[كراكيب]

اخي الشاب عاوز تتجوز ابعد عن البنت المتطفلة والمنفسنة والمعقدة واللي لابسة نضارة

عااااااوز تحب بلاش عاوز تحب طب عاوز تعرف بنت وبعدين تبقي تحبها بلاش دي ودي وقعت تحت ايدك شقة ايجار قديم وبتدور علي بنت الحلال وناوي تتخلي عن كلمة شاب بكل ماتحمله من معان يبقي انصحك تبعد عن الانواع دي من البنات
اولا البنت المتطفلة ودي هتلاقي كلامها كتير وكله طبعا هيبقي عنك فهتسالك اسئلة تبدا من هو عمو (اللي هو باباك) حب طنط (اللي هي مامتك) ازاي لغاية اخوك الصغير شال كام مادة التيرم ده ودي لو اتجوزتها فهتبقي حياتك عبارة عن ورقة اسئلة اجباري ولازم تجاوبها كلها
تاني نوع هو النوع المنفسن والبنت اللي من النوع ده تلاقيها وهي قاعدة جنبك عمالة تبص علي البنات اللي رايحة واللي جاية يمكن كمان اكتر منك انت شخصيا لكن طبعا انت بتبص من منظور وهي بتبص من منظور تاني هتلاقيها مثلا علقت علي طريقة كلامها او طريقة تسريحة شعرها او ان الكوتش بتاعها مش لايق علي البلوزة او انها رفيعة ودي لو اتجوزتها يبقي تضمن انك هتتخانق مع بنت خالتك اللي ياما بعتتلك مسج ع الموبايل او بنت الجيران اللي لسه مجلهاش العدل
النوع التالت المرفوض هو البنت المعقدة ودي عادة هتلاقيها مابتضحكش كتير وجايز كمان متلاقيش معاها موبايل تبعتلها عليه مسج واكيد هتسمع منها الجملة المشهورة (ماينفعش نتقابل ولا تمسك ايدي الا لما نتجوز) طبعا دي لو جازفت واتجوزتها اضمن لك تحديد النسل والشيخوخة المبكرة
اخر نوع من الانواع المرفوضة هو البنت اللي بتلبس نضارة ودي غالبا هتلاقيها خريجة صيدلة او طب او علوم او هندسة او شغالة في مجلس حقوق المراة ودي غالبا مش هتعرف تقولها ولا كلمة حب وطبعا ماتستناش منها اي كلمة من الكلام ده لان معظم كلامها هيكون (انه لجدير بالذكر او اخر الابحاث بتاكد او شفت امبارح برنامج الظل الاحمر) ودي طبعا لو هي رضيت واتجوزتها يبقي ماتحاولش تتباع مسلسل نور الشريف الرمضاني علي دريم او حتي روتانا سينما لكن ممكن قوي تتابع قناة الجزيرة والحرة
اخي الشاب لو لسه عندك نفس للجواز دور علي واحدة مافيهاش ولا صفة من دول لكن طبعا مش هتلاقي

المصدر: †† ارثوذكس †† - من قسم: الموضوعات الشبابية

[اللة يرعانى]

اولا شكرا ليك

بس ياترى اية هى موصفات البنت الى تعجبكو طلما كل دة وبتقول ابعد عن انواع البنات دى دايما بتظلو البنات كلما بنت كويسة ومحترمة لا يوجد بها اى عيب وشكرا ليك

[كراكيب]

ياستي اولا انا اسف لو كان الموضوع ضايقك واوعدك بموضوع للبنات يحترسوا فيه من الولاد وعامة فيه بنات محترمة جدا وكويسة جدا وبرده لابسين نضارات بدليل وجودك معانا في المنتدي وشكرا لمتابعتك في القسم ده وباقي الاقسام

[جوسى]

احم احم
ميدو انت زنيت على خراب عشك
مالهم البنات اللى لابسين نضارة يعنى ها
ما انا لابسه نضارة مش معنى كده انى معقده و بصراحه انا مش فيا اى حاجه من اللى قولتهم دووووووووووول
ابعد عن اللى لابسين نضارات احسنلك
ميرسى ليك يا جميل و ربنا معاك و يحافظ عليك و فعلا ايه مواصفات البنت اللى تعجبكوا
و فى انتظار المزيد

[كراكيب]

جوسي شكرا جدا لمرورك وعلي فكرة موضوع النضارة ده من قبيل الهزار اصلي بميل للكتابة الساخرة علي فكرة دي كتابة محترمة وكتب بيها قبل كده ودلوقتي كتاب زي احمد بهجت ومحمود السعدني وبلال فضل وبعدين انتي لو وصفتي صفاتك اعتقد هنلاقي البنت المناسبة شكرا لمرورك

[minabobos]

اهم صفه ف البنت انها تكون قريبا من الكنيسه

وميرسى ع الموضوع

[كراكيب]

اكيد يامينا بس تبقي قريبة بجد مش قريبة بالشكل وطبعا نفس الكلام للشباب

[jannis]

ربنا يخليك يا كراكيب وتكركبنا كمان وكمان صدقني انت ظالم البنات مش كل البنات وحش ومش كلهم بردوا حلوين زي ما فيه رجاله حلوين وفيه بردوا وحشين --- ويااااااااااااااااااااااا ااارب تقع مع حد مش من اللي قلت انت عليهم

[كراكيب]

يارب اسمع منها وانا هعرفها مين ميلاد بصي ياجوسي انا بحترم البنات جدا بس انا بس كنت بكركبكم شوية كنت بخرجكم من الجدية وعامة لو الموضوع ضايقك فانا اسف والنضارة علي فكرة حلال

[كراكيب]

شكرا يا جانيس لمرورك وعامة البات احلي حاجة في الدنيا بس البنات المحترمات لكن الولاد مش احلي حاجة في الدنيا حتي الحلوين ويارب اقع في واحدة من اللي قلت عليها بس هي اللي هتخسر لاني مش هقدر اعمل معاها حاجة