انا بنت عندي 16 سنة ابا بحب ولد من سنتين و هو بيحبني اوي و عندي في البيت موافقين هو بيخاف جدا عليا و بيزعل مني لو عملت حاجة متلقش باني مسيحية زي الصوت العالي و اللبس و اختيار اصحاب و حاجات كتير و هو مخلص جدا ليا و معروف بين اصحابة انوا كويس جدا و مش بتاع لعب بالبنات و هو عنده 18 سنة ابتدي يشيل فلوس و يشتغل علشان يكون نفسة انا هو بيمسك ايدي و حضني اكتر من مر ة ز ابويا عارف كدة انا مكنتش بفكر في الحوار بشكل جسدييييي خالص كنت بفكر ان الانسان دة هو اللي بيسمعني و يفهمني انا و هو بنحاول نقرب لربنا اوي بس العالم حوالينا مش مساعدنا انا و هو ابتدينا نقرب لربنا اوي بس بعد ما اخدت انا و هو خطوة لقدام الشطان ابتدي يحارني جامد خلاني افكر في الجنس كتير مش في الشخص دة بس تفكير مستمر في الجنس و بقيت عوزاة جسديا جدا مع اني كارها كدة و مش عاوزة الفكر دة خالص دة حتي لما كان بيبقي قريب مني مكنتش بفكر كدة لكن دلؤتي حتي و هو مش موجود خالص بفكر في كدة اوي انا اتكلمت معاه في كدة قالي دي حرب من الشيطان مش عارفة اعمل اية نفسي مفكرش في كده كان كل اني انا و هو نكون لبعض مش علشان الجنس لا علشان انا و الانسان اللي بحبوا و بيفهمني و افهموا نرتبط و نقرب لربنا مع بعض و نشجع بعض

المصدر: †† ارثوذكس †† - من قسم: حوار من الاعماق

[emmmy]

احذروا من الثعالب الصغيرة لانها تفسد الكروم
عجبى لك ايتها الفتاة !!!
انت عارفة انك بدأتى تنحدرى كالكرة من فوق الصخر وفاهمة الموقف كويس
ومع ذلك بتعاندى نفسك لية يا بنتى ؟؟؟
وطبيعى ان العلاقة تبدأ بالبراءة اللى وصفتيها وتنتهى بالخطر اللى انتى حاسة بية وفاهماة
اسمعى يا يا عزيزتى ...
احنا مش عيب نغلط لان دة طبيعى لاننا بشر وتحت الضعف - بس العيب حقيقى وعيب اوى هو التمادى فى الغلط برغم ان الامور وضحت قدامنا وفهمنا غلطنا
طيب تعالى نتفاهم بالراحة كدة انتى بتقولى عندك 16 سنة وهو 18 سنة يعنى انتى تقريبا فى اولى ثانوى على ما اعتقد
وهو ثالثة ثانوى تقريبا - طيب يا بنتى بالعقل استخدمى عقلك معايا كدة هو قدامة لسة يخلص دراستة وبعدين جيش وبعدين يشتغل ويكون نفسة يعنى ما لا يقل عن 7 - 8 سنين على الاقل خالص ان لم يكن اكثر صدقينى
دة فى حالة لو هو ظروفة كويسة ومساعداة كمان
تفتكرة فى قصة حب وعلاقة بين بنت وولد تفضل كل السنين دى ؟؟؟
طيب ما انتى هتكونى قابلتى ناس كتير وعرفتى فى الجامعة شباب كتير وكمان تأخدى خبرة وتتعلمى دروس من الحياة

على فكرة هقولك حاجة تانية وارجوكى تصدقينى
الشاب دة مش هيتجوزك ابدا خلاص على كدة انتى بالنسبة لة ورقة محروقة وملهاش قيمة مدام وصلت لدرجة الحضن بقى
وحكاية ان بابا عارف دى مش منطقية معلش سامحينى -- حبيبتى فوقى قبل فوات الاوان واكسبى نفسك وكرامتك لسة الفرصة فى ايدك وانتى صغيرة ومرحلتك معرفة ومشاعرك مرفهة ودة مفهوم بس لازم نبقى حاطين لنفسنا حدود ومش المفروض نتخطاها ابدا تحت اى بند
الشاب او الرجل وخصوصا الشرقى بيحب ويحترم البنت الصعبة اللى عارفة حدودها وتعرف تحافظ على نفسها وعندها ارادة تقول للغلط لأ
لكن البنت السهلة بتكون بالنسبة قلقل وشك تخيلى انة حتى لو اتجوزك هيفضل شاكك فيكى مع كل لحظة يشوفك بتسلمى على حد من قرايبك وهيقول فى نفسة ما كانت بتعمل معايا كذا وكذا وياما لمستها وحضنتها يعنى ممكن تعمل اى حاجة بقى بعد كدة دة فى حالة لو اتجوزك بس مش هيتجوزك صدقينى لاسباب كتير جدا
بصى اقولك حاجة ---- ودة مجرد مثل مع الفارق فى التشبية
اية رايك لو انا جيت اشترى ثمر معين من السوق ولقيتة لسة نى واخضر مش حلو وجيت بعد فترة ولقيت ثمر تانى من نفس النوع بس مستوى وجميل تفتكرى هيكونوا بنفس الثمن ولا هتفرق ؟؟
اكيييد هتفرق يا بنتى الاول استعجلوا على قطفة فكان ثمنة رخيص
والثانى استحمل الشمس واستوى بس ثمة غالى ومش بيشترية غير اللى معاة ثمنة
انتى كمان استنى لما تخلصى دارسة وتأخدى خبرة من الدنيا ويكون عندك الاهلية للمسئولية دى وساعتها الف من يتمناكى ويقدرك ويحترمك
الحب مش كدة يا عزيزتى !!! الحب مسئولية والتزام واحترام

اوعى اوعى تتنحدرى اكثر من كدة ووقفى المهزلة دى فورا قبل ما تندمى ومتستهونيش بالموقف ومتحاوليش تكونى معاة فى مكان لوحدكم تانى ابدا لان الشيطان هيستغل دة فعلا ويوقعقكم فى الخطية اللى مش هينفعك فيها ندم بعد كدة
اشغلى نفسك بداستك ومستقبلك ومضيعوهوش منك ارجوكى
فى حاجات لما بنكسر ممكن نصلحها - لكن فى حاجات تانية لما بنكسر مستحيل نصلحها تانى

[فيولا توتا]

بصى انا هقولك على حاجه اطلبى شفاعه الملاك ميخائيل وخلى بالك اول ما الفكر يجيلك اطلبى شفاعته قولى بس يا ملاك ميخائيل وشوفى هيعمل ايه ولا تستسلمى ورينا يتمجد

لية محدش رد عليا خالص انا بجد محتاجة حد يرد عليا

[ريم الخوري]

شوفي حببتي اقولك شغلة مدام ان اسرتك موافقة وانت حابه وهو كمان وان الموضوع ميش بس حب وعابر بحكم المرحلة العمرية اللى انت فيها وهو كمان زي ما انت بتقولي يبقي اللى عليكي تعملية انك تحافظي علية نقي وشفاف وطاهر من فكر الخطيئة والانجراف وراء الجسديات لان جسدك دا هيكل للرب وهيكل الرب مقدس لازم تحافظي علية لحين ان يشاء الرب ويرسيكي على الانسان اللى يختارة ليكي سواء الانسان دا او غيرة وفي المرحلة والفترة دي تكوني انت قدرتي تخلصي دراستك وهو كمان لانكم بجد لسا باول الطريق سننا وفكرا ومحتاجين يكون عندكم شوية صبر على نفسكم
وكمان يكون الحب اللى بينكم لو حقيقي يكون نضج وياكم وكبر وبقي صورة جميلة لقلبين عاشو الحب بطريقة مقدسة نقية يقدروا يبنو عليها اسرة مسيحية متنية مبنية على طريق القداسة بسر الزواج المقدس
الحب بحد ذاتة ميش عيب ولا غلط بس نعرف كيف نحب وان الحب دا يكون نقي مفهوش اي انحرافات عن الطهارة واي بنت واي شب يحبوا بس يحافظ على قدسية هيكلهم لانة سكن الرب وصورتة بنفس الوقت منشوهوش بالخطيئة اي كان نوعها
ربنا يوفقك ويختار ليك صالح نفسك بحسب تدبيرة الالهي اختي

[+stranger+]

انا مستغرب جدا ازاى عندك 16 سنة وهو عنده 18 سنة واهاليكوا موافقة !! موافقة على ايه بالظبط ؟!! سامحينى بس انتوا لسة اطفال وغير مؤهلين للأرتباط بالمرة ولا ناضجين كفاية للأتخاذ قرار مصيرى زى ده وطبيعى ان الموضوع يبقى كله مشاكل ومصايب ,
واعذرينى على كلامى , بس اللى ما بينكوا ده ابعد ما يكون عن الحب الناضج , ده مجرد انجذاب رومانسى , وده سائد فى سن المراهقة ونهايته معروفة بالفشل الزريع ,
عموما الغلط الاكبر على الاهل , ازاى يسيبوا المهزلة دى تستمر من غير ما ينصحوا ان ده مش وقته !!

لية كلوا بيحبطني اننا مش هنكمل ما انا اعرف خادمة في الكنيسة كانت بتحب ولد من 1 اعدادي و دلؤتي هما مجوذين و عندهم اولاد و حياتهم سعيدة جدا لية منكملش

[+stranger+]

الحالات النادرة دى مش مقياس ابدا !
وغالبا بيكتشفوا غلطتهم وتسرعهم بعد الجواز ومش شرط يقضوا حياة سعيدة زى ما انتى متخيلة
انا اعرف عشرات الاحالات كانوا بيحبوا بعض من اعدادى وثانوى وسابوا بعض بعد التخرج بعد ما علقوا بعض 8 سنين !!

عارفة ليه الموضوع هيفشل مليون فى المية
لأن الانسان بينضج حوالى من 22 ل 24 , وقبل السن ده بيكون لسة معندوش لا خبرة ولا نضج ولا وعى مناسب يؤهله انه يختار صح ,بيبقى ماشى ورا مشاعره وتسديد احتياجاته وخلاص من غير عقل , كل اللى بيفكر فيه "الله الشعور انك تحب وتتحب ده حلو اوى" "عايزة افضل كدة مدى الحياة" , لا حد فيكو بيفكر فى مدى التوافق العقلى ولا توافق باقى الظروف
انا بكلمك الكلام ده عن خبرة ,انا حبيت وانا عندى 18سنة , وكنت ببصم بالمليون ان عمرنا ما هنفترق , وبعد سنتين ادركت ان احنا عيال وانا اللى سبتها , وانا بقولك اهو , هيعلقك وبعد كدة هيسيبك مهما سمعتى منه من وعود وتعهدات كله كلام عيال , لأنه مش مدرك ان فيه حسابات تانية اكبر من الحب , الجيش , الماديات , الشغل , الاستقلال المادى , شوية وطرف فيكو هيفوق وهيعرف ان الموضوع ده مش وقته تماما وان هو اتسرع

الوقت ده المفرض تركزى على دراستك وتركزى على الصداقة البريئة ,اى حاجة تانى هتفشل وانتى الوحيدة اللى هتخسرى طاقة نفسية وعواطف ودموع وكل ده انتى فى غنى عنه , لازم تسمعى نصايح الناس اللى جربت قبلك

ده كوم بقى والتلامس الجسدى اللى ما بينكوا كوم تانى !!! دى محتاجة محاضرة لوحدها , بس متزعليش منى , انا مش مستغرب ان العلاقة بتاعتكوا بتتطور للأسوأ , ما بنى على باطل هو باطل , وانتوا علاقتكوا غلط من الاول