[M@@@NOOOO]

طول عمرنا عارفين إن الانتحار حرام وعيب ومايصحش، والغريبة إنه ضار جداً بالصحة، ده غير إنه كمان بيودي النار، لكن المفاجأة الذكية اللي اكتشفناها مؤخراً إن فيه انتحارات جديدة لانج نزلت السوق مؤخراً مابتوديش النار؛ لأن اللي ميت منتحر الحكومة بتسميه شهيد .. هنا 5 أنواع للانتحار بيدخلوا الجنة..



الطريقة الأولى:
لو عايز تنتحر وماتبقاش منتحر في نفس الوقت عليك وعلى حي الدويقة ومنشية ناصر اللي الخنازير ماشية بتلعب فيها، والناس بتهشهم ولا كأنهم قطط!! ده غير الروائح الكريهة الصعبة لدرجة إن فيه سكان هناك بيحلفوا إنهم عمرهم ما فتحوا بلكوناتهم من ييجي أكتر من 30 سنة.. كل ما عليك لو سيادتك مش لاقي شقة تسكن فيها وعايز تنتحر لهذا السبب، إنك تجيب كام صفيحة حديد على كام خشبة مسوّسة، وتبني بيهم عشة في حضن جبل المقطم، مع مراعاة أن يكون تسريب الصرف الصحي الخاص بك على أعلى الجبل، وكلها شويتين والجبل مش هيستحمل الصرف الصحي بتاعك أنت واللي معاك وهينزل على نافوخكم واحد واحد وكلكم تتكلوا على الله في ثواني، وحتى اللي هينجى منكم وهيفضل حي تحت الأنقاض محدش هيعرف ينقذه أو يوصل له وبرضه هيموت هيموت، والذنب طبعاً هيكون على الحكومة اللي ما وفرتلناش سكن غير في المناطق العشوائية اللي في حضن الجبل اللي صخوره وحجارته مابترحمش وبتنزل على الغلابة تدفنهم بالحيا.


الطريقة التانية: ركوب الأوتوبيسات اللي بتطلع على الكباري وهي متكدسة بالبشر زي الأوتوبيس اللي وقع بالركاب بتوعه من كام سنة من على كوبري في الجيزة وكل اللي فيه ماتوا، والناس الغلابة اللي كانوا ماشيين في حالهم لا بيهم ولا عليهم تحت الكوبري برضه ماتوا، وعندك كمان كوبري السيدة عائشة اللي كل سنة يقع من عليه أوتوبيس أو ملاكي أو تاكسي أو عربية جيش، وآخر مرة الأرض هبطت تحت الكوبري، وطبعاً الحكومة هتعتبرك شهيد وتصرف لأهلك مكافآت كمان.


الطريقة التالتة:
اول ماتصحى من النوم على الفجر كده تودع وتسلم على كل أهلك ومعارفك وتسدد الديون اللي عليك وتسيب وصيتك وتجهز نفسك للعملية الانتحارية.. لأ يا راجل.. يا راجل مش في فلسطين.. إحنا بنتكلم عن عملية انتحارية هنا في مصر بتحصل كل فجرية في طوابير العيش على الأفران البلدي ولو أخلصت النية لله هتموت يعني هتموت مالهاش حل تاني..

الطريقة الرابعه: أكيد طبعاً شفت إعلانات الحكومة اللي بتقول لك لازم تلحق القطر قبل ما القطر يفوتك.. لو أنت ليك مزاج تموت بقى وخايف تتحسب عليك الموتة انتحار وتدخل جهنم يبقى عليك وعلى الحكومة.. أيوه زي ما بقول لك كده يالا بسرعة إجري إلحق القطر، وساعتها تبقى موتة ومكتوبة لك حاجة ببلاش كده.. يا إما القطر هيولع بيك والسواق هيفصل العربيات المحروقة عشان تواجه مصيرك مع نفسك زي ما حصل في قطر الصعيد من 6 سنين، يا إما هتتزنق وتروح الحمام وممكن وأنت قاعد منسجم وواخد راحتك ع الآخر تلاقي دورة المياه وقعت بيك تحت القطر يا إما القطر يخرج عن القضبان ويتشقلب بيك في الهوا، يا إما عربية تريلا فراملها تسيب وتلبس في القطر زي قطر مطروح، وفي كل الأحوال سيادتك ميت ميت.


الطريقة الخامسه: محدش فينا ماسمعش عن طريق المحور اللي المفروض إنه بيختصر الطريق.. وماحدش فينا برضه ماسمعش عن الحوادث والكوارث اللي بتحصل عليه كل يوم.. كل ما عليك بقى لو أنت وعايز تنتحر بشياكة إنك تتلكك وتروح أي مشوار بيعدي من على المحور، ولو حتى تروح تجيب من هناك ترمس، وساعتها هتلبس هتلبس مفيهاش كلام وتبقى برضه ميت شهيد على حسب تصريحات السيد وزير النقل والمواصلات والسيد وزير الصحة والسكان وقبل منهم السيد رئيس الوزراء وصورتك تيجي في الجرايد ببلاش من غير ما تكلف عيلتك حق النعي في صفحة الوفيات.. وصباح الخير يا مصر

المصدر: †† ارثوذكس †† - من قسم: الموضوعات الشبابية

[ملكه الاحزان]

هههههههههههههههههههههه اوعدك هاجربهم كلهم هههههههههههههههههه

[الناى الحزين]

صباح النور يا خويا
هى دى مصر

بس انت نسيت طريقه تانيه
انك لو عاوز تموت موتا الناس كلها تزعل عليك
انك تقف فى مزلقان سكه حديد وبعد ما القطر يعدى عدى انت بقى الطريق
هتلاقى عربيه قطر جايه بتتمخطر لوحده لانها فلتت من القطر
وطبعا هتعدى عليك وساعتها هتبقى فله
زى ما حصل من حوالى سنه عندنا فى البلد

وتحيا مصر يا عمونا
وسمعنى بودعك

[aymonded]

ههههههههههههههههههههههههه هههههههههههه
ههههههههههههههههههههههههه هههههههههه
في طريقة أخيرة وانا مجربها فعلاً
لو عايز يجيلك حساسية تحس انك هاتموت من ضيق النفس ، افتح البلكونة في القاهرة العظمى بعد الساعة 2 مساءً واشتم رائحة الدخنة اللي معبقه الجو ومغيمة السماء على الأخص عند الفجر كده ، وخد نفس عميق قوي ، وانت هاتموت بالبطيئ قوي وهاتزور المستشفى وتجرب تحط أكسجين زي ولاد الزوات كده ، ههههههههههههههه

[بنت الراعي]

ههههههههههههههههههههههههه هههههه
ايه ده يا مانو حرام عليك خاف علي نفسك هههههههههههههههههه
ههههههههههه حقيقي مش قادره ناي الصراحه طريقتك ماساويه اووووووي الحقيقه
طريقه استاذ ايمن الطف ده حتي هانجرب الاكسجين زي ولاد الزوات هههههههههههههه
هههههههههههههه صحيح شر البلية مايضحك هههههههههههههه

[الناى الحزين]

ليه يا ايمى صدقينى ده نوع جميل قوى من الانتحار
وبجد كل الناس هتزعل على المرحوم
وكمان دى موته فله قوى ومش هيحس بحاجه خالص

وتحيا مصر ياعم

[بنت الراعي]

تصدق يا ناي بدات تقنعني ههههههههههههههه
موته ال فله ال
يا شيخ حرام عليك ده انا تخيلت المشهد يا حرااااااام
حاجه صعبه اووووي بس عارف عندك حق كل الناس هاتزعل علي المرحوم فعلا
ربنا يستر علينا كلنا

[aymonded]

ههههههههههههههههههه
متهيالي علشان الناس تزعل ومش تنسى حد ياخدوا هوا ملوث بنسبة بسيطة في أجواء قاهرة المعز ، عاصمة مصر المحروسة ، إذ أنه ملوث بنسبة 90% تقريباً بس مش أكتر ....
والحمد لله ممكن الواحد يصاب بحساسية وخنقه كبيرة ويفرح لما يروح الأمن الصناعي ويشتري كمامة ، يضعها على فمه وهي بتشيل نسبة 50% من التلوث ، وبعدين لما مش يبقى فيه أمل يروح بقى المستشفي وياخد 2 متر مكعب جرعة أكسجين مكثفة ويفع دم قلبه علشان ساعتين في مستشفى ، أو ياخد واحدة هدية لما يجيب 2 لتر بيبسي ، أهو هدية برضو بمناسبة العام الجديد أهو بدل النتيجة الجديدة ...

وربنا معانا بقى وطولة العمر تبلغ الأمل وسعاد وعمر وليلي ، وأهو هم يبكي وهم يضحك ، وهمبرجر وهم يا جميل

[شمعة]

ههههههههههههههههههههههههه ههههه
حلوووووووو اوى يا مانو
ومتجربة كمان سبحان اللة
يلا على خير ربنا بقى
هههههههههههههههههههههههه
صباح الفل الياسمين يا مصر

[SAMOOOOO]

ههههههههههههههههههههههههه ههههههههه

ربنا يسامحك يا مانو

بس طرق لذيذه فعلا
ربنا يبارك حياتك