توني : طلب أيه بالظبط
جون : عايزين نروح اجتماع الشباب بتاع الكنيسة .

المشهد الثاني : ( فى الكنيسة ).

توني : ادينا ياعم جينا اجتماع الشباب ها وبعدين هنخش نحضر
جون : نحضر ايه احنا نفضل واقفين بره لغاية ما يخلص الاجتماع
توني : طب حتى تعالى نخش نصلي ابانا الذي فى الكنيسة اه يبقى اسمنا اخدنا بركة
جون : يعني أنت الايمان حل عليك مرة واحدة على العموم عايز تخش تصلي روح وانا مستنيك هنا
توني : خلاص وانا هروح لوحدي
جون : استنى بقى عشان شكل الاجتماع خلص
كرستين : أزيك ياجون..... أزيك ياتوني هو انتوا محضرتوش ولا ايه
توني : لا أ........
جون[ يقاطع توني ]: أصل أحنا منعرفش ميعاد الاجتماع فجينا متأخر
كرستين : لا المرة الجاية تحولوا تيجوا بدري لان الاجتماع حلو قوى
جون : انشاء الله أمال فين ناردين وانجي .
كرستين : كسلوا يروحوا قال قاعدين بيذاكروا المحضرات اللي خدوها
توني : دول شكلهم دحيحه وناوين على تقديرات
كرستين : صدقني الحكاية مابتتحسبش كده يعني هى حبكت المذاكرة فى وقت الاجتماع طب ماحنا بيبقى قدمنا طول الاسبوع فاضي ومش ورانا حاجة وبنضيع الوقت قدام التليفزيون أو فى الخروج لكن أول مايجي ميعاد الاجتماع بنفتكر كل حاجة سيبنها.
توني : أصل ده مستقبلنا كلنا عايزين نتخرج ونخلص بدري بدري
كرستين : هو انا قولت فى كلامى اننا لازم نسقط او نشيل مواد انا بقول انا الساعة او الساعتين بتوع الاجتماع مش كارثة يعني .
جون : اصل يا كرستين ياريت الحكاية على قد ساعتين الاجتماع لكن ده ساعتين قبل الاجتماع بيضيعوا فى اللبس و ساعتين بعد الاجتماع بيضيعوا فى الوقفة مع صحبنا .
توني : اه.... جون عنده حق يعني الاجتماع بيضيع اليوم كله تقريباً
كرستين :ما هو مش ذنب الاجتماع انكوا هضيعوا وقت قبله أو بعده تاني حاجة لازم نخصص يوم لربنا يعني اذاي نبقى خايفين قوى على مستقبلنا ومش خايفين من إللي بأيده المستقبل ده.
جون : ايه الكلام الكبير ده بصي أحنا هنضيع الوقت كله فى الكلام عن الاجتماع ومشاكل الاجتماع
كرستين : خلاص ماشي براحتكم..... على فكرة انتوا فايتكم محضرات كتير جدا انتوا تقريباً محضرتوش ولا محاضرة.
جون : اه خرجنا من الاجتماع دخلنا فى الجامعة.
توني : أصل أحنا مرتبين أمورنا اننا على اخر شهر هنصور المحضرات وهنعد نذاكر .
كرستين : على فكرة ده مش صح لأن طلما مدخلتش وحضرت المحاضرة لما تيجي تذاكر هتحس أن كل حاجة تقيله عليك ومش فاهمها لأن كتير اوى الدكاترة بيقولوا كلام فى شرحهم مينفعش يكتب لكنه مهم عشان تفهم المادة
جون : يا سيتي سيبك من الكلام احنا عارفين هنعمل ايه
كرستين : على العموم براحتكم بس المهم ما تجوش تندموا فى الاخر
جون : لا متقلقيش كرستين ممكن أسالك سؤال.
كرستين : اتفضل اسال
ناردين وانجي : ازيكوا ياجماعة عمالين ايه
توني وجون وكرستين : تمام الحمد لله
كرستين : ما اديكوا نزلتوا يعني.... مش قولتوا انكم هتعودوا تذكروا
أنجي : تصدقي يا كرستين من ساعة ما انتي نزلتي واحنا مفتحناش كتاب قاعدنا نتفرج على التلفيزيون ونحكي شوية ومذكرناش ولا كلمة
كرستين : يعني مرحوتوش الاجتماع وكمان مذكرتوش
ناردين : صدقينى احنا كان عندنا النية نذاكر بس مش عارفه ايه إللي حصل .
كرستين : ياله حصل خير عشان بعد كده تبقوا تحضروا الاجتماع ......زصحيح جون كنت عايز تسأل فى ايه .
جون : اه فكرتينى وكويس ان ناردين وانجي جهم علشان يشاركونا فى الموضوع ده
انجي : موضوع ايه
جون : كانت عايز أعرف ايه رأيكم فى الارتباط.
كرستين : ارتباط ايه بالظبط !
جون : الارتباط
توني : قصد جون ارتباط ولد وبنت .
كرستين : اه ....وتحب تعرف رأينا من أنهي ناحية.
جون : يعني من ناحية أنكوا ممكن تقبلوا حاجة ذي كده ولا لأ وحاجات دية يعني.
ناردين : طب أنت أيه رأيك.
جون : والله انا شايف الارتباط ده حاجة عادية وعلاقة normal خالص بين ولد وبنت ذي علاقتنا ببعض كده الفرق بس أن الولد والبنت دول بيبقى ليهم مواضيع خاصة بيهم ذي تفكيرهم فى المستقبل واذاي يطوروا علاقتهم بحيث انها تبقى علاقة رسمية خطوبة أو جواز .
كرستين : على فكرة يا جون انت سألت السؤال وجاوبت على نفسك لما قلت اذاي يطوروا العلاقة ديه بحيث أنها تبقى رسمية معنى كد ان ديه علاقة مش رسمية يعني محدش بيعترف بيها .
توني : طيب ما احنا علاقتنا ببعض مش رسمية .
انجي : مين إلي قال كده أحنا علاقتنا علاقة صداقة وهو ده الاطار بتاعها يعني علاقة معترف بيها ومفيهاش أي اساءة للولد أو البنت مادامت جوه الأطار بتاعها.
جون : طيب ما الارتباط برده مفيهوش أساءة للولد أو البنت بالعكس ديه علاقة عادية وممكن تنتهي بالنجاح.
ناردين : مين إللي فهمك كده طيب هو الأرتباط بين ولد وبنت المفروض تكون أخرته أيه .
جون : يعني على الأقل فى الأول خطوبة وبعد كده الجواز.
ناردين : أنا همشي معاك للأخر نفترض أن العلاقة بين ولد وبنت نجحت ووصلت للخطوبة تعرف أيه إللي هيتقال انه بعد مالفوا ومشيوا مع بعض فى الأخر أتجوزا وخد عندك بقى القصص والحواديت إللي هتتعمل على الأتنين وحليني على ما الناس تنسى .
أما بقى لو الاتنين ارتباطوا وسابوا بعض فالأتنين هيضروا لكن يمكن تكون البنت أكتر لآن ديه حاجة هتسئ لسمعتها وهضر بمستقبلها وهتكون دايماً فى قلق وخوف من أن حد يتقدملها يسأل و يعرف الحكاية.
أما الولد فهيتعرف عنه أنه بتاع بنات وبيرتبط ويسيب عشان كده ممن بنات كتير ترفض انها ترتبط بيه حتى لو كان ارتباط رسمي لانها مش هتبقى مأمنه على نفسها معاه وهتحط فى دماغها أنه فى أي وقت ممكن يسيبها.
توني : ياه كل ده...... تعرفي يا ناردين كل الكلام إللي قولتيه بيدور حولين الخوف من كلام الناس واحنا مهما عملنا مش هنقدر نرضي كل الاذواق وفكل الحالات الناس بتتكلم فماينفعش نربط مصيرنا بالناس هتقول ...والناس هتعمل...ده مبدأ مش صح
كرستين : على فكرة ناردين مبتقصدش اننا نعلق مصيرنا بكلام الناس لكن الناس دول عايشين وسطينا انا مثلاً يوم ماهيجيلي حد يتقدملي هيكون من الناس ديه يبقى أحنا ما ينفعش نعمل إللي أحنا عايزينوا ونقول أصلا كلام الناس ما يهمناش......ز أنت نفسك وانت رايح الجامعة أو الكنيسة بتتشيك وتحط جيل وبرافان وتبقى على سنجة عشرة عشان أيه ؟ عشان مظهرك قدام الناس وأول ماتخش الجامعة بتتمنى أن كل الناس تعجب بيك ويقلولك الله أيه البرافن الجميل ده ولا التسريحة الفظيعة ديه والبنات نفس الحكاية كل واحدةوهى جاية الكنيسة أو رايحة الجامعة بتلبس إللي على الحبل وتعمل شعرها وتحط مكياج كل ده عشان تلفت نظر الناس ليها وده دليل على أن كلام الناس ورأيهم مهم أوي لينا ودايماً بيجي فى بالنا فمينفعش عشان نبرر الغلط نقول أصل كلام الناس ميهمناش والناس كلها بتتكلم يعني كأننا بنحلله فى حاجات وبنحرمه فى حاجات تانية على حسب أهوائنا .
جون : ماشي يا كرستين انا مقتنع بكلامك لكن لو نفرض أن اتنين بيحبوا بعض وميقدروش يستغنوا عن بعض لكن الظروف مش سامحة ان يكون فيه ارتباط رسمي فى الوقت الحاضر يعملوا ايه ؟؟
انجي : بص يا جون فى الأول أو الأخر كل واحدة هتاخد نصيبها وكل واحد هياخد نصيبه ولو ربنا مش عايز حاجة تتم مش هتم ومعظم العلاقات ديه مش بتم لآن ربنا بيبقى عايز يعاقب إلى ماشيوا فى الطريق ده وضيعوا وقتهم فى العلاقات ديه .
كرستين : بص يا جون قصر الكلام مفيش مانع أني أعجب بالشخص ده أو الأنسانة ديه ، لان ديه حاجات بتصدفنا كتير جداً حياتنا لكن ممكن أدخل الإعجاب ده فى أطار الصداقة ولو أحنا لينا نصيب نكون لبعض يبقى هنكون لبعض فى الوقت المناسب .
توني :بصراحة يا كرستين كلامك مش واضح أو مش مفهوم يعني أنا بحب وحدة فالمفروض العلاقة إللي مابينا تكو علاقة صداقة وبس طيب هي هتعرف أذاي أني بحبها أو أنا هعرف أذاي أن هي بتحبني .
كرستين : بص يا توني الحب ده حاجة بتتحس يعني نفترض أنك رايح ترتبط بواحدة أنا متأكدة انك مستحيل تتجرأ وتتطلب منها الحاجة ديه إلا لما تكون حاسس ناحيتها بشئ معين وعندك ثقة أنك لو فاتحتها توافق ومش هتصدك والحاجات ديه بتبان من التعامل ومن طريقة الكلام ومن بصة كل واحد للتاني و الحاجات ديه هي إللي بتخلى الشخص ده يرتاح للأنسانة ديه ويفكر فى الارتباط بيها.
جون : بردوا فين الحل ، يعني أنا معجب بواحدة وهي معجبة بيا نعد طول الوقت نسبل لبعض لغاية ما ربنا يفرجها علينا.
ناردين : لا بس طلما انت اتاكدت او حسيت ان الانسانة اللي انت عايز ترتبط بيها بتبادلك نفس الشعور فأنت ممكن تحافظ على الاحساس ده طلما انت واخد الموضوع بجد وتحاول فى الفترة ديه تبرز مواهبك وامكانيتك اللي تخلي بيهاالبنت اللي بتحبها تتشدليك اكتر وتحاول دايما تتطور من نفسك وسلوكك وفى الوقت المناسب اللي تكون قادر تاخد فيه خطوة رسمية تقدر تفاتحها فى الموضوع ويكون الارتباط بشكل رسمي وخد بالك ان دايماً البنات بتفضل الانسان اللي تعرفه وتعرف طبعه وسلوكه اكتر من الشخص اللي جاي يتقدم لمجرد إعجاب بالشكل أو اللبس أو حتى المستوى من غير ما يعرف شخصية وطبع الانسانة إللي جاي يتقدملها لانها بتحس أن الشخص اللي هى تعرفه من زمان جاي يتقدملها عشان شخصيتها وسلوكها مش عشان الحاجات الخارجية اللي بتموت وبيروح تأثيرها بعد الجواز .
جون : بصوا أنا بصراحة اقتنعت ومقتنعتش لان من ناحية المنطق والمفروض يتعمل كلامك هو اللي صح لكن من ناحية الحب والمشاعر اللي بتبقى فى الواحد أنا شايف أن الارتباط بيكون هو المناسب.
انجي: على العموم أحنا ردنا عليك من وجهة نظرنا اللي شايفنها صح
توني : أفهم من كده أن انتوا رافضين فكرة الارتباط خالص.
ناردين : لا احنا رافضين فكرة الارتباط المباشر بين الولد والبنت من غير ما تكون فيه حاجة رسمية.
كرستين : بس يا جون ايه سبب انك انت فاتحت معانا الموضوع ده انا حاسه أن وراه حاجة.
جون : لا صدقيني هي بس الحكاية ان انا من ساعة ما دخلت الجامعة ومعظم المواضيع اللي بنتكلم فيها انا وصحابي الولاد بدور حولين الارتباط والحب وده معجب بديه .......وديه معجبة بده بس فحبيت اعرف البنات بتفكر فى الموضوع ده اذاي بس الظاهر اني اخترت بنات مقعدة .
انجي : يا سلام على العموم لو كنت بتسمي ده تعقيد فياريت تكون كل البنات مقعدة كده زينا وميدوش ودانهم للشباب التافهة اللي زيك .
توني : ايه ده انتي بتغلطي ولا ايه شكلك كده بتلعبي فى عداد عمرك
انجي : يامي يامي يامي لا بجد خفت.
توني : ماشي يا انجي مسيرك تتذنقيلي يوم وساعتها هزل انفاسك.
انجي : انا اتزنقلك انت..... ليه هبقى محتاجة منك محضرات ولا هبقى عايزك تذكرلى ده انت والحزين التاني اللي جنبك متعرفوش عندنا كام مدة ولا حتى تعرفوا اساميهم .
جون : انتي بتزلينا ولا ايه بكرة نجيب تقدير اعلى منكوا كلكوا ونزل انفسكم فى نفس المكان ده و ( الشجرة ) ديه تشهد علينا.
كرستين وناردين وانجي : ههههههههههه لما نشوف .

المشهد الثالث : ( فى الكنيسة فى نفس مكان المشهد الثاني )

كرستين : اشهدي ( يا شجرة) سجل يا تاريخ
ناردين : احنا هنجيب تقديرات اعلى منكم
انجي : وهنزل انفسكم
توني : حقوا تشمتوا بس احنامش هنسكت وهنقدم تظلم
ناردين : تظلم في ايه ولا ايه ده هما خمش مواد عمي شلتوا منهم اربعة و جبيتوا فى الخامسة لام موجب
كرستين : يعني المادة الوحيدة اللي نجحتوا فيها كنتوا شايلنها واترفعت
انجي : بس بجد انا عرفت دلوقت ان انتوا صحاب بجد وبتحبوا بعض خالص
جون : ليه بقى انشاء الله
انجي : اصلكوا جايين نفس التقديرات فى نفس المواد 3 ضاد جيم وواحدة ضاد وواحدة لام موجب
كرستين : تصدقي صح تحسي ان نموذج الاجابة بتاعهم كان واحد او كانوا غاشين من بعض
جون : على العموم اتريقوا براحتكم ما هي ديه الاخوة
ناردين : طيب انتوا مضيقين ليه دلوقت مش انوا اللي عملتوا كده فى نفسكم لا كنتوا بتحضروا و بتجيبوا كتب وطول الوقت خروج وسهر لازم تبقى ديه النتيجة.
توني : طيب نعمل ايه ده احنا سيبنا لكل مادة اسبوع بحالة.
ناردين : يابنى انت المواد ديه كنت اول مرة تمسكها وتشوف شكلها انت اساسا لما حد كان بيجيبلك ورق مكنتش بتعرف ده بتاع مادة ايه فاذاى عايز تلم المادة وتحفظها فى اسبوع .
جون : على العموم اللي حصل حصل هنعمل ايه
كرستين : ماشي عشان بس متبقوش تفردوا قوى وتقولوا احنا هنجيب تقديرات ومش هنجيب تقديرات وعلى راي المثل اللي بيته من ازاز ميغيرش فى الصلون.
ناردين وانجي : ههههههههههه
توني : مبسطوين قوى طب حطوا نفسكوا مكانا
ناردين : طب وسع .
توني : ليه
ناردين : عشان أقف مكانك.
توني : ماشي ياخفه
ناردين وكرستين وانجي : ياله تعيشوا ومتخدوش غيرها.

المصدر: †† ارثوذكس †† - من قسم: القصص النصية

[بنت الفادى الحبيب]

[بنت الراعي]

هههههههههههه
دمها خفيف اوووووووووووي
وفي نفس الوقت فيها هدف ورساله
ميرسي يا مينا
ربنا يعوضك وحقيقي تسلم ايدك

[مصدع هريدي مصدع]

حلوة يا مينا تسلم ايديك بجد

[eng_fofa]

راااااااااائع يامينا
تسلم افكارك
ربنا معاك

[zaza2006]

شكرا مينا ربنا يعوضك

[ELMAGEK]

موضوع جميل اوى يا مينا بجد في كتير من الى بيحصل
وخصوصا الاربع مواد
ههههههههههههههههههههههههه ههه
مرسى يا باشا على الموضوع الجامد دا
بجد جمييييييييييييييييييييييي يييييييييييييييييل

[mr_desigen]

جااااااااااااااااندة اخر حاجة بجد
ربنا ينمى موهبتك
امير

[kottah_sh]

بجد جميله اوووووووى
وفيها رساله واضحه
ربنا يباركك وينمى موهبتك كمان وكمان

[mero monir]

ههههههههههههههههههههه لا بجد جامدة مووووووووووووووووت
دمها خفيف اوى تسلم ايدك وتكتب كمان وكمان
وفعلا فيها هدف واضح اوى بجد جامدة اخر حاجة
ربنا معاك