[بنت الراعي]

كتير مننا بيحس فى وقت انه بيدى ومش بياخد، بيحب وحبه ده بيتقابل بجفاء ، بيغفر وعند اول غلطة ليه الكل بيقف يحاسبه ،،بنحس ان الناس بتحبنا بس عشان مصلحتها مش شرط المصلحة دى تكون فلوس او مادية ، ممكن تكون مصلحة مساعدة ، بمعنى لما يبقى عندهم مشكلة عايزين يحكوها يلجأوا لينا ولما احنا نتعب منلاقيش حد يسمعنا
كتير بنفتكر ان لينا اصحاب كتير وبنتوقع منهم كتير وكتير اوى بس لما يجى الواقع توقعتنا كلها بتقع ونحس اننا لوحدنا ،،
من فترة قريت موضوع فى الفيس عن التوقع .. ودى كلمات منه
"انت مش بتلاقى ردود الافعال او ماتتوقعه زى مانت منتظر مش لانك انت اللى غلط لكن لانى فى شيطان عايز يسلب سعادتك عايز يسلبك ثقتك فى نفسك عايز يسلبك قوتك
عايز يحول من شخص امين لشخص موجود منه كتير...
عنيك على يسوع واعمل كل خير ومتنتظرش من الناس ولا من الدنيا حتى اقل القليل

لكن خلى مبدأك دايما هقدم كل خير لانى الهى اله خير
مش هنتظر من الناس غير انى اكون منداس وحقير

لانى الهى خالق السموات والارض قدم كل خير وعاش كاحقر حقير"

لو عايز تبقى مسيحى بجد قرر تدى ومتنتظرش تاخد انا عارفة كويس اوى انه شعور صعب لما تحس انك محتاج حد يقف جنبك ويعوضك عن اللى بتديه ويساعدك ومتلاقيش ،
انا جربت الشعور ده وكنت بس محتاجة شخص يقولى انه معايا وساندنى وصدقونى ملقيتش غير يسوع يقدر يعمل كده مش لان اللى اعرفهم وحشين بس لانهم بشر زيى زيهم... مش هيقدروا يعملوا حاجة غير انهم يحسوا بيا بنسبة ، لكن سيدى وابويا مر بكل اللى بامر بيه ، حب تلاميذه وشافوهم بيخنوه وينكروه ويبعدوا عنه ،

الكتاب المقدس بيقول "مغبوط هو العطاء اكثر من الاخذ" (اع20: 35)
لو عايز تبقى صديق بجد ...لازم تدى من غير ماتاخد
قانون العالم بيقول ان اللى يعمل كده يبقى مجنون
ويسوع بيقول اللى يعمل كده يبقى ابنى
ولو كانت المحبة هى الجنون انا يشرفنى انى اكون مجنونة بحب الناس
اشجعكم كلكم لما تلاقى نفسك وحيد وبتدى مش بتاخد ومعندكش قدرة تانى للحب ... اجرى على منبع الحب الحقيقى واطلب منه قوة تانى انك تحب وانك تدى وانك تسامح وتنسى ... اتعلم تتملى بحب يسوع عشان تحب الناس ،،
وافتكر ان يمكن يكون اللى بياخدوا منك دول طريقهم الوحيد لمعرفة ربنا هو انــــــــت
ربنا يبارككم
منقوووووول

المصدر: †† ارثوذكس †† - من قسم: الموضوعات الشبابية