[اس اسامة عوض]

بسم الاب والابن والروح القدس
الاله الواحد
امين

كل شعب مصر ثاير
مـ إللى حاصِل مـ الجَزاير
بهدلونا وهَزَّأونا ... طَلَّعُواعين أبونا
هُمَّ ليه بيكرَهونا
قُلتَها وأنا دَمِّى فاير




فى السُّودان أخدت صوره
للى راجِع عينه عُورَه
وإللى مضروب فوق دماغُه
هى حَرب وللا كُورَه




وإللى قلبُه مش نضيف
جاب كتاب إنجيل شَريف
فى المُدَرَجات وِوَلَّعة فيه.
تَصَرُف كان سَخيف
ولعوا الإنجيل كإنُّه فَحم أو عِلبِة كبريت

*****

وإللى شُفناه فى السُّودان
كان هنا فـ ديروط كمان
ناس حقوده بَهدِلِتنا
ناس ده إيه لأ قُول تيران


إيه يا مصر بس مالِك؟
إيه مِغَمِّى عيون عِيالِك
إحنا ليه أكلنا بَعض
وإنتى ياأمَّه إيه جَرى لِك؟
السَّواد عَشِّش فى أرضِك والخَراب دَه كاس وِداير

*****

وِفـ قِنا فَرشُوط حَزينه
مالكوا ياولاد الَّذين
هُوَّ يعنى تار وبايت
بين مِحَمَّدين ومينا؟



أصلُه دِمِّل كان مِعَبِّى
هُوَّ كُره مِستخبِّى
وأمَّا آن أوانُه بان
آه يا حيرتى آه يا غُلبى
إحسِبُوا الجَرحى وقولوا لى أد إيه حَجم الخَساير

*****


هات يا عَم قَهوَه سادَه
إرحموا الأقباط يا ساده
مِحتاجين قانون مُوَحَد
نِبنى بيه دُور العِبادَه



وإللى هَيشوَح بِسِيفُه
فى الكِنيسَه ويعلَى زِيفُه
مش نِقول مَجنون وعادى
يِعمِل إللى على كِيفُه
إكشِفوا كُل الحَقايق قَطَّعُوا كُل السَّتاير


*****


وإللى يِغلَط أو يِخُون
قِبطى , مُسلِم فيه قانون
وإلى يِنهَب حَق غيرُه
دَه مَكانُه فى السُّجُون




إحنا فِعلاً فى إحتياج
حق يِعدِل المَزاج
كلمتين فى جلسه عُرفى
دول مُسَكِن مش عِلاج
يَعنى مِن أوِّل خِناقَه والجُثَث تِملَى الشَّكاير

*****


يا وَطن عامِل دِماغ
عَن طَريق الحَق زاغ
ياللى فيك الرُّوح بِتِرخَص
بالكتير بتساوى صاغ


يا وَطَن يا حِتَّه مِنَّا
إنتَ ليه فَرَّقت بيننا؟
حتى فى البطاقه عامِل
خانَه كاتِب فيها ديننا
إمتى نِتساوَى فى أرضَك إمتَى هَتهِل البَشاير؟


كلمات الشَّاعر المُبدع رمزى بشاره

صلواتكم

من اجل نجع حمادى

المصدر: †† ارثوذكس †† - من قسم: صندوق مناقشات الاعضاء

[kottah_sh]

كلمات صعبه جداااااااااااا
وفعلا دا واقع وبنعيشه
كل حاجه تحصل يقولوا مجنون والدنيا تقف وتقوم
وبعدها ولا الهوا
كأنه لم يكن

ربنا يرحمنا ويدافع عننا ويرجع لكل واحد حقه
ميرسى يا اسامه

[menovich]

ثـقـــــــوا انــــــا قــد غــلــبـــت الــعـــــالــــــــم

ولكن اسمح لى بقول شئ واحد انك لا تستطيع شكوة الابن لأبية

[اس اسامة عوض]

الله وعد وحنا مستنين وعد الله

[bent jesus]

ربنا يرحمناااااااااااااااااااا اااااااااا

[البرنسيسه انوش]

بجد لوشوفتو ناس نجع حمادى كلها حزينه

والكل حزين عليهم بجد ناس نجع حمادى حزينه

[ادروسيس]

البابا شنودة قال كلمتين وانا كلى ثقة فيهم بنعمة ربنا
صوتنا وصل لربنا وربنا اخذ موقف
وكل الشعب المسيحى ومنتظر الموقف ال اخدة ربنا
وان كان ظهر بعضة فى السيول ولخراب والحسائر ال حلت
ولسة مش ممكن دم اولاد ربنا يروح هدر مش ممكن
ربنا كبير وهانشوف يامصر
شكرا ياأسامة على الموضوع الجميل دة

[أملى فيك يا يسوع]

موضوع رائع هو فعلا كلماته كتير صعبه لكن للأسف ده الواقع اللى مصر عايشاه دلوقتى لكن نرجع ونقول
ربنا موجود

[kary_alfy]

ربنا يباركك يا اسامة و يبارك رمزي بشارة بكلماته الراعة التي نعيشها و في النهاية .وعد الله لابد ان يتحقق