[ريناملاك]

اخواتى الاحباء
انا محتاجة مساعدتكم جدا جدا مش ليا انا شخصيا لكن لجوز اختى
بصراحة انا مكسوفة جدا و انا بكتب لكم الرسالة دى و حاسة ان الكلام تقيل جدا عليا بس لما اقولكم طلبى هتعرفو ان ليا حق اكتبها مهما كنت محرجة

الموضوع بيتلخص فى ان جوز اختى عندة مزرعة كانت مزرعة ارانب لكن ربنا لم ير له الرزق من الارانب بل بالعكس خسر كل مالة حتى تحويشة العمر اللى رجع بيها من الكويت
على الرغم انة امين جدا جدا جدا و شاطر جدااااااااااااااا بامانة انا مش بقول كدة لانة جوز اختى بس يكفى اقولكم انة كان جواهرجى زمان قبل سفرة الكويت لكنة بعد تعمقة فى المهنة وجد انة علشان يقدر يكسب لازم يكون فى عدم امانة فترك الصاغة و سافر الكويت و الحمدلله ربنا كرمة هناك و لما رجع عمل مصنع تعبئة و تغليف و كان بردة علشان يكسب لازم يكون وزن الكيس اللى هو 1 كيلو على الاقل خالص 970 جرام فقط فبالتالى لم يستمر فيها و عمل مزعة الارانب اللى جابتة الارض ( على فكرة انا مش بشحت و هقولكم طلبى بعدين بس انا عايزاكم تعرفو الظروف اللى خلتنى اكتب الموضوع دة من غير ما حد يعرف الا جوزى و تعرفو كمان قد اية ربنا جرب الانسان دة فى رزقة و فى اولادة كمان هو و اختى فقدو تؤام ولدين اللى كانت بتتمناهم و لما ربنا اداهملها اخدهم و هما فى بطنها)

المهم لما موضوع الارانب دة تدهور اوى مع العلم ( كل الناس اللى عمل لها مزارع نجحت جدا الا مزرعتة) غير نشاطة و خلاها مزرعة بط و رومى و فراخ و الحمدلله ماشى الحال احسن كتير اوى من الارانب على الاقل مش بتجيلهم كوكسيديا و تاخدهم زى الارانب
لكن طبعا انتو سمعتو مؤخرا عن هوجة انفلونزا الطيور اللى بتحصل كل سنة هو الحمدلله الف حد و شكر لك يارب لم تصاب مزرعتهم و الا كان خسر الفلوس اللى مستلفها كمان المهم بس انة حاليا هو عندة رومى و بط و فراخ بلدى (بلدى بجد) و وزنهم بقى كويس و المفروض كانت الحاجات تتباع لكن جت حكاية انفلونزا الطيور دى خلت التجار عايزين يستغلو الظروف و ياخدو الحاجات بربع ثمنها و طبعا هو خاف حد يمر عالمزرعة وفياخدو الحاجات بعد حيرة كبيرة قرر انة يدبح الحاجات اللى عندة و يثلجها خوفا من المرض و من نهب الحكومة و من جشع التجار

طلبى بس اذا كان حد يعرف يساعدنا فى تسويق الحاجات دى علشان يشترى بتمنهم تاكسى بالتقسيط بصراحة انا مالاقيتش حاجة اقدر اعملها غير انى اكتبلكم الطلب دة جايز حد منكم يشترى او يسوق لة الحاجات دى و هو مستعد كمان يدفع عمولة بس الحاجة تتباع بسعر معقول
ربنا يعلم ان الحاجات بتاعتة دى فوق الممتازة و رحمة ابنى اللى مات قبل حتى ما اشوفة انا مش بقول كدة علشان الحاجات تتباع و خلاص لا حقيقى حاجات ممتازة يكفى انة مش بيعطى اى هرمونات و لا ادوية من دى و انا مش باكل غير من حاجتة خاصة بعد و ظروف ولادة ابنى و وفاتة فبقيت بخاف اجيب اى حاجة من المحلات مش عارفة اية اللى فيها

صدقونى دة مش مجرد اعلان و خلاص و لا طريقة عرض جديدة للسلع صدقونى هما محتاجين انهم يبيعو الحاجات دى جدا و دة الحاجة اللى فى ايدى اساعدهم بيها
لو كل حد منكم و اشترى قطعة واحدة منة الحاجات دى هتخلص لانة الكمية اللى عندة مش كبيرة اوى ربنا يعلم مدى الخجل اللى انا فية و انا بكتب بس مش قدامى حاجة تانى اساعدهم بيها غير انى اخد منهم اكبر كمية ممكنة و اكتب لكم الموضوع دة و ربنا يعوض تعب محبتكم

لو حد محتاج حاجة يبعتلى عالخاص و انا اديلة تليفون جوز اختى
ربنا يعوضكم جميعا
اختكم
ريناملاك

المصدر: †† ارثوذكس †† - من قسم: أعلانات وأحتياجات

[Team Work®]

ربنا معاكم ويبارك حياتكم ويفرح قلوبكم

والسنة الجديدة دى هايكون فيها خير كتير ليكي وليه هو ولكل الاسرة

ومش تقلقى احنا هنا كلنا بنساعد بعض

وربنا موجود

[ريناملاك]

المشاركة الأصلية كتبت بواسطة Team Work® ربنا معاكم ويبارك حياتكم ويفرح قلوبكم والسنة الجديدة دى هايكون فيها خير كتير ليكي وليه هو ولكل الاسرة ومش تقلقى احنا هنا كلنا بنساعد بعض وربنا موجود

ربنا يسمع منك يا تيم ورك
و الف مليون شكر على ردك و مساندتك
يارب فعلا حد يهتم و يساعدنا

[ريناملاك]

ياجماعة لحد دلوقتى فى 13 مشاهدة و هو رد واحد من تيم ورك ربنا يخلية هو الوحيد اللى قالى كلمة تعزية هو دة اللى قدرتو علية؟ تشوفو و تمشو ؟ مش دة ابدا اللى كنت متوقعاه منكم

انتو شايفين ان الموضوع تافه للدرجة دى؟ انتو مش حاسيين يعنى اية واحد بيفلس؟ واحد كل حروبة فى اكل عيشة . صدقونى هما دلوقتى عايشيين حياة صعبة جدا و مع كدة انا مش بطلب منكم معونة شتاء انا بطلب مساندتكم و افكاركم
و انا كمان فكرت فى كام حاجة

ممكن لو مش عايزين تاكلو الحاجات دى ممكن تشترو منهم من فلوس العشور بتاعتكم و تاخدو الحاجات تودوها لاخوة الرب او اى ملجأ و صدقونى الحاجات دى انا باكل منها مع انى عادة بقرف جداااااااا يعنى لو فيها حاجة انا هقرف قبلكم و مش هقدر اتكلم على الحاجات دى من اصلة و بكدة تبقو ساعدتوهم و نفعتوهم و قدمتو خير من الناحيتين

و ممكن كمان الناس المسؤلين عن خدمة الكانتين فى الكنائس يشترو منهم و يبيعوها فى الكانتين هو كان بيبيع لدير بنات مريم فى المطرية و بعد كدة عمل لهم مزرعة و لو تحبو تسالو عنة هناك تاسونى صوفية هى اللى عمل لها مزرعة هناك

وعموما شكرا فى كل الاحوال

[nrmo]

بجد انا مش عارفه ارد اقول ايه بس كل اللى اقدر اقوله ربنا موجود وعمره مابينسى حد وهو اكيد هيساعده
وشفاعة العدراء مريم تكون معاه ومع زوجته وربنا يقويكم

[minabobos]

بجد انا مش عارف ارد اقول ايه بس كل اقوله ربنا موجود وعمره مابينسى حد وهو اكيد هيساعده
وشفاعة العدراء مريم تكون معاكم
وصلوات القديسين تقدر تخرجكم من المنحه دى

وربنا يدبر وحد يقيد

[magedemail]

ربنا موجود

[syfy]

بصى ياريناملاك انا كمان كان عندى مزرعه ارانب ودلوقتى عندى مزرعه بط بس عايزه اقولك ان فلونزا الطيور مش بتأثر على السوق خلى جوز اختك ينزل عند الفرارجى او يدبح فى مجازر ويغلف ويبيع للسوبر ماركت ومايزعلش على الى راح وربنا يقدر على كل شى وبالنسبه للكوكسيديا فيه تطعيمات عند الدكاتره البيطريه للتسمم المعوى وربنا معاكم

[bolalover]

بجد معنديش رد اقوله غير ربنا يعنكم و يقويكم
و زي ما ربنا بيدي التجربة يدي معاها المعونة و الحل بس زي ما هو فضل الامانة في كل حاجه لازم يستمر في طريق ربنا و في الاول و الاخر مفيش غير ربنا هو الي هيساعده و هيقويه و يعينه
و انا متاكد ان دي تجارب من ربنا و هو هيقف جنبه و هيكون سعيد بعد كده لانه رفض كل محاولات عدو الخير لاخده لطريق الشر
ربنا يبارك و يعينه و كل الي اقدر اشارك بيه اني اصليله
ربنا يتقبل و يقويه

[lawyer]

مادام هو ترك تجارة الدهب و المصنع علشان خاطر امانتة كل الاشياء تعمل للخير صلي بس وشفاعة العذراء مريم و القديسين معاكم

وربنا موجود


lawyer