[وردة حزينة]

ههههههههههههههههههههههههه هههههه
عسل موت يابولا دانت كارثه بجد

مااستين البتاعه التالته على احر من الجمر

اللى الامام يابولا

[bolalover]

الحلقة رقم 3 (( يـومـيـات اعـضـاء ارثـوذوكـس ))

سلام و نعمة عليكم يا شباب المنتدي

اولا قبل ما نقول يا هادي و تقروا حلقة انهارده بجد انا مبسوط اوي من ردودكم الجميلة الي بدل علي ان الموضوع عجبكم
و بجد لو لقيت اقبال كبير من اعضاء المنتدي علي اليوميات انا هخليها 3 ايام في الاسبوع بدل يومين بس ربنا يسهلها
ركزوا بقا معايا علشان حلقة انهارده فيها مصايب منيلة

اخر يوم امتحانات

حلقتنا انهارده يا شباب ارثوذوكس جيبلكم الاعضاء بهلول و بؤلظ في اخر يوم امتحانتهم و حاجات من اشتغلاتهم
هنروح مع بعض الاول علي العضو بهلول و نشوفه عمل ايه في امتحاناته و اخر يوم

بهلول وراه امتحان الساعة 10 الصبح و و لسا نايم لحد الساعة 9.45 و الموبايل بتاع شغال رن رن رن رن و رسايل
مش راضي يبطل و مرة واحدة ام بهلول راحت جاية فاتحة باب الاوضة بتاعته و كانت فكره ان هو نزل لقته نايم عيل السرير
صرخت في بهلول

ام بهلول : يالهوووووووي بـــهـــلـــول قوم يا موكوس علي عينك..نيل قوم يا بعيد

بهلول قام مفظوع من النوم يا عيني

بهلول : ماما في ايه يا ماما .. في زلزال ولا ايه
ام بهلول : زلزال فوق نفوخك يا منيل الساعة عشرة الا ربع
بهلول : يوووه ايه يعني ... في ايه لده كله
ام بهلول : الامتحان بتاعك .. كمان نسيت الامتحان ..يارب رحمتك وسعة
بهلول : يا نهاااااار اسود الامتحان يالهوي

بهلول قام وقف علي السرير متلخبط خالص مسك الموبايل بتاعه لقا 120 مسدكول و الساعة و فاضل ربع ساعة علي الامتحان بتاعه
راح جاي لابس الشبشب بتاعه و شد البنطلون في اي تي شيرت و مغسلش شعره ولا وشه و نزل يجري علي الامتحان طيران ...
بهلول وصل الكلية الساعة 10.15 و دخل علي المدرج علطول و هو داخل ببص لمين و شمال لقا كل العيال اخذت الورق و بتحل في الامتحان

المراقب : خد هنا يا ولد انت
بهلول : ايوه يا عم انت في ايه خليني الحق الامتحان
المراقب : عم .. هو انت قاعد في غرزة .. خد يالا تعالي هنا ... ايه ال انت عامله في نفسك ده
بهلول : عامل ايه يعني
المراقب : ايه ده شبشب و وشك كله عماس و شعرك منعكش كده ليه
بهلول : بالنسبة للشبشب ده علشان رجلي بتحب الطراوه و انا مش بعرف اركز في الامتحان غير لما رجلي تكون مطريه اما شعري فده علشان افتكر الاجابة علطول و العماس بتفائل بيه
المراقب : يا سلام انت مجنون يالا
بهلول : انت هتقعد ترغي معايا كتير و الامتحان قرب يخلص
المراقب : خد الورقة و اطلع اقعد مكانك

بهلول اخد ورقة الاسئلة و ورقة الاجابة و طلع اقعد في مكانه

بهلول : صباح الفل يا هايدي
بهلول : هايدي انا برمي السلام ردي يا شيخة .. ولا انتي بتنفضيلي علشان مش عايزة تغشيشيني انهارده

هايدي قاعدة بصت لبهول و غمزتله انه يفهم حاجه و عماله تشاور له علي الي وراه بص مرة واحدة

بهلول : اهلا اهلا حبيب قلبي والهي وحشني من الامتحان الي فات
مراقب الجروب بتاع بهلول : اقعد يا بهلول الكلب مكانك و مفيش غش و لو شوفتك بتبص حوليك هنفخك
بهلول : طول عمرك حنين يا جميل و حنيتك الزيادةا دي هتخليني اعيد السنة بعون الله
مراقب الجروب بتاع بهلول : اقعد و انكتم بقا

بهلول قاعد بص في ورقة الامتحان لقاها سهلة اوي و صغيرة خالص هما 3 اسئلة بس فرح جداا جداا و انبسط اوي و قال تمام مش عايز حاجه من وشك اهلك يا مراقب الغبرة انت .... و قاعد بيحل المراقب جاله تاني و بديله ورقة

بهلول : اي دي بتاعة اي
المراقب : خذ دي ورقة الاسئلة
بهلول : لالالا ما انا معايا واحدة .. اخذت خلاص
المراقب : الي معاك دي الورقة الاولي .. اما دي الورقة التانية
بهلول : (( في حالة زهول )) ورقة مين تانية و فين اولة و مين بتكلم علي مين
المراقب : يا ابني الامتحان ورقتين انت اخذت الاولي و دي التانية
بهلول : نعم .. عليه العوض و منه العوض ... امرنا لله هاتها و خلاص

بهلول اخذ الصدمة و كان قاعد هعيط و لقا ورقة الامتحان التانية كبيرة اوي عبارة عن 12 سؤال بس و مش عارف فيهم ولا سؤال و الحمد الله

بهلول في سره: انتي السبب يا حنان .. انتي و سوسنة ... الله يسمحكم قاعد برغي معاكم طول الليل علي النت و مذكرتش حاجه و منيمني الساعة 3 الفجر .. ال ايه بنلعب الصراحة .. الهي يا رب تنوكوا يا بعدا انتي و هي ماشي ماشي ما انا الغلطان اني مشيت ورا كلمكم

.... طيب هتعمل ايه ياااض يا بهلول دلوقتي .. الساعة بقت 11.30 و فاضل نص ساعة و الامتحان يخلص

بهلول قاعد يفكر يعمل ايه يعمل ايه يعمل ايه ... قالك مبدهاش بقا هغش يعن هغش و ايكش يولع المدرج بجاز دي اخر مادة

بهلول : (( بصوت واطي خالص )) معكيش برشام يا هايدي

هايدي عمالة تحل و مش بترد عليه

بهلول : هايدي حبيبتي اختي انتي بتنفضيلي ليه

برده هايدي مش بترد و مدياله الطرشة

بهلول : هايدي هعزمك علي شورما بس و حياة ابوكي اديني اي حاجه
هايدي : احنا في صيام ..
بهلول : طيب اقولك هجبلك كنزاية

هايدي خلاص قررت انها تنفض لبهلول علشان تلحق تخلص لان الامتحان كان طويل اووووي

بهلول : بقا كده يا هايدي تبيعي اخوكي طيب و النبي الغالي سؤال واحد
بهلول : هايدي خلاص فاضل ربع ساعة

المراقب بتاع الجروب شاف بهلول و هو بيتكلم

المراقب : هات وراقتك
بهلول : نعم .. انا مكلمتش والهي ما اكلمت و رحمت جدي المقدس حنا ما اتكلمت
المراقب : انا شيفك بعنيا .. هات الورقة و قوم امشي
بهلول : و حياة مراتك فتحية الغالية عليا ما تاخد الورقة
المراقب : و انت عرفت مراتي منين ياااض
بهلول : اصل انا ليا واحد صحبي اسمه bolalover قرالها الكف قبل كده و هي ست فاضلة محترمة
المراقب : كف مين ده الي اتقرا يااااض

بهلول في سره ( اظاهر عليا خرفت يا نهار اسود شكلي هشيل المادة دي ))

بهلول : لالا غلط اسف نسيت دي واحدة تانية معلش .. ما علينا يا استاذ صحبي الي بقولك عليه ده شحات و غلبان و لو شيلت السنة مش هعرف اصرف عليه
انا: بقا كده يا بهلول بتفضحني قدام المراقب
بهلول : معلش يا بولا بس علشان يخليني اخد الورقة
انا : طيب انا هتصرف هغير في القصة و اخليه يديك الورقة
بهلول : خلاص يا باشا بقا انا اسف صدقني ما حليت حاجه سبني احل اي حاجه
المراقب : طيب اقعد ساكت خلاص .. بس عارف لو اتكلمت تاني هولع في الورقة بتاعتك
انا : ابقا افتكرهالي بقا يا عم بهلول .. عد الجمايل
بهلول : طيب يا بولا ما تخلي هايدي تغشيشني اي حاجه خليني احل
انا : لا الا كده انا مليش دعوة هايدي دي بت سقيلة و انا لو غيرتلها القصة و خليتها تغشيشك هتطلع عيني و بعدين سبني بقا اركز في كتابة بقيت الحلقة علشان الاعضاء مش تقتلني
بهلول : هايدي هاتي بقا اي حاجه (( كانه هيعيط قدامها ))

متردش هايدي

بهلول خلاص فاض بيه عمال يكلم هايدي و مفيش فايدة منفضاله و فقد الامال فيها خالص راح جاي متنرفز عليها

بهلول : (( بصوت عالي اوي )) ماشي يا هايدي يا بتاعة الواد مجدي ... يالي بتقعدي معاه في الجنينة الي وراه لوحديكم

كل الطلبة الي ف اللجنة ماتت علي نفسها في الضحك
بهلول المراقبين اتلموا عليه و اخدوا الورقة منه و طردوه
خارج من اللجنة و عمال يبرطم و يشتم .. بصراحة مش هقدر اعرفكم هو قال ايه عشان مش نتطرد انا و بهلول من المنتدي

(( اتصال تليفوني بين بهلول و العضو بؤلظ قبل ما بؤلظ يدخل الامتحان و كان بهلول لسا خارج ))

بهلول : الو
بؤلظ : حبيب قلبي بهلول باشا .. عملت ايه في الامتحان
بهلول : و هو الي يعرف اشكالكم يعمل ايه يعني
بؤلظ : في ايه يااااض .. شكلك طينتها خالص
بهلول : يا عم البت الهايدي بنت الناس الكويسة بعتني و المراقب كان هيقطع ليا الورقة لولا بولا اتصرف و غير القصة
بؤلظ : يعني ايه مش حليت حاجه خالص
بهلول : طين طين طين و زفت مفيش كلمة اتحلت الورقة سبتها طهارة شريفة عفيفة بيضاء و نصعة البياض
بؤلظ : كتك وكسة يا منيل علي عينك ... عموما متقلقش خير خير اشناء الله
بهلول : عادي بقا مش مهم
بؤلظ : المهم يا معلم هنخرج انهاره مه شنباوي و كركر صح
بهلول : اه هتصل بكركر و اربط معاه علي المعاد بتاع انهارده يا مان
بؤلظ : يالا سلام لاحسن الامتحان بتاعي هبتدي
بهلول : سلام

و بكده احنا شوفنا وكسة بهلول ... تعالوا بقا نشوف وكسة بؤلظ













عازين تشوفوا وكسة بؤلظ استنوا يوم الاتنين الي جاي و شوفوا بؤلظ هيعمل ايه

بؤلظ :: بقا كده يا بولا مش هدخلني الامتحان دلوقتي
انا : اصبر يا بؤلظ بقا ليوم الاتنين علشان الاعضاء الي بتقراء اليوميات ميجلهاش ملل مننا يا عم
بؤلظ : طيب ماشي .. استنوني بقا يا اعضاء ارثوذوكس في الحلقة الي جاية يالا سلام

اتمني يا اجمل اعضاء ان تكون حلقة انهارده عجبتكم و يارب مكونش مؤالف تقيل عليكم
سلام يا احلي اعضاء
اخوكم
بولا

[ELMAGEK]

بجد جاااااامدة اوى يا واد
يا بولا بجد احلى موضوع
فى الشهر الى فات كلة
بلا منافس بجد جميلة اوى
الحلاقات دى يا بولا ومنتظر يوم الاثنين
الى جاى بفارغ الصبر
شكرا يا جميل

[ezis]

هههههههههه جميلة جدا يابولا كمل الحمدللة انى سفرت امريكا بدرى هدفع لمين ولالمين ربنا يبارك حياتك

[keroo82]

ههههههههههههههههههههههههه ههههههه
الله يا واد يا بولا يا جن اية الجمال والحلاوة
دى هموت واعرف باقى الحلقات متتاخرش علينا

ميرسى يا معلم

[tony_algamid]

إيه الهبل ده ؟؟؟


إلـــــــــــــــــــغـــ ــــــــــــاء

















































































إلـــــــــــــــــــــــ ــغـــــــــــــــــــــا ء

[كيرو رافت]

بجد تحفه يا واد يا بولا موش عارف حاسس انى قاعد قدام اسامه انور عكاشه
الله يمسيه بالخير حسن حكشه ابو اسكندر زعيم اسكندريه
ايه ده يا ابنى الحلاوة دى بجد انت استاذ
وحاول تنزلنا اليوميات بدرى شويه مشتاق اعرف بقلظ باشا وكسته ازاى

[جوسى]

عسل يا بولا
حلوين موووووووووووووووووووووووو ووووووووووووووووت
بجد تحفه

[bolalover]

الحلقة رقم 4 من (( يوميات اعضاء ارثوذوكس ))

سلام و نعمة علي كل اعضاء بتنا الغالي ارثوذوكس

في الاول احب اشكر كل الناس الي رشحت موضوع (( يوميات اعضاء ارثوذوكس )) كــ افضل موضوع لشهر يونيو و بجد انا حاول علي قد ما اقدر اكون عند حسن ظنكم و ارسم علي وجهكم اجمل بسمة من اجمل يوميات
و بامانة انا سعيد جدااا و مبسوط اوي من ردودكم الجميلة دي الي دايما بتشجعني علي اني اكتب و الف دايما احسن ما عندي في اليوميات
و بشكر كل عضو رد علي الموضوع و اتمني ان حلقة انهارده تعجبكم ...
اخر يوم امتحانات

طبعا شوفنا وكسة بهلول الحلقة الي فاتت كانت عاملة ازاي .. انهارده بقا هنشوف وكسة بؤلظ في اخر يوم امتحانات ليه عمل ايه .
بؤلظ قفل السماعة مع بهلول و طلع علي الامتحان بتاعه علشان يلحقه .. و هو طالع الامتحان شاف بنت حلوة اوووي كان اول مرة ياخد باله منها .. المهم بؤلظ دنه ماشي وراه البنت الحلوة و نسي نفسه خالص و دخل وراها المدرج .. و كان في المدرج ده مقسم الي جروبات مختلفة من دفعات سنة اولي و سنة تانية .. بؤلظ دخل و قاعد وراه البنت الي شافها و اعجب بيها جداا و كان مصمم انه مش يسيبها (( بصراحة البت كانت جامدة موووت انا شوفتها بنفسي )) .
تم توزيع ورق الامتحان و استلم بؤلظ وراقته و اول ما استلم الورقة و كراسة الاجابة ابتدي يفتكر انه وراه امتحان و داخل هنا علشان هو وراه امتحان بس برده مش راضي يشيل عينه عن البنت دي .. بؤلظ مسك ورقة الامتحان ببص فيها

بؤلظ في سره : ايه الاسئلة الغريبة دي .. تؤ هو الحاجات دي علينا .. الله يخرب بيت جمالك بت ..يالهوووي لحقتي تنسيني المنهج بتاعي ..دا انا كنت مذاكر كويس .. بس بصراحة يا واد يا بؤلظ البنت تستاهل .. دا انا حاسس اني هفقد الذاكر بسببها

بؤلظ ابتدي يسطر كراسة الاجابة بتاعته و يقراء الاسئلة و هو مش عارف اي حاجه و حاسس اني دي اسئلة اول مرة يشوفها و مش فاهم حاجه في اي حاجه

بؤلظ في سره : لالا يا بؤلظ حل اي حاجه طيب يا جدع .. انشاء الله حتي تالف كلام في اي كلام .. انت هتعمل زي بهلول ولا ايه اسيب ورقتي كده فاضية من غير ما احل حاجه .. و بعدين في اسئلة انا ابتديت اشبه عليها ... بص انا هحل الي انا فكره و هكتب اي حاجه .. المهم بس ان البت دي مش تخرج قبلي من الامتحان علشان مش تبعد عن عيني

بؤلظ فعلا ابتدي يحل في الاسئلة و يعتبر قرب خلاص من انه يخلص تلت تربع الامتحان ...و عند نص الوقت ابتدي يمر المراقب الخاص بمراجعة بيانات الطالبة و تحقق من شخصيات كل طالب ... و وصل عند بؤلظ و براجع بياناته

المراقب : فين يا ابني الكرنيه بتاعك
بؤلظ : ايوه ثانية واحدة .. اتفضل يا استاذ

المراقب قاعد يبص في الكرنيه بتاع بؤلظ و في الورقة الي فيها الاسامي الي معاه و مستغرب اوي و عمال يبص لبؤلظ كده

بؤلظ في سره : هو الراجل ده اهبل ولا ايه .. شكله معجب بجمالي الفاتن
المراقب : انتي يا ابني .. انت قاعد هنا ازاي
بؤلظ : قاعد زي الناس .. فيها ايه (( و باستغراب شديد من سؤال المراقب ))
المراقب : انت حمار يالا .. انت مش في سنة اولي
بؤلظ : اه في سنة اولي .. و بعدين انت بتشتم ليه يا عم انت
المراقب : علشان انت حمار فعلا و قاعد في مجموعة سنة تانية و مكان واحدة من التخلفات اسمها فاطمة عشماوي ابوجبل
بؤلظ : عشماوي مين الي في الجبل ده ... الله هووو .. يالنهاررررر اااااسود ... مكان غير مكاني
المراقب : انت مسطول يا بهيم انت .. قوم يا بغل اقعد مكانك و سيب الكراسة دي و الورقة دي زي ما هما
بؤلظ : نعم اسيبهم ايه ده .. بعد ما حليت ده كله تقولي سيبهم .. دا انا قربت اخلص
المراقب : صحيح دماغك قد جسمك و زي اسمك ... انت يا غبي دي ورقة سنة تانية و انت اولي مالك انت بقا و مال امتحان ثانية ...قوم يا حمار الحق امتحانك .. لسا قدامك بتاع ساعة الحق اكتب فيها اي حاجه
بؤلظ : يا نهار منيل يعني لسا هروح اكتب من اول و جديد ... يالهوي البت كده هتطلع قبلي و مش هعرف اشوفها
المراقب : بت مين يالا .. انت شارب حاجه
بؤلظ : خلاص خلاص يا عم رايح مكاني اهو بلا شارب بلا عطشان بقا

بؤلظ قام من مكانه و برده عمال يبص للبت و ماشي عمال يخبط و حالته حالة (( طيب يا ابني اتعظ دي ودتك في دهية ))
بؤلظ قاعد مكانه و ببص لقا حوليه الخلق الي متعود يشوفهم كل امتحان و برده عمال يفكر في البت .. و استلم ورقة امتحان جديدة و كراسة اسئلة جديدة

بؤلظ في سره : الله يخرب بيتك مراقب جاي صحيح من طرف عشماوي .. مش كنت تسنبي قاعد هناك احسن علي الاقل كنت شامم ريحة الكلونية بتاعة البت النظيفة دي .. بدل الريحة الي طالعة من اكل البيض دي

كان في بت قدام بؤلظ زميلته و هي تقريبا كانت ابتدت تخلص

البنت الي قدامه : بؤلظ انت كنت فين و ايه الي اخرك كده
بؤلظ : مفيش كنت بنشر الغسيل لامي بس
البنت الي قدامه : غسيل ايه انت هتهزر .. طيب مش عايز حاجه اقولهالك
بؤلظ : لا يا ستي شكرا بصي قدامك بقا .. و انتي شبه فتكات كده
البنت الي قدامه : بقا كده طيب انا غلطلانك .. و بعدين فتكات مين
بؤلظ : بصي قدامك بقا هي مش نقصاكي .. هتمسك بغش كمان

البنت زعلت منه و بصت قدامها و سكتت (( فعلا المراقب عنده حق دماغه قد جسمه و زي اسمه ))

بؤلظ خرف في الامتحان و مكتبش ولا كلمة و سلم وراقته و هي فاضية علشان يلحق يطلع بدري قبل البنت الحلوة ..يقف يستناها بره
و فعلا خرج بؤلظ و دنه واقف مستني البنت لحد ما خرجت و راح جاي موقفها و ...

بؤلظ : لو تسمحي يا انسة ممكن سؤال
البنت الحلوة : هههههههههههههه هو انت الهبل الي كنت قاعد ورايا
بؤلظ : الله .. طيب ليه الغلط ده يعني
البنت الحلوة : هههههه سوري مش قصدي بس عايز ايه
بؤلظ : ممكن اتعرف عليكي .. ااا اااا صل انا بصراحة معجب بيكي
البنت الحلوة : ههههههههههههههههههه انت شكلك اهبل بجد تتعرف علي مين ... اقولك روح اتعالج نفسيا الاول و خس بتاع 60 كيلو و تعالي و انا اعرفك عليا يالا باي يا شاطر

و انا كمان هقولكم باي لاني بصراحة بؤلظ تعبني نفسيا انا بسبب قوة ذكائه المبالغ فيها
نصيحة مني ليك يا بؤلظ ابقا روح لدكتور علاج الغباء بدل دكتور النفساني الي متاكد انك هتروحله علشان البنت طلبة منك كده

يارب تكون حلقة انهارده عجبتكم رغم اني بجد الفتها بسرعة بسبب ظروف سفري و جيت متاخر بس انا مقدرش اتاخر عليكم و علي اليومات مهما كان
و انتظروا الحلقة القادمة من يوميات اعضاء ارثوذوكس
اخوكم
بولا

[b o b b a]

جاااااااااااااااااااااااا ااااااااااااااااااااااااا ااااااااااااااااااااااااا ااااااااااااااااااااااااا ااااااااااااااااااااااااا اااااااااااااااااامد
بجد بجد جاااااااااااااااااااااااا ااااااااااااااااااااااااا اااااامد يا بوب مش هقول اكتر من كده